ވަރލްޑްކަޕް ނޮކްއައުޓް ބުރުގައި މިއަދު ނެދަލޭންޑްސް އާއި މޮރޯކޯ ބައްދަލުކުރިމެޗް ޕެނަލްޓީ ޖަހައިެގން މޮރޯކޯ ކާމިޔާބުކޮށް ގަދަ 16 އަށް ދަތުރުކޮށްފިއެވެ.

މިމެޗުގެވެސް ނަތީޖާ ނެރެފައިވަނީ މެޗްގެ ފުރިހަމަ ވަގުތާއި އިތުރުވަގުތުގެ ކުޅުން ނިމުނުއިރު، 1-1 ގެ ނަތިޖާގައި ދެޓީމް އެއްވަރުވުމުންނެވެ. މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ ނެދަލޭންޑުންނެވެ. ނެދަލެންޑްސް އިން ފުރަތަމަ ލަނޑު ޖަހައި ކުރިހޯދީ 72 ވަނަ މިނެޓުގައެވެ. މިއީ ސަމަވިލް ތަނަވަސްކޮށްދިން ފުރުސަތަކުން ކޯޑީ ގަކްޕޯ ކާމިޔާބުކުރި ލަނޑެކެވެ.

ނެދަލޭންޑުން ލަނޑެއް ޖަހާފައިވަނިކޮށް މޮރޯކޯއިން އެއްވަރުކުރީ 90 ވަނަ މިނެޓުގައި އީސާ ދިއޮޕް ބޮލުން ފޮނުވާލި ބޯޅައަކުންނެވެ. 

އިތުރު ވަގުތުގެ 30 މިނެޓުގެ ތެރޭގައި މޮރޮކޯއަށް ލަނޑު ޖަހާނެ ރަނގަޅު ފުރުސަތެއް ލިބި ވަނީ ބޭނުންނުކުރެވި ގޮސްފައެވެ. އެގޮތުން ސުފިޔާން ރަހީމީ ނެދަލެންޑްސްގެ ކީޕަރު ބާޓް ވަރްބްރޫގެންއާ ވަނީ ވަރަށް ހުށިޔާރުކަމާއެކު ދިފާއުކޮށްފައެވެ. މިއީ މިހާތަނަށް މި މުބާރާތުގައި ފެނިގެންދިޔަ އެންމެ މޮޅު ސޭވްކަމަށް ގިނަ ބަޔަކު އަންނަނީ ބުނަމުންނެވެ.

ޕެނަލްޓީ ޖަހައިގެން މޮރޯކޯ މެޗް ކާމިޔާބުކުރީ 3-2 ގެ ނަތީޖާއިންނެވެ. މުބާރާތުގައި މޮރޯކޯ ދެން ނިކުންނާނީ، އަންނަ ހޮނިހިރުދުވަހު، ކެނެޑާ އާ ދެކޮޅަށެވެ.