ފީފާ ވޯލްޑް ކަޕްގެ ގަދަ 16 ގައި ނޯވޭ އަތުން 2-1 އިން ބްރެޒިލް ބަލިވެ މުބާރާތުން ކެޓުމާއެކު، އެ ޤައުމުގެ އެންމެ ފާހަގަކޮށްލެވޭ ފުޓުބޯޅަ ތަރި ނޭމާ ބައިނަލްއަޤްވާމީ ފުޓުބޯޅައިން ރިޓަޔަރކުރިކަން އިޢުލާންކޮށްފިއެވެ.

އާދީއްތަ ދުވަހު އެމެރިކާގެ ނިއުޖާޒީގައި ހުންނަ މެޓްލައިފް ސްޓޭޑިއަމްގައި ކުޅުނު މި މެޗަށްފަހު ނޫސްވެރިންނާ ވާހަކަދައްކަމުން ނޭމާ ބުނީ އޭނާ ވަރަށް ބޮޑަށް މަސައްކަތްކުރި ކަމަށެވެ.

"އަހަރެން މަސައްކަތްކުރިން. ވަރަށް މަސައްކަތްކުރިން. އަހަރެންގެ ކެރިއަރު ފެށުނީ މި ސްޓޭޑިއަމްގައި، އަދި ނިންމާލަން މިޖެހުނީވެސް ހަމަ މިތަނަށް. މިހާރު ހުރިހާ ކަމެއް ނިމިއްޖެ،" ވަރަށް އަސަރާއެކު ނޭމާ ބުންޏެވެ.

މެޗު ނިމުމާއެކު ނޭމާ ވަނީ ދަނޑުމަތީގައި ރޮމުން ކަކޫޖަހާފައެވެ. އެ ވަގުތު އޭނާގެ ޓީމު ކުޅުންތެރިން ވަނީ އޭނާގެ ކައިރިއަށް ގޮސް ހިތްވަރުދީފައެވެ.

އުމުރުން 34 އަހަރުގެ ނޭމާ ވަނީ މި މެޗުގެ އިތުރު ވަގުތުގެ 10 ވަނަ މިނެޓުގައި ލިބުނު ޕެނަލްޓީއަކުން ބްރެޒިލްގެ ހަމައެކަނި ލަނޑު ކާމިޔާބުކޮށްދީފައެވެ. ނަމަވެސް މި ލަނޑާއެކުވެސް ބްރެޒިލް މުބާރާތުގައި ކުރިއަށްދެވޭ ގޮތެއް ނުވިއެވެ. މިއީ ނޯވޭގެ ފުޓުބޯޅަ ތާރީޚުގައި ވޯލްޑް ކަޕްގެ ކުއާޓާ ފައިނަލަށް އެ ޤައުމު ދަތުރުކުރި ފުރަތަމަ ފަހަރެވެ.

ނޭމާ ބައިނަލްއަޤްވާމީ ފުޓުބޯޅައިން ވަކިވީ ބްރެޒިލްގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑާއެކުގައެވެ. އޭނާ ވަނީ ބްރެޒިލްގެ ޤައުމީ ޓީމަށް ކުޅުނު 130 މެޗުން 80 ލަނޑު ޖަހާފައެވެ. 2009 ވަނަ އަހަރު ސަންޓޯސް އެފްސީން ފްރޮފެޝަނަލް ކެރިއަރު ފެށި ނޭމާ، ބްރެޒިލްގެ ސީނިއާ ޓީމަށް ފުރަތަމަ ކުޅުނީ 2010 ވަނަ އަހަރުގެ އޮގަސްޓް މަހުގެ 9 ވަނަ ދުވަހު، މިހާރު އޭނާ ކެރިއަރު ނިންމާލި މެޓްލައިފް ސްޓޭޑިއަމްގައި އެމެރިކާއާ ދެކޮޅަށް ކުޅުނު އެކުވެރިކަމުގެ މެޗެއްގައެވެ. އޭނާގެ ބައިނަލްއަޤްވާމީ ކެރިއަރުގެ އެންމެ ބޮޑު ކާމިޔާބީއަކީ 2016 ވަނަ އަހަރު ބްރެޒިލްއަށް ހޯދައިދިން އޮލިމްޕިކް ރަން މެޑަލްއެވެ.

މި ފަހަރުގެ މުބާރާތުގައި ނޭމާގެ ފަޔަށް ލިބިފައިވާ އަނިޔާއެއްގެ ސަބަބުން، ބްރެޒިލް ކުޅުނު ފަސް މެޗުގެ ތެރެއިން އޭނާއަށް ކުޅެވުނީ އެންމެ ދެ މެޗުގައެވެ. ފާއިތުވި ދިހަވަރަކަށް އަހަރު ބްރެޒިލްގެ އެންމެ މުހިންމު ކުޅުންތެރިޔާގެ ގޮތުގައި ފާހަގަކުރެވުނު ނޭމާއަށް، ފަހަކަށް އައިސް ކުރިމަތިވި އަނިޔާގެ މައްސަލަތަކުގެ ސަބަބުން އޭނާގެ ފުރިހަމަ ކުޅުން ދެއްކުމަށް ވަނީ ހުރަސްތަކެއް ކުރިމަތިވެފައެވެ.

ބްރެޒިލްގެ ކެޕްޓަން މާކީނިއޯސް ބުނީ، މިހާރު މި އޮތީ ބްރެޒިލްގެ ފުޓުބޯޅަ އައު ޖީލަކާ ޙަވާލުވާންވީ ވަގުތު ކަމަށެވެ. އަދި އައު ކުޅުންތެރިންނަށް ކެތްތެރިކަމާއެކު ސަޕޯޓް ދިނުމަށް އޭނާ ސަޕޯޓަރުންގެ ކިބައިން އެދުނެވެ.