ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އިންތިޒާމުކޮށްގެން ބާއްވާ ބައިނަލްއަޤްވާމީ "ތެވެލި" ކޮންފަރެންސަށް މިއަހަރު ރެކޯޑް އަދަދަކަށް ދިރާސާ ކަރުދާސް ހުށަހަޅައިފިއެވެ.

އަންނަ އޮގަސްޓް މަހުގެ 17 އިން 19 އަށް ބޭއްވުމަށް ހަމަޖެހިފައިވާ މި ކޮންފަރެންސަށް ދިރާސާ ކަރުދާސް ހުށަހެޅުމުގެ ސުންގަޑި ހަމަވިއިރު ޖުމްލަ 330 ކަރުދާސް ވަނީ ލިބިފައެވެ. މިއީ ރާއްޖޭގައި ބޭއްވޭ މިފަދަ ޢިލްމީ ބައްދަލުވުމަކަށް މިހާތަނަށް އެންމެ ގިނަ އަދަދަކަށް ކަރުދާސް ހުށަހެޅުނު ފަހަރެވެ.

މި އަހަރުގެ ކޮންފަރެންސަށް ހުށަހެޅި ކަރުދާސްތަކުގެ ތެރޭގައި ރާއްޖެއިން ބޭރުގެ 23 ޤައުމަކުން ހުށަހެޅި 77 ދިރާސާއެއް ހިމެނެއެވެ. "ތެވެލި 2026" ގެ ޝިއާރަކީ "ޓްރާންސްފޯމޭޓިވް އިނޮވޭޝަން އިން ދަ ޓުވެންޓީފަސްޓް ސެންޗަރީ: ސައިންސް، ޓެކްނޮލޮޖީ އެންޑް ސޮސައިޓީ" އެވެ. މި ކޮންފަރެންސްގެ ތެރެއިން އޮގަސްޓް 17 ވަނަ ދުވަހު އެމްއެންޔޫގެ ބެޗްލާސް ޑިގްރީ ދަރިވަރުންނަށް ޚާއްޞަ "އަންޑަރގްރެޖުއޭޓް ސްޓޫޑެންޓް ރިސާޗް ސިމްޕޯޒިއަމް" އެއް ބޭއްވުމަށް ވަނީ ހަމަޖެހިފައެވެ.

އަދި އޮގަސްޓް 20 ވަނަ ދުވަހު "ޕޯސްޓް-ކޮންފަރެންސް ވޯކްޝޮޕް" ތައް ކުރިއަށްދާނެއެވެ.

މި ކޮންފަރެންސްގެ މައިގަނޑު މަޤްޞަދަކީ ދިރާސާތަކުގެ އަލީގައި ސިޔާސަތުތައް ބިނާކުރުމަށް މަގުފަހިކޮށްދިނުމާއި، ރާއްޖޭގެ މަތީ ތަޢުލީމީ ނިޒާމަކީ ޢިލްމީ ހޯދުންތަކުގެ މައްޗަށް ބިނާވެފައިވާ ނިޒާމަކަށް ހެދުމެވެ. މީގެ އިތުރުން، އެމްއެންޔޫއަކީ އައު ޢިލްމު އުފައްދައި ކުރިއަރުވާ ތަނަކަށް ހެދުމާއި، ޤައުމީ ފެންވަރުގައި ނިންމާ މުހިންމު ނިންމުންތަކަކީ ޢިލްމީ ދިރާސާތަކަށް ބިނާކޮށް ނިންމާ ނިންމުންތަކަކަށް ހެދުމުގައި އެހީތެރިވުން ހިމެނެއެވެ.

މި އަހަރުގެ ކޮންފަރެންސްގައި ކަރުދާސް ހުށަހެޅޭ ދާއިރާތަކުގެ ތެރޭގައި ތިމާވެއްޓާއި މޫސުމީ ބަދަލުތައް، އައު އީޖާދުތަކާއި ޓެކްނޮލޮޖީ، ސައިންސާއި ޞިއްޙީ ދާއިރާ، ދުނިޔޭގެ މަސްލަހަތާއި ސުލްހަ، ތަޢުލީމީ ދާއިރާ، އަންހެނުންނާއި ފިރިހެނުންގެ ހަމަހަމަކަން، އިގްތިޞާދާއި މާކެޓް، އަދި އާޓިފިޝަލް އިންޓެލިޖެންސް ފަދަ މުހިންމު ދާއިރާތައް ހިމެނެއެވެ. މި ކޮންފަރެންސްގައި އިނގިރޭސި، ދިވެހި އަދި ޢަރަބި ބަހުން ކަރުދާސް ހުށަހެޅުމުގެ ފުރުޞަތު ވަނީ ހުޅުވާލާފައެވެ.

ކޮންފަރެންސްގެ މުހިންމު ބައެއް ތާރީޚުތަކަށް ބަލާއިރު:

އާލީ ބާޑް ރެޖިސްޓްރޭޝަން: ޖުލައި 5 ގެ ނިޔަލަށް

ޕްރެޒެންޓޭޝަން ހުށަހެޅުން: ޖުލައި 30 ގެ ނިޔަލަށް

ބައިވެރިންގެ ރެޖިސްޓްރޭޝަން: އޮގަސްޓް 5 ގެ ނިޔަލަށް

ޕޯސްޓަރ ހުށަހެޅުން: އޮގަސްޓް 13 ގެ ނިޔަލަށް

"ތެވެލި 2026" ގައި ފާހަގަކޮށްލެވޭ ހަތަރު ދާއިރާއަކުން އެވޯޑް ދިނުމަށް ވަނީ ހަމަޖެހިފައެވެ. އެއީ އެންމެ ފާހަގަކޮށްލެވޭ ކަރުދާސް (OPC)، އާލީ ކެރިއާ ރިސާޗަރ (ECR)، އަންޑަރގްރެޖުއޭޓް ރިސާޗް އެކްސެލެންސް (URE) އަދި ބެސްޓް ފެކަލްޓީ އެވޯޑް (BFA) އެވެ.

ކޮންފަރެންސް އާ ގުޅޭ އިތުރު މަޢުލޫމާތު https://mnu.edu.mv/research-development/theveli-international-conference-2026/ ލިބިވަޑައިގަންވާނެއެވެ