ގާނޫނުތަކާއި ގަވާއިދުތަކުގެ ހުދޫދުގެ ބޭރުން ތަކުރާރުކޮށް އެކިއެކި ހަރަކާތްތައް ހިނގާފައިވާތީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް، ރައީސްކަން ކުރައްވާ ޕީޕަލްސް ނޭޝަނަލް ފްރޮންޓް (ޕީއެންއެފް)، އެއް ލައްކަ ރުފިޔާއިން ޖޫރިމަނާކޮށްފި އެވެ.

އެކަން ރައީސް ޔާމީނަށް އެޑްރެސް ކޮށް އިލެކްޝަންސް ކޮމިޝަނުން ފޮނުވާފައިވާ ސިޓީގައި ވަނީ ބުނެފަ އެވެ. އެ ސިޓީގައި ބުނީ ޕީއެންއެފުން ގާނޫނުތަކާއި ގަވާއިދުތަކުގެ ހުދޫދުގެ ބޭރުން ތަކުރާރުކޮށް އެކިއެކި ހަރަކާތްތައް ހިންގަމުން އަންނަ ކަަމަށެވެ.

ހާއްސަކޮށް ސިޔާސީ ޕާޓީތަކުން ބާއްވާ ބައްދަލުވުންތަކަށް ހުރަސްއެޅޭ ގޮތަށް އަމަލުކުރުމާއި، ސިޔާސީ ޕާޓީތަކުގެ ގަވާއިދުގެ ދަށުން އާންމު ބައްދަލުވުން ބާއްވާ ތަނާއި ވަގުތާއި ބައްދަލުވުމުގެ ބާވަތް އެބައްދަލުވުމެއް ބޭއްވުމުގެ 24 ގަޑިއިރުކުރިން އިލެކްޝަންސް ކޮމިޝަނަށް އަންގަންވާނެ ކަމަށް ބަޔާންވެފައިވީނަމަވެސް އެގޮތަށް އެކަން ކުރަމުން ގޮސްފައި ނުވާކަމަށެވެ.

ކޮމިޝަނުން މިހެން ބުނެފައިވާއިރު ޕީއެންއެފްގެ އިހްތިޖާޖުތައް ޕީއެންސީ ހަރުގެ ކައިރީގައި ހިންގާ އެ ޕާޓީގެ ސިޔާސީ ހަރަކާތްތަކަަށް ދަނީ ތަކުރާރުކޮަށް ހުރަސް އަޅަމުންނެވެ.

ސިޔާސީ ހަރަކާތްތަކުގައި ގާނޫނާ ހިލާފު އަމަލުތައް ނުހިންގުމަށް އިލްތިމާސްކޮށް އިލެކްޝަންސް ކޮމިޝަނުން ވަނީ ސިޔާސީ ޕާޓީތަކުގެ ގާނޫނުގެ 45 ވަނަ މާއްދާއާއި 49 ވަނަ މާއްދާގެ ދަށުން އެ ޕާޓީ 100،000 ރުފިޔާއިން ޖޫރިމަނާ ކޮށްފައިވާކަން އަންގާފަ އެވެ.

އަދި މި އަމަލުތައް ތަކުރާރުވާނަމަ އެ އަމަލެއް ހިންގާ މީހުންނާ މެދު ވެސް ގާނޫނީ ފިޔަވަޅު އަޅާނެކަމަށް ކޮމިޝަނުން ވަނީ އިންޒާރު ވެސް ކޮށްފަ އެވެ.

ޕީއެންއެފަަށް ފިޔަވަޅު މި އެޅީ އެތައް ފަހަރަކު ނަސޭހަތްތެރިވުމަަށް ފަހު އެވެ. ކޮމިޝަނުން އިންޒާރު ދިނުމުން އެ ޕާޓީން ވަނީ އެއީ އެ ޕާޓީގެ ހަރަކާތްތަކެއް ނޫން ކަމަށް ބުނެފަ އެވެ. ނަމަވެސް އެހާތަނަަށް އެ ހަރަކާތްތައް ބާއްވަމުން އައީ އެ ޕާޓީން އިއުލާނުކޮށްގެންނެވެ.

ޕީއެންއެފްގެ އިހްތިޖާޖުތަކުގައި ހުތުރު ބަހުން ވާހަކަ ދެއްކުމާއި އާންމު އިޖްތިމާއީ މިންގަނޑާއި ހިލާފު އެތައް ކަމެއް ވެސް ދަނީ ފެންނަމުންނެވެ.