ޤަޠަރާއި ޕާކިސްތާނުގެ މެދުވެރިކަމުގައި ސުވިޒަލެންޑުގެ ބާގެންސްޓޮކްގައި ބޭއްވި އީރާނާއި އެމެރިކާގެ ފުރަތަމަ މަތީ ފެންވަރުގެ ކޮމިޓީ ބައްދަލުވުން ކާމިޔާބުކަމާ އެކު ނިންމާލައިފިއެވެ.
ޤަޠަރާއި ޕާކިސްތާނުން ނެރުނު ގުޅިފައިވާ ބަޔާނުގައިވާ ގޮތުން ލޭކް ލޫސާން ސަމިޓުގެ ނަމުގައި ބޭއްވި މި މަޝްވަރާތައް ކުރިއަށް ދިޔައީ އިސްލާމްއާބާދު އެއްބަސްވުމުގެ އޮނިގަނޑުގެ ތެރެއިންނެވެ. މި ބައްދަލުވުންތައް ކުރިއަށް ދިޔައީ ޕޮޒިޓިވް އަދި ބިނާކުރަނިވި މާހައުލެއްގައި ކަމަށާއި ކުރިއެރުންތަކެއް ހާސިލްކުރެވިފައިވާ ކަމަށް އެ ބަޔާނުގައި ބުނެފައިވެއެވެ.
މި މަޝްވަރާތަކުގައި ދެ ފަރާތުން ވަނީ މަތީ ފަންތީގެ ކޮމިޓީއެއް އެކުލަވައިލަން އެއްބަސްވެފައެވެ. އެ ކޮމިޓީގެ ދަށުން ނިއުކްލިއާ މައްސަލައާއި ދަތިކުރުމުގެ ފިޔަވަޅުތަކާ ބެހޭ ވޯކިން ގްރޫޕްތައް ހިންގާނެއެވެ. އަދި އެއްބަސްވުން ތަންފީޒުވާ މިންވަރު ބެލުމަށް މޮނިޓަރިން އެންޑް ޑިސްޕިއުޓް ރެޒޮލިއުޝަން ގްރޫޕެއް ވެސް ގާއިމުކުރެވޭނެ ކަމަށް ބަޔާނުގައިވެއެވެ.
ގުޅިފައިވާ ބަޔާނުގައިވާ ގޮތުން 60 ދުވަހުގެ ތެރޭގައި ފައިނަލް އެއްބަސްވުމަކާ ހަމައަށް ވާސިލުވުމަށް މަގުޗާޓެއް އެކުލަވައިލެވިފައިވެއެވެ. އޭގެ އިތުރުން ހޮރްމޫޒް ކަނޑުއޮޅިން ވިޔަފާރީ އުޅަނދުފަހަރު ސަލާމަތްތެރިކަމާ އެކު ދަތުރުކުރެވޭނެ ގޮތް ހެދުމަށް ދެ ފަރާތުގެ މެދުގައި މުވާސަލާތީ ޗެނަލެއް ވެސް ވަނީ ގާއިމުކޮށްފައެވެ. ހަމައެއާ އެކު ލުބުނާނުގައި އަސްކަރީ އޮޕަރޭޝަންތައް ހުއްޓައިލުން ކަށަވަރުކުރުމަށް ޑީ-ކޮންފްލިކްޝަން ސެލެއް އުފެއްދުމަށް ވެސް ދެ ފަރާތުން ވަނީ އެއްބަސްވެފައެވެ.
ޓެކްނިކަލް މަޝްވަރާތައް ބާގެންސްޓޮކް ރިސޯޓުގައި ހަފުތާ ނިމެންދެން ކުރިއަށް ދާނެ ކަމަށް އެ ބަޔާނުގައި ބުނެފައިވެއެވެ.
މެދުވެރިންގެ ގޮތުގައި ހަރަކާތްތެރިވާ ޤަޠަރާއި ޕާކިސްތާނުން ވަނީ ޑިޕްލޮމެސީ އާއި ސުލްހަވެރި ހައްލަކަށް އީރާނާއި އެމެރިކާއިން ދޭ ސަމާލުކަމަށް ޝުކުރު އަދާކޮށް މަޝްވަރާތައް ބިނާކުރަނިވި މާހައުލެއްގައި ކުރިއަށް ގެންދިއުމަށް އެންމެ ފުރިހަމައަށް މަސައްކަތް ކުރާނެ ކަމުގެ ޔަގީންކަން ދީފައެވެ.
Advertisement
This content is created and paid for by advertisers and does not involve Voice Journalists
