އެމެރިކާ އާއި އީރާނާ ދެމެދު ވަގުތީ ސުލްހައިގެ އެއްބަސްވުމެއްގައި ސޮއިކުރުމާ އެކު ބައިނަލްއަޤުވާމީ ތެލުގެ ބާޒާރުގައި ތެލުގެ އަގު ފީފާއަކުން އެއް ޑޮލަރަށް ވުރެ ބޮޑަށް ވެއްޓިއްޖެއެވެ.

މި އެއްބަސްވުމުގެ ދަށުން އީރާނުގެ ހަނގުރާމަ ނިމުމަކަށް ގެނެސް ހޮރްމޫޒް ކަނޑުއޮޅި އަލުން ހުޅުވައި ތެހެރާނުގެ ތެލާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް ވެސް ވަނީ އުވާލާފައެވެ.

މީގެ ސަބަބުން ތެލުގެ ސަޕްލައި އިތުރުވާނެ ކަމަށް ބެލެވޭއިރު، ބްރެންޓް ކްރޫޑް ފީފާއެއް 1.64 ޑޮލަރު (2.06 ޕަސެންޓް) ދަށަށް ގޮސް 77.91 ޑޮލަރަށް ވަނީ ވެއްޓިފައެވެ. އަދި ޔޫ.އެސް. ވެސްޓް ޓެކްސަސް އިންޓަމީޑިއެޓް 1.80 ޑޮލަރު (2.34 ޕަސެންޓް) ދަށަށް ގޮސް ފީފާއެއް ވަނީ 74.99 ޑޮލަރަށް ވެއްޓިފައެވެ.

އެމެރިކާއާ އީރާނާ ދެމެދު ވެވުނު 14 ނުކުތާގެ އެއްބަސްވުމުގެ ދަށުން 60 ދުވަހުގެ މަޝްވަރާގެ މުއްދަތެއް ފެށޭ އިރު އެ މުއްދަތުގައި ހޮރްމޫޒް ކަނޑުއޮޅިން ޓޯލް ފީ އެއް ނެތި ދަތުރުކުރެވޭ ގޮތް އީރާނުން ހަމަޖައްސައިދޭނެއެވެ. ކަނޑުއޮޅީގެ ޓްރެފިކް 30 ދުވަހުގެ ތެރޭގައި ފުރިހަމަ ކެޕޭސިޓީއަށް އިޔާދަކުރުމަށް ވެސް އެއްބަސްވެފައިވެއެވެ.

އަދި އީރާނުގެ ނިއުކްލިއާ ޕްރޮގްރާމް ފަދަ މައްސަލަތައް ފަސްކޮށްފައިވާ އިރު އީރާނު އިޔާދަކުރުމަށް 300 ބިލިއަން ޑޮލަރުގެ ޕްލޭނެއް އެކުލަވައިލުން ވެސް ހިމެނެއެވެ.

"ހޮރްމޫޒް ހުޅުވާލި ނަމަވެސް، ބާޒާރަށް އަންނަ ތެލުގެ މިންވަރު މަދުވެދާނެ ކަމަޢް ތަޖުރިބާކާރުން ބުނެއެވެ. އޭގެ ސަބަބެއް ކަމުގައި ފާހަގަކޮށްފައިވަނީ ބައެއް ޝިޕްމެންޓުތައް މިހާރު ވެސް އެހެން މަގުތަކުން ފޮނުވާފައިވުމާއި، އެއްބަސްވުން ރޫޅިދާނެ ކަމުގެ ކަންބޮޑުވުމާ ހެދި ބޯޓުތައް އެ ސަރަހައްދަށް ފޮނުވަން ޝިޕް ކުންފުނިތައް ޖެހިލުންވުމެވެ.

"ޖުމްލަ ގޮތެއްގައި ތެލުގެ ޑިމާންޑް ސަޕްލައިއަށް ވުރެ އަވަހަށް އައިސްދާނެ ކަމުން ހަނގުރާމައިގެ ކުރީގައި ހުރި ވަރަށް އަގު ނުވެއްޓިދާނެ" އެނާޖީ ކޮންސަލްޓެންސީ އެކްސްއެނަލިސްޓްސްގެ ސީއީއޯ މުކެޝް ސާހްދެވް ބުންޏެވެ.