ދިވެހިރާއްޖެ މިހާރު އޮތް ޙާލަތް ރަނގަޅު ކުރުމަށް، ރަނގަޅު މަސައްކަތްތަކެއް އެކުގައި ކުރެވޭނެ ކަމަށް އެމްޑީޕީގެ ކުރީގެ ޗެއާޕާސަން އަދި ރައީސް ނަޝީދުގެ ފަރާތުން ތިން ރައީސުންގެ މަންދޫބުންގެ ގޮތުގައި ކަނޑައަޅުއްވާފައިވާ ފައްޔާޒު އިސްމާޢީލް ވިދާޅުވެއްޖެއެވެ.

ނޫސްވެރިން ހައްޔަރުކޮށް، މިޑިއާތަކަށް ހުރަސް އަޅަމުންދާތީ އެކަން ނިމުމަކަށް ގެނައުމަށް ކުރީގެ ރައީސް ޔާމީން އަބްދުލް ޤައްޔޫމް އާއި، މުޙައްމަދު ނަޝީދުގެ އިތުރުން ރައީސް އިބްރާހީމް މުހައްމަދު ޞާލިޙް ވަނީ ގުޅިގެން މަސައްކަތް ކުރެއްވުމަށް ނިންމަވާފައެވެ.

އަދި ތިން ރައީސުންގެ މަސައްކަތްތަކާ ގުޅޭގޮތުން މައުލޫމާތު ދިނުމަށާއި، އެހެނިހެން ކަންކަން ކުރެއްވުމަށް ކޮމިޓީއެއް އުފައްދާފައިވާއިރު އެ ކޮމިޓީގައި ތިން ބޭފުޅުންގެ ފަރާތުންވެސް ދެ މަންދޫބަކު ވަނީ ހިމަނާފައެވެ. 

އެގޮތުން އައްޔަނު ކުރެވުނު މަންދޫބުންނަކީ؛

ކުރީގެ ރައީސް މުހައްމަދު ނަޝީދުގެ ފަރާތުން އައްޔަނު ކުރެއްވީ:

ރައްޔިތުންގެ މަޖިލީހުގެ ކުރީގެ ނައިބު ރައިސް އީވާ އަބްދުالله  އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް

ކުރީގެ ރައީސް އަބްދުالله ޔާމީންގެ ފަރާތުން އައްޔަނު ކުރެއްވީ:

ޕީއެންއެފްގެ ނައިބު ރައީސް މުހައްމަދު މަލީހު ޖަމާލު

މާލޭގެ މޭޔަރުކަމަށް ވާދަކުރެއްވި އިސްމާއިލް ޒަރިޔަންދު

ކުރީގެ ރައީސް އިބްރާހިމް މުހައްމަދު ސޯލިހްގެ ފަރާތުން އައްޔަނު ކުރެއްވީ:

ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ސަލީމް (ސައްލެ)

ރައްޔިތުންގެ މަޖިލީހުގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)

މަންދޫބުންގެ ކޮމިޓީގެ ފުރަތަމަ ބައްދަލުވުން މިއަދު ބާއްވާފައިވާއިރު، ބައްދަލުވުމާ ގުޅޭ މާބޮޑު ތަފްސީލެއް ދީފައެއް ނުވެއެވެ. 

"އިރާދަކުރެއްވިއްޔާ އަޅުގަނޑުމެންގެ އުންމީދު ވަރަށް ބޮޑު، މިހާރު މި ގައުމު މިދާ ދިމާލުން ރަނގަޅުކުރުމަށް، ރަނގަޅު މަސައްކަތްތަކެއް އަޅުގަނޑުމެން އިދިކޮޅު ފަރާތްތައް އެއްކޮށް ކުރެވޭނެ ކަމާ ދޭތެރޭ،" ބައްދަލުވުމަށްފަހު ފައްޔާޒު ވިދާޅުވި އެވެ.

ކޮމިޓީގެ މަސައްކަތާގުޅޭ އިތުރު ތަފްސީލް ފަހުން ދެވޭނެ ކަމަށް ފައްޔާޒު ވިދާޅުވެފައިވެއެވެ.