ތަފާތު ސިޔާސީ ވިސްނުންތައް އެއްފަރާތްކޮށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރާ ދެކޮޅަށް ސިޔާސީ ލީޑަރުން، ޚާއްސަކޮށް ކުރީގެ ރައީސް މުޙައްމަދު ނަޝީދު، ރައީސް ޔާމީން އަބްދުލްޤައްޔޫމް އަދި ރައީސް އިބްރާޙިމް މުޙައްމަދު ޞާލިޙް އެކުގައި ނުކުމެވަޑައިގަތުމަށް އިދިކޮޅު އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލް ގޮވާލައްވައިފިއެވެ.

ފައްޔާޒު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް މުއިއްޒު ހުންނެވީ ރައީސުލްޖުމްހޫރިއްޔާގެ މަގާމާ ހަވާލުވުމަށް ކުރެއްވި ހުވަޔާ ހިލާފުވެވަޑައިގެން ކަމަށާ އެމަނިކުފާނުގެ "ބުއްދި ފިލައި ގޮސްފައިވާ" ކަމަށެވެ.

ފައްޔާޒު ވިދާޅުވި ގޮތުގައި މިހާރު މިއީ ސިޔާސީ ތަފާތު ވިސްނުންތައް އެއްފަރާތްކޮށް، ސަރުކާރާ ދެކޮޅަށް މުޅި ރާއްޖޭގައި މުޒާހަރާކޮށް ރައްޔިތުންގެ ނުރުހުމުގެ އަޑު އިއްވަން ޖެހޭ ވަގުތެވެ.

ވަކިން ހާއްސަކޮށް، ކުރީގެ ރައީސް މުހައްމަދު ނަޝީދާއި، ކުރީގެ ރައީސް އިބްރާހީމް މުހައްމަދު ސޯލިހު އަދި ކުރީގެ ރައީސް އަބްދުالله ޔާމީން އަބްދުލްގައްޔޫމް އެކުގައި ނުކުމެވަޑައިގެން ގައުމު ސަލާމަތް ކުރައްވަން ޖެހޭ ކަމަށް އޭނާ ވިދާޅުވިއެވެ.

"އަޅުގަނޑުމެން މިތިބީ ތިން ރައީސުންނާއެކު މި މަސައްކަތް ފަސްޖެހުމެއް ނެތި ކުރުމަށް ތައްޔާރަށް،" ފައްޔާޒު ވިދާޅުވިއެވެ.

މީގެ އިތުރުން، އަދަދު ނޫހުގެ ނޫސްވެރިން މިހާރުން މިހާރަށް މިނިވަން ކުރުމަށްވެސް އޭނާ ގޮވާލައްވާފައިވެއެވެ. އަދި އިންސާފުވެރި ފަނޑިޔާރުންނާއި ދައުލަތުގެ މިނިވަން މުއައްސަސާތަކުން މިކަމުގައި އިސްނަގައިގެން މަސައްކަތް ކޮށްދެއްވުމަށް އޭނާ ވަނީ އިލްތިމާސް ކުރައްވާފައެވެ.