މި އަހަރުގެ މޭ މަހު މުދަލު ޒަކާތުގެ ގޮތުގައި މޯލްޑިވްސް ޒަކާތު ހައުސްއަށް ޖުމުލަ 7,587,956.14 ރުފިޔާ ބަލައިގަނެ ޒަކާތު ފަންޑުން އެހީތަކާއި މަޝްރޫޢުތަކަށް 2,685,834.30 ރުފިޔާ ދޫކޮށްފައިވާ ކަމަށް އެ އިދާރާއިން ހާމަކޮށްފިއެވެ.

ޒަކާތު ހައުސްއިން ބުނި ގޮތުގައި 2025 ވަނަ އަހަރުގެ މޭ މަހު ޒަކާތުގެ ގޮތުގައި ލިބިފައިވަނީ 4.33 މިލިއަން ރުފިޔާ ކަމަށްވާއިރު މި އަހަރުގެ މޭ މަހު އެ ޢަދަދު 7.59 މިލިއަން ރުފިޔާއަށް އިތުރުވެފައިވެއެވެ. މިއީ 75.3 އިންސައްތައިގެ ކުރިއެރުމެކެވެ. ޒަކާތް ދެއްކި މިންވަރު މިހާ ބޮޑަށް އިތުރުވުމަކީ ރަސްމީ ނިޒާމުގެ ތެރެއިން ޒަކާތް ދެއްކުމަށް ޢާންމުން ހޭލުންތެރިވަމުންދާ ކަމުގެ ހެއްކެއް ކަމަށް އެ އިދާރާއިން ބުނެފައިވެއެވެ.

ޒަކާތު ފަންޑުން ދޫކުރި ފައިސާގެ އެންމެ ބޮޑު ބައެއް ޚާއްޞަކޮށްފައިވަނީ ފަޤީރުންނާއި މިސްކީނުންގެ ބަޔަށެވެ. އެ ބަޔަށް ޖުމުލަ 1,483,960.50 ރުފިޔާ ދޫކޮށްފައިވާއިރު އޭގެ ތެރެއިން 1,452,960.50 ރުފިޔާ ހޭދަކޮށްފައިވަނީ ބޭސްފަރުވާގެ އެހީއަށެވެ. ދިރިއުޅުމުގެ ޒަރޫރީ ބޭނުންތައް ފުއްދުމަށް ދަތިވެފައިވާ ފަރާތްތަކަށް 31,000 ރުފިޔާ ދޫކޮށްފައިވެއެވެ. ޒަކާތު ފަންޑުން ދޫކުރި ޖުމުލަ ފައިސާގެ ގާތްގަނޑަކަށް ހަތަރުބައިކުޅަ ތިންބައި ހޭދަކޮށްފައިވަނީ ބޭސްފަރުވާގެ އެހީއަށް ކަމަށް އެ އިދާރާއިން ބުނެފައިވެއެވެ.

ފީސަބީލިﷲ ބައިން ތަޢުލީމީ ދީނީ އަދި ޢިލްމީ މަސައްކަތްތަކަށް ޖުމުލަ 1,037,236.42 ރުފިޔާ ހޭދަކޮށްފައިވެއެވެ. މީގެ ތެރޭގައި ޤުރުއާން ހިތުދަސްކުރުމުގެ ޕްރޮގްރާމްތަކަށާއި ޤުރުއާނުގެ ޢިލްމު ފެތުރުމަށް 753,239.02 ރުފިޔާ އިސްލާމީ ފޮތްތައް ތަރުޖަމާކުރުމަށް 246,989.40 ރުފިޔާ އަދި މަތީ ތަޢުލީމު ޙާޞިލުކުރާ ފަރާތްތަކަށް 37,008 ރުފިޔާ ހިމެނެއެވެ.

މި ހިސާބުތައް ތައްޔާރުކޮށްފައިވަނީ ފިނޭންސް މިނިސްޓްރީގެ އެސް.އޭ.ޕީ ސިސްޓަމުގެ ރެކޯޑުތަކަށް ބިނާކޮށް ކަމަށާއި ފަހުން ލިބޭ މަޢުލޫމާތާ ގުޅިގެން ހިސާބުތަކަށް ބަދަލު އައުމަކީ އެކަށީގެންވާ ކަމެއް ކަމަށް ޒަކާތު ހައުސްއިން ފާހަގަކޮށްފައިވެއެވެ.