މާލެ ސަރަހައްދުގައި މިނިވަން 60 ފާހަގަކުރަން ސަރުކާރުން 4.1 މިލިއަން ރުފިޔާ ޚަރަދުކޮށްފައިވާ ކަމަށް ޘަޤާފަތާ ބެހޭ ވަޒީރު ހީނާ ވަޒީރު ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) ވަނީ، މިދިޔަ އަހަރު މިނިވަން 60 ގެ ހަރަކާތްތައް ފާހަގަކުރުމަށް ޖުމުލަ ޚަރަދު ކުރި މިންވަރާއި، މާލޭގެ އިތުރުން އަތޮޅު ތެރޭގައި އެދުވަސް ފާހަގަކުރަން މިނިސްޓްރީން ޚަރަދު ކުރިތޯއާއި ކުރި ނަމަ އެ ޚަރަދުގެ ތަފުސީލަށް އެދިވަޑައިގެން ވަޒީރު ހީނާއާ ސުވާލު ކުރައްވާފައެވެ.

ސުވާލަށް ޖަވާބު ދެއްވަމުން ހީނާ ވިދާޅުވީ، މާލެ ސަރަހައްދުގައި މިނިވަން 60 ފާހަގަކުރުމަށް ޘަޤާފަތާބެހޭ ވުޒާރާއިން 4.1 މިލިއަން ޚަރަދުކޮށްފައިވާ ކަމަށެވެ. 

އަދި މާލެ ފިޔަވައި އަތޮޅު ތެރޭގެ އެއްވެސް ރަށެއްގައި އެ ވުޒާރާއިން މިނިވަން 60 ފާހަގަކޮށްފައި ނުވާ ކަމަށާ އެހެން ކަމުން އެކަމަށް އަތޮޅު ތެރޭގެ އެއްވެސް ރަށަކަށް ޚަރަދެއް ކޮށްފައި ނުވާ ކަމަށް ހީނާ ވިދާޅުވިއެވެ.

ރާއްޖޭގެ މިނިވަންކަމަށް 60 އަހަރު ފުރުމުގެ މުނާސަބަތުގައި ޖުމްހޫރީ މައިދާނުގައި ހެވިކަމުގެ ހަރަކާތާއި ކުޅިވަރުތަކެއް ބާއްވާފައިވާއިރު މި ހަރަކާތް ބައްލަވައިލެއްވުމަށް އިންޑިއާގެ ބޮޑުވަޒީރު ނަރެންދުރަ މޯދީ ވެސް ރާއްޖެ ވަޑައިގެންނެވެ.

މި ޙަރާކާތުގެ އިތުރުން ފުޅަނދުބުރުވެސް މާލޭގައި ބޭއްވިއެވެ.