އިދިކޮޅު ތިން ރައީސުން ގުޅިގެން ފަށާފައިވާ މަސައްކަތަށް އެއްބާރުލުންދޭން އެމްޑީޕީގެ ގައުމީ މަޖިލީހުން ފާސްކޮށްފި އެވެ.

އެ ނިންމުން ނިންމީ މިއަދު އޮތް އެ ޕާޓީގެ ގައުމީ މަޖިލީހުގެ ބައްދަލްވުމުގަ އެވެ. އެ ބައްދަލްވުމަށް އެކަމާއި ގުޅޭ ގަރާރު ހުށައެޅީ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް އެވެ. އެ ގަރާރަށް ތާއީދު ކުރެއްވީ ހޯރަފުށި ދާއިރާގެ ކުރީގެ މެންބަރު އަހްމަދު ސަލީމް އެވެ.

އެ ގަރާރުގައި ވަނީ ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހާއި ކުރީގެ ރައީސް ޔާމީން އަބްދުލްގައްޔޫމް އެކުގައި ފައްޓަވާފައިވާ މަސައްކަތްތަކަށް އެއްބާރުލުން ދިނުމުގައި އެމްޑީޕީ ދެމި އޮތުމަށެވެ.

ތިން ރައީސުންގެ ތެރެއިން ދެ ރައީސުންނަކީ އެމްޑީޕީއަށް ނިސްބަތްވާ ބޭފުޅުންނެވެ. ރައީސް ނަޝީދުވެސް ބައިވެރިވެވަޑައިގެންނެވި މި ބައްދަލްވުމުގައި ގަރާރު ފާސްކޮށްފައިވަނީ ބައްދަލްވުމުގައި ބައިވެރިވި މެމްބަރުންގެ އިއްތިފާގުންނެވެ.

މަސައްކަތްތައް ކުރިއަށް ގެންދަން ތިން ރައީސުންގެ ފަރާތުން ވަނީ މަންދޫބުން ވެސް ކަނޑައަޅާފަ އެވެ.

އެގޮތުން އައްޔަނު ކުރެވުނު މަންދޫބުންނަކީ؛

ކުރީގެ ރައީސް މުހައްމަދު ނަޝީދުގެ ފަރާތުން އައްޔަނު ކުރެއްވީ:

ރައްޔިތުންގެ މަޖިލީހުގެ ކުރީގެ ނައިބު ރައިސް އީވާ އަބްދުالله  އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް

ކުރީގެ ރައީސް އަބްދުالله ޔާމީންގެ ފަރާތުން އައްޔަނު ކުރެއްވީ:

ޕީއެންއެފްގެ ނައިބު ރައީސް މުހައްމަދު މަލީހު ޖަމާލު

މާލޭގެ މޭޔަރުކަމަށް ވާދަކުރެއްވި އިސްމާއިލް ޒަރިޔަންދު

ކުރީގެ ރައީސް އިބްރާހިމް މުހައްމަދު ސޯލިހްގެ ފަރާތުން އައްޔަނު ކުރެއްވީ:

ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ސަލީމް (ސައްލެ)

ރައްޔިތުންގެ މަޖިލީހުގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)

މަންދޫބުންގެ ކޮމިޓީގެ ފުރަތަމަ ބައްދަލުވުން ވެސް ވަނީ ބާއްވާފަ އެވެ.