އެމެރިކާއާއި އީރާނާ ދެމެދު ސުލްހައިގެ އެއްބަސްވުމަކާ ގާތަށް ދަތުރުކުރަމުންދާ ކަމުގެ އުންމީދުތައް އާވުމާ ގުޅިގެން، ދުނިޔޭގެ ބާޒާރުގައި ތެލުގެ އަގު ފާއިތުވި ދެ ހަފުތާގައި ނުދާ މިންވަރަށް ދަށަށް ހިނގައްޖެއެވެ.

މިއަދު އަލިވިލުނުއިރު ބްރެންޓް ކުރޫޑް ފިއުޗާސްގެ އަގު ވަނީ 4.71 ޑޮލަރު ނުވަތަ 4.55 އިންސައްތަ ދަށަށް ގޮސް، ފީފާއެއް 98.83 ޑޮލަރަށް ތިރިވެފައެވެ. އަދި އެމެރިކާގެ ވެސްޓް ޓެކްސަސް އިންޓަރމީޑިއަޓް (ޑަބްލިއު.ޓީ.އައި) ގެ އަގު 4.57 ޑޮލަރު ނުވަތަ 4.73 އިންސައްތަ ދަށަށް ގޮސް، ފީފާއެއްގެ އަގު ހުރީ 92.03 ޑޮލަރުގައެވެ. މިއީ މޭ މަހުގެ 7 ވަނަ ދުވަހަށްފަހު ތެލުގެ އަގު މިހާ ދަށަށް ދިޔަ ފުރަތަމަ ފަހަރެވެ.

ތެލުގެ އަގަށް މި ބަދަލު އައިސްފައިވަނީ، ހޯމްރޫޒް ކަނޑުއޮޅި އަލުން ހުޅުވާލުމާ ގުޅޭގޮތުން އެމެރިކާއާއި އީރާނާ ދެމެދު ފަހުމުނާމާއެއްގެ ބޮޑުބައި މިހާރު ނިމިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު ބުނުމާ ގުޅިގެންނެވެ. ދުނިޔޭގައި އުފައްދާ ތެލާއި ގޭހުގެ ފަސްބައިކުޅަ އެއްބައި އާންމުކޮށް ދަތުރުކުރަނީ މި ކަނޑުއޮޅިންނެވެ.

ނަމަވެސް، މުހިންމު ބައެއް ކަންކަމުގައި އަދިވެސް ދެ ގައުމުގެ މެދުގައި ހިޔާލުތަފާތުވުންތައް އެބަހުއްޓެވެ. ރައީސް ޓްރަމްޕް އާދިއްތަ ދުވަހު ބުނެފައިވަނީ، މި އެއްބަސްވުމުގެ ކަންކަމުގައި އަވަސް އަރުވާނުލުމަށް އެމެރިކާގެ މަންދޫބުންނަށް އަންގާފައިވާ ކަމަށެވެ.

މިކަމާ ގުޅޭގޮތުން އެމް.އެސް.ޓީ މާކީގެ އެނަލިސްޓް ސައުލް ކަވޮނިކް ބުނީ، ސުލްހައިގެ އެއްބަސްވުމަށް އަދިވެސް ގޮންޖެހުންތަކެއް ހުރި ނަމަވެސް، މިހާރު ފެންނަމުންދާ ކުރިއެރުންތަކުގެ ސަބަބުން ކުރިއަށް އޮތް ތަނުގައި ތެލުގެ އަގަށް ލުޔެއް ލިބިގެންދާނެ ކަމަށެވެ.

އެހެންނަމަވެސް، ތަޖުރިބާކާރުން ލަފާކުރާ ގޮތުގައި ހޯމްރޫޒް ކަނޑުއޮޅިން ތެޔޮ އުފުލާ މިންވަރު އާންމު ހާލަތަކަށް ރުޖޫޢަވުމަށާއި، ހަމަލާތަކުގައި ގެއްލުން ލިބިފައިވާ ތެލާއި ގޭހުގެ ވަސީލަތްތައް މަރާމާތުކޮށް ނިންމުމަށް އަދި މަސްތަކެއް ނަގާނެއެވެ.