ކުރީގެ ތިން ރައީސުން ކަމަށްވާ ރައީސް ޔާމީނާއި ރައީސް ނަޝީދާއި ރައީސް ސޯލިހް ބައްދަލްވުން މާދާމާ ރޭ ބޭއްވުމަށް ނިންމައިފި އެވެ.
އެކަން ޔާމީންގެ ޕީއެންއެފުން ވަނީ ޔަގީންކޮށްދީފަ އެވެ. ތިން ރައީސުންގެ ބައްދަލްވުން ބޭއްވުމަށް ހަމަޖެހިފައިވާ ކަމަށާ އެ ބައްދަލްވުން މާދަމާ ރޭ އޮންނާނެ ކަމަށް ބުނި ނަމަވެސް އިތުރު ތަފްސީލެއް ނުދެ އެވެ.
ކުރީގެ ރައީސް ޔާމީން ވަނީ ރައީސް ނަޝީދާއި ރައީސް ސޯލިހާއެކު މަޝްވަރާކުރައްވާ އެކުގައި މަސައްކަތް ކުރައްވަން ތައްޔާރަށް ހުންނެވި ކަމަށް ވިދާޅުވެފަ އެވެ. އެއާއެކު ތިން ރައީސުންގެ މަޝްވަރާތަކެއް ވަރަށް އަވަހަށް ފެށޭނެ ކަމަށް މިއަދު ވަނީ ހާމަކޮށްފަ އެވެ. އެމްޑީޕީގައި ދެ ރައީސުންގެ މެދުގައި ބޮޑު ނުތަނަވަސް ކަމެއް އޮތް ނަަމަވެސް ސަރުކާރާ ދެކޮޅަށް ކުރެވޭ މަސައްކަތެއްގައި ދެ ރައީސުން ވެސް ބައިވެރިވާނެ އެވެ.
މި ބައްދަލްވުމާއި ގުޅޭގޮތުން ކުރީގެ ދެ ރައީސުންގެ ފަރާތްޕުޅުން ރަސްމީކޮށް އަދި މައުލޫމާތެއް ހިއްސާއެއް ނުކުރެ އެވެ.
ތިން ރައީސުން އެކުގައި ބައްދަލުކުރުން ވެގެންދާނީ ވަރަށް ތާރީހީ ކަމަކަށެވެ. އެއީ މި ތިން ބޭފުޅުން އެކުގައި ބައްދަލު ކުރައްވާފައިނުވާތާ އެ އަހަރުތަކެއް ވެެއްޖެ އެވެ. އަނެއްކޮޅުން މިއީ ވަރަށް ވާދަވެރި ތިން ބޭފުޅުންނެވެ. ތިން ބޭފުޅުންގެ ވެރިކަމުގައި ދެން ތިއްބެވި ބޭފުޅުން ހައްޔަރުކޮށް ޖަލުގައި ބަންދުކުރައްވާފަައިވެ އެވެ.
ރައީސް ނަޝީދުގެ ވެރިކަމުގައި ރައީސް ޔާމީން އަދި ރައީސް ޔާމީންގެ ވެރިކަމުގައި ރައީސް ނަޝީދު އަދި ރައީސް ސޯލިހްގެ ވެރިކަމުގައި ރައީސް ޔާމީން ހައްޔަރު ކުރެއްވި އެވެ.
ނަޝީދުގެ ވެރިކަމުގައި ޔާމީން ހައްޔަރުކޮށް އާރަށުގައި ބަންދުކުރެެއްވި އެވެ. އަދި ޔާމީންގެ ވެރިކަމުގައި ނަޝީދަށް 12 އަހަރުގެ ޖަލު ހުކުމެއް އިއްވާ ޖަލުގައި ބަންދު ކުރެއްވި އެވެ. ރައީސް ސޯލިހްގެ ވެރިކަމުގެ ބޮޑުބައިގައި ޔާމީން އޮންނެވީ ޖަލުގަ އެވެ.
Advertisement
This content is created and paid for by advertisers and does not involve Voice Journalists
