އެމްޑީޕީގެ ވެރިކަމުގައި، ޓީޗަރުންގެ ޕޭ ފްރޭމްވޯކަށް ބަދަލުގެނެސް އެކުލަވާލާފައި އޮތް ގޮތުން، ޑިގްރީ ކިޔަވައިގެން ހުންނަ ޓީޗަރެއްގެ މުސާރައަށްވުރެ މާސްޓާސް ކިޔަވައިގެން ހުންނަ ޓީޗަރެއްގެ މުސާރަ ކުޑަވާ ކަމަށް ތަޢުލީމާ ބެހޭ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.
މުދައްރިސުންނަކީ ޤައުމު ބިނާކުރާ މޭސްތިރިން ކަމަށެވެ. އެހެންކަމުން، މުސާރައާއި އިނާޔަތްތަކާއި ޙައްގުތައްވެސް އެންމެ ފުރިހަމައަށް ލިބެންޖެހޭ ބަޔަކީ މުދައްރިސުން ކަމުގައި ޤަބޫލުކުރައްވާ ކަމަށެވެ.
މިއާއެކު ވަޒީރު ވިދާޅުވީ ޕޭ ފްރޭމްވޯކް އެކުލަވާލެވިފައިވާ ގޮތާމެދު ވަރަށް ގިނަ މުދައްރިސުންނާއި ވާހަކަދެކެވި މަޝްވަރާކުރައްވާފައިވާ ކަމަށާ، އެކަމާގުޅޭ ގިނަ ކަންބޮޑުވުންތަކެއް މުދައްރިސުންގެ ހުރި ކަމަށެވެ.
އަދި ޕޭ ފްރޭމްވޯކުގައި ހުރި މައްސަލަތައް ހައްލުކުރާނީ މުދައްރިސުންނާއި ޕްރިންސިޕަލުންނާއިވެސް ގުޅިގެން ކުރެވޭ މަސައްކަތުގެ ތެރެއިންކަންވެސް ވަޒީރު ފާހަގަކުރެއްވިއެވެ.
”އެންމެ ފުރަތަމަ ޕޭ ފްރޭމްވޯކް އެކުލަވާލެވުނުއިރު މި ދިމާވި މައްސަލައްކީ ޑިގްރީ ޓީޗަރުންނަށް ސްޓެޕް ޕްރޮމޯޝަން ދިނީމާ، މިސާލަކަށް މާސްޓާސްއަށް 4 އަހަރު ދުވަހުގެ ގެޕެއް/ ޕީރިއެޑެއް ދިނީވެސް އެމްޑީޕީ ސަރުކާރުން ފުރަތަމަ ޕޭ ފްރޭމްވޯކް އެކުލަވައިލިއިރުގައި. މިއީ ދުވަހަކުވެސް ރާއްޖޭގައި ވެފައި އޮތް ކަމެއް ނޫން. ހަތަރު އަހަރު ދުވަހުގެ ތެރޭގައި އެބަ އާދޭ ސްޓެޕް ޕްރޮމޯޝަންތަކެއް. އަޅުގަނޑުމެން މިހާރުވާނީ އެ ސްޓެޕް ޕްރޮމޯޝަންތައް ދީފައި.“
ތަޢުލީމާ ބެހޭ ވަޒީރު ޑރ. އިސްމާޢީލް ޝަފީޢު
ތަޢުލީމާ ބެހޭ ވަޒީރު ޑރ. އިސްމާޢީލް ޝަފީޢު: ފޮޓޯ/ މަޖިލިސް
ވަޒީރު އިތުރަށް ވިދާޅުވީ، ޕޭ ފްރޭމްވޯކް އެކުލަވާލެވިފައިވާ ގޮތުން ޑިގްރީ ކިޔަވައިގެން ހުންނަ ޓީޗަރެއްގެ މުސާރަ މާސްޓާސް ކިޔަވައިގެން ހުންނަ ޓީޗަރަށްވުރެ ބޮޑުވާ ކަމަށެވެ.
މިހާރު ނުކުންނަ ނަތީޖާއަކީ މާސްޓާސް ހަދާފައި ހުންނަ މުދައްރިސެއް، އެބޭފުޅާގެ އަތުގައި އޮތް ޑިގްރީއާއެކު ސްޓެޕް ޕްރޮމޯޝަން ލިބުނީމާ، އެ ސްޓެޕް ޕްރޮމޯޝަން ލިބިފައި ހުންނަ މުދައްރިސު، މާސްޓާ ޑިގްރީގެ ގޮޅިއަށް ދިޔައިމާ މުސާރަ ދަށްވާގޮތް ވަނީ. އެކަން ހައްލުކޮށްގެން މެނުވީ، މާސްޓާ ޑިގްރީގެ އެ ގޮޅީގެ ތެރެއަށް މުދައްރިސުން ޓްރާންސްފާ ކުރެވޭކަށްނެތް. ޓްރާންސްފާ ކޮށްފި ކަމަށް ވަނީނަމަ، މުދައްރިސުންނަށް ޑިގްރީއެއް އޮވެގެން ލިބޭ މުސާރައަށްވުރެ މާސްޓާސްގެ އެ ހަރުފަތުގައި ލިބޭ މުސާރަ ދަށްވާގޮތަށް ޕޭ ފްރޭމްވޯކް މި އޮތީ
ތަޢުލީމާ ބެހޭ ވަޒީރު ޑރ. އިސްމާޢީލް ޝަފީޢު
ވަޒީރު ވިދާޅުވީ އެފަދައިން ކަން ދިމާވެފައި އޮތީ ޕޭ ފްރޭމްވޯކް ހެދިއިރު ވިސްނާނުލައި ކަން ކުރުމުން ކަމަށެވެ. އަދި ހައްލު ކުރަންޖެހޭ މައްސަލައެއް ކަމަށްވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
