އެމެރިކާއާއި އީރާނާ ދެމެދު އުފެދިފައިވާ ނުތަނަވަސްކަމަށް ސުލްހަވެރި ހައްލެއް ހޯދުމުގެ ގޮތުން، ތާރީޚީ 'އިސްލާމްއާބާދު މެމޮރެންޑަމް އޮފް އަންޑަސްޓޭންޑިންގ' (އެމް.އޯ.ޔޫ) އެއްގައި މިއަދު ސޮއިކޮށްފިއެވެ.

ޕާކިސްތާނުގެ ބޮޑުވަޒީރު ޝެހެބާޒް ޝަރީފް މެދުވެރިއެއްގެ ދައުރު އަދާކުރެއްވި މި އެއްބަސްވުމުގައި ދެ ގައުމުގެ ރައީސުން ވަނީ އިލެކްޓްރޯނިކްކޮށް ސޮއިކުރައްވާފައެވެ.

މި އެއްބަސްވުމަށް ވަގުތުން އަމަލުކުރަން ފެށުމަށް ނިންމާފައިވާއިރު، ފުރަތަމަ ފިޔަވަޅެއްގެ ގޮތުން އީރާނުން ވަނީ 'ސްޓްރެއިޓް އޮފް ހޯރްމޫޒް' ވަގުތުން ހުޅުވާލުމަށް އެއްބަސްވެފައެވެ. އޭގެ ބަދަލެއްގެ ގޮތުން އެމެރިކާ އިން ވަނީ އީރާނަށް ކުރިމަތިކޮށްފައިވާ ކަނޑުގެ ބްލޮކޭޑް ނުވަތަ ހުރަސްތައް ވަގުތުން އުވާލުމަށް ނިންމާފައެވެ.

މި ތާރީޚީ ކާމިޔާބީ އިއުލާން ކުރައްވަމުން ބޮޑުވަޒީރު ޝެހެބާޒް ޝަރީފް ވަނީ އެމެރިކާގެ ރައީސް ޑޮނަލްޑް ޓްރަމްޕަށް މަރުހަބާ ދަންނަވާފައެވެ. އަދި އެމެރިކާގެ މަޝްވަރާ ޓީމުގައި ހިމެނޭ ޖޭ.ޑީ ވެންސް، ސްޓީވް ވިޓްކޮފް އަދި ޖެރެޑް ކުޝްނަރ ކުރެއްވި ބުރަ މަސައްކަތް ފާހަގަކުރެއްވިއެވެ.

ހަމައެއާއެކު، އީރާނުގެ އެންމެ މަތީ ވެރިޔާ އާޔަތުالله މުޖުތަބާ ހުސައިނީ ޚާމަނާއީ އަދި ރައީސް މަސްއޫދު ޕެޒެޝްކިއަން ދެއްވި އެއްބާރުލުމަށް ޝަރީފް ޝުކުރު އަދާކުރެއްވިއެވެ. އީރާނުގެ މަޝްވަރާ ޓީމުގައި ހިމެނޭ މުހައްމަދު ބާގިރު ގާލިބާފް، އައްބާސް އަރަގްޗީ އަދި އެސްކަންދަރު މޯމެނީގެ ކެތްތެރިކަމާއި މަސައްކަތްތެރިކަން މި އެއްބަސްވުމާ ހަމައަށް އައުމުގައި މުހިންމު ދައުރެއް އަދާކުރިކަމަށް ބޮޑުވަޒީރު ވިދާޅުވިއެވެ.

މި މަޝްވަރާތައް ކާމިޔާބު ކުރުމުގައި ގަތަރުގެ ލީޑަޝިޕުން ފޯރުކޮށްދިން އެހީތެރިކަމާއި، ސައުދީ އަރަބިއްޔާ، ތުރުކީ އަދި މިސްރުގެ ސަރުކާރުން އަދާކުރި މުހިންމު ދައުރު ބޮޑުވަޒީރު ވަނީ ޚާއްސަ ގޮތެއްގައި ފާހަގަކުރައްވާފައެވެ. މީގެ އިތުރުން، ޕާކިސްތާނުގެ ފީލްޑް މާޝަލް ސައްޔިދު އާސިމް މުނީރު، މި އެއްބަސްވުމަށް މަގުފަހިކޮށްދެއްވުމަށް ކުރެއްވި އިޚްލާޞްތެރި މަސައްކަތަށް ޝަރީފް ތައުރީފު ކުރެއްވިއެވެ.

މި އެއްބަސްވުމަކީ މުޅި ސަރަހައްދުގެ ސުލްހައާއި ހަމަޖެހުމަށް އެޅުނު މުހިންމު ފިޔަވަޅެއް ކަމަށާއި، މީގެ ސަބަބުން ދެ ގައުމުގެ ދެމެދުގައި އޮތް ގުޅުން ރަނގަޅުވެ، ސަރަހައްދީ ފުދުންތެރިކަން އިތުރުވެގެންދާނެ ކަމަށް އުންމީދު ކުރައްވާ ކަމަށް ވެސް ޕާކިސްތާނުގެ ބޮޑުވަޒީރު ވިދާޅުވިއެވެ.