އޮސްޓްރޭލިއާގެ ކޮންސިއުމާ ވޮޗްޑޮގް، އޮސްޓްރޭލިއަން ކޮމްޕެޓިޝަން އެންޑް ކޮންސިއުމާ ކޮމިޝަން (އޭސީސީސީ) އިން ދުނިޔޭގެ އެންމެ ބޮޑު އެއް އީ-ކޮމާސް ކުންފުނި ކަމަށްވާ އެމެޒޯންއާ ދެކޮޅަށް ފެޑަރަލް ކޯޓުގައި ދައުވާކޮށްފިއެވެ.

މި ދައުވާ އުފުލާފައިވަނީ އެމެޒޯންގެ "ޕްރައިމް ވީޑިއޯ" ޚިދުމަތުގައި އިޝްތިހާރު ހިމަނައި، ކުރިން ސަބްސްކްރައިބްކޮށްފައި ތިބި މީހުންނަށް އިޝްތިހާރު ނުފެންނަ ގޮތް ހެދުމަށް އިތުރު ފައިސާ ދައްކަން މަޖުބޫރުކުރުވި މައްސަލައިގައެވެ.

އޭސީސީސީން އަންގާރަ ދުވަހު ހާމަކުރި ގޮތުގައި، ނޮވެމްބަރު 2023 އާއި އޯގަސްޓް 2025 އާ ދެމެދު އެއް މިލިއަނަށްވުރެ ގިނަ ކަސްޓަމަރުންނާއެކު އެމެޒޯންއިން ވެފައިވާ އެއްބަސްވުންތަކުގައި ކަސްޓަމަރުންނަށް ގެއްލުންވާ ފަދަ އުސޫލުތަކެއް ހިމަނާފައިވެއެވެ. މިކަމުގެ ސަބަބުން ކޮންސިއުމާ ޕްރޮޓެކްޝަން ގާނޫނާ އެމެޒޯންއިން ޚިލާފުވެފައިވާ ކަމަށް އެ ކޮމިޝަނުން ތުހުމަތުކުރެއެވެ.

މި މައްސަލައާ ގުޅޭގޮތުން އޭސީސީސީގެ މުގައްރިރު ޖީނާ ކެސް-ގޮޓްލީބް ވިދާޅުވީ، އިޝްތިހާރު ބަލަން ބޭނުންނުވާ ކަސްޓަމަރުންނަށް، ކުރިން އެމީހުން ޚިދުމަތް ހޯދަން ފެށި އިރު އޮތް ފެންވަރުގައި ޚިދުމަތް ހޯދުމަށްޓަކައި އިތުރު ފައިސާ ދެއްކުން ނޫން ގޮތެއް އެމެޒޯންއިން ބާއްވާފައި ނުވާ ކަމަށެވެ.

އެމެޒޯންއިން 2018 ވަނަ އަހަރު އޮސްޓްރޭލިއާގައި ޚިދުމަތް ދޭން ފެށި އިރު، ޕްރައިމް ވީޑިއޯއަކީ އެއްވެސް އިޝްތިހާރެއް ނުހިމެނޭ ޚިދުމަތެކެވެ. ނަމަވެސް، 2024 ވަނަ އަހަރުގެ ކުރީކޮޅު އެމެޒޯންއިން މި ޚިދުމަތުގައި އިޝްތިހާރު ހިމަނަން ފެށިއެވެ. އަދި އޮސްޓްރޭލިއާގެ ކަސްޓަމަރުން އިޝްތިހާރު ނުފެންނަ ގޮތް ހެދުމަށް މަހަކު 12.99 އޮސްޓްރޭލިއަން ޑޮލަރު ދައްކަން ޖެހޭ ގޮތަށް އަގު ބޮޑުކުރިއެވެ.

އޭސީސީސީން ފާހަގަކުރި ގޮތުގައި، މި ބަދަލު ގެނައި އިރު ގާތްގަނޑަކަށް 850,000 މީހުން ތިބީ މުޅި އަހަރަށް ފައިސާ ދައްކައިގެން ޚިދުމަތް ހޯދާފައެވެ. އެމެޒޯންއިން ކަސްޓަމަރުންނާއެކު ވެފައިވާ އެއްބަސްވުންތަކުގައި، ކަސްޓަމަރުންނަށް އެއްވެސް ބަދަލެއް ނުދީ ޚިދުމަތަށް ބޮޑެތި ބަދަލުތައް ގެނައުމުގެ ބާރު އެމެޒޯންއަށް ލިބިދޭ ފަސް މާއްދާއެއް ހިމަނާފައިވާ ކަމަށްވެސް އެ ކޮމިޝަނުން ބުނެފައިވެއެވެ.

މި މައްސަލައާ ގުޅިގެން އެމެޒޯންގެ ތަރުޖަމާނަކު ބީބީސީއަށް މައުލޫމާތު ދެމުން ވިދާޅުވީ، އޭސީސީސީން ހުށަހަޅާފައިވާ މައްސަލަ ވަރަށް ތަފްސީލީ ގޮތެއްގައި ދިރާސާކުރަމުންދާ ކަމަށެވެ. އަދި ތަހުގީގުގެ މަރުހަލާގައި އެ ކޮމިޝަނަށް އެއްބާރުލުން ދީފައިވާނެ ކަމަށާއި، އޮސްޓްރޭލިއާގެ ކަސްޓަމަރުންނަށް އެންމެ ރަނގަޅު ޚިދުމަތް ދިނުމުގައި އެ ކުންފުނި ދެމިއޮންނާނެ ކަމަށްވެސް އޭނާ ވިދާޅުވިއެވެ.

އެމެޒޯންއިން ކަސްޓަމަރުންނާ މެދު އަމަލުކުރާ ގޮތާ މެދު މީގެ ކުރިންވެސް އެމެރިކާ އަދި އިނގިރޭސިވިލާތް ފަދަ ގައުމުތަކުގައި ފިޔަވަޅުތައް އަޅައި، ތަހުގީގުތައް ހިންގާފައިވެއެވެ. އެގޮތުން އެމެރިކާގެ ފެޑަރަލް ޓްރޭޑް ކޮމިޝަން (އެފްޓީސީ) އިންވެސް ވަނީ އެމެޒޯންއާ ދެކޮޅަށް ގާނޫނީ ފިޔަވަޅުތައް އަޅާފައެވެ.