ވޯލްޑް ކަޕް ގްރޫޕް ސްޓޭޖުން އުރުގުއާއީ ކެޓުމާ އެކު އެ ޓީމު އަނބުރާ ޤައުމަށް ގެންދިޔުމަށް ހަމަޖެއްސި ޗާޓާ ފްލައިޓް އެ ޤައުމުގެ ފުޓުބޯޅަ ފެޑެރޭޝަނުން ކެންސަލްކޮށްފައިވާ ކަމަށް އުރުގުއާއީ މީޑިއާތަކުން ރިޕޯޓްކޮށްފިއެވެ.

މެކްސިކޯގެ ޕްލާޔާ ޑެލް ކާމެންގައި ހުންނަ ޓީމުގެ ޓްރެއިނިން ބޭސް އިން ވެރިރަށް މޮންޓެވީޑިއޯ އަށް ދަތުރުކުރުމަށް ތާވަލުކޮށްފައި އޮތް ޗާޓާ ފްލައިޓް ކެންސަލްކުރުމާ ގުޅިގެން ކުޅުންތެރިންނަށް ޖެހުނީ ކޮމާޝަލް ފްލައިޓްތަކުގައި ޤައުމަށް ދަތުރުކުރާށެވެ.

ފީފާ ރޭންކިންގެ 16 ވަނައިގައި އޮތް އުރުގުއާއީ އަކީ ވޯލްޑް ކަޕްގެ ދެވަނަ ބުރަށް ނުގޮސް ކެޓި ޓީމުތަކުގެ ތެރެއިން ރޭންކިން އެންމެ މަތީ ޓީމެވެ. ގްރޫޕް އެޗްގެ ފުރަތަމަ މެޗުގައި ސައޫދީ އަރަބިއާއާ ދެކޮޅަށް 1-1 އިން އެއްވަރުވީ ފަހުން ނެގި ލީޑެއް ގެއްލި ވޯލްޑް ކަޕަށް އަލަށް ކޮލިފައިވި ކޭޕް ވާޑޭއާ 2-2 އިން އެއްވަރުވިއެވެ. ގްރޫޕް ސްޓޭޖުގެ ފަހު މެޗުގައި ގޯލްކީޕަރަށް ހެދުނު ގޯހެއްގެ ސަބަބުން ސްޕެއިން އަތުން 1-0 އިން ބަލިވީއެވެ.

ތިން މެޗުގައި ވެސް ބެންޗުގައި އިން އުރުގުއާއީ ކެޕްޓަން ހޮސޭ މާރީއާ ހިމެނޭޒް އުރުގުއާއީގެ ޓެންފީލްޑަށް ދިން އިންޓަވިއުގައި ބުނީ ބަލިވުމުން ލިބުނީ ފުން ހިތާމައެއް ކަމަށެވެ.

"ތަދު ވަރަށް ބޮޑު. ހިތުގައި އުފެދެނީ ވަރަށް ފުން ހިތާމައެއް. ކުރިމަތިލާން ޖެހިފައިވާ ޙަޤީޤަތް ނުހަނު ދަތި. އުރުގުއާއީ ރައްޔިތުންގެ ކިބައިން މާފަށް އެދެން. އެންމެން ވެސް އުންމީދުކުރި ކަހަލަ ނަތީޖާއެއް ނޫން ނެރެވުނީ އެކަމަކު ފުޓުބޯޅައަކީ މިކަހަލަ ކަމެއް ޤަބޫލުކުރަން ޖެހޭ" ކަމަށެވެ.

"އުރުގުއާއީ ފުޓުބޯޅައަށް އަހަރެން ދޫކޮށްލާ އެއްޗަކީ ހަމަ ސުމެއް. ކޮންކަމެއް ކޯޗަކަށް ކޮށްދެވޭނީ ތިން އަހަރު މަސައްކަތް ކުރި ޤައުމެއްގެ ފުޓުބޯޅައަށް ނަތީޖާ ނުނެރެވިއްޖެ ނަމަ ދުވަހަކު ވެސް ހަމަޖެހިނުލެވޭ. ކޮލިފައިންގައި ހަތަރު ވަނައިގައި ނިންމުމުން އެއްވެސް އެއްޗެއް ނުލިބޭ ކޮޕާ އެމެރިކާގެ ތިން ވަނައިން ވެސް އެއްވެސް އެއްޗެއް ނުލިބޭ" ސްޕެއިން މެޗަށް ފަހު ކޯޗު މާސެލޯ ބިއެލްސާ ބުންޏެވެ.