ރާއްޖޭގައި ކުނި އުފައްދާ މިންވަރު ކަންބޮޑުވާ މިންވަރަކަށް އިތުރުވަމުންދާ ކަމަށް އެންވަޔަރަމަންޓް މިނިސްޓްރީން މިއަދު ހާމަކޮށްފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެންވަޔަރަމަންޓް މިނިސްޓްރީގެ ވޭސްޓް މެނޭޖްމަންޓް އެންޑް ޕޮލިއުޝަން ކޮންޓްރޯލް ޑިޕާޓްމަންޓުގެ ޑިރެކްޓަރު ޖެނެރަލް އަހުމަދު މުރުތަޟާ ވިދާޅުވީ ރާއްޖޭގައި އަހަރަކު 517,000 ޓަނުގެ ކުނި އުފައްދާ ކަމަށާއި ކޮންމެ އަހަރަކު އެ މިންވަރު 9 އިންސައްތަ އިތުރުވަމުންދާ ކަމަށެވެ. އާބަން ސެންޓަރުތަކުގައި ދިރިއުޅޭ ކޮންމެ މީހަކު ދުވާލެއްގެ މައްޗަށް އެވްރެޖްކޮށް 1.7 ކިލޯގެ ކުނި އުފައްދާ ކަމަށް އޭނާ ވިދާޅުވިއެވެ.

"ރާއްޖޭގައި ކުނި އިތުރުވަމުންދާ މިންވަރަށް ބަލާއިރު އަހަރަކު 517000 ޓަނުގެ ކުނި އުފައްދާ. އެއީ އާބަން ސެންޓަރު ތަކުގައި ބޮލަކަށް ދުވާލެއްގެ މައްޗަށް 1.7 ކިލޯ ގްރާމް މީހެއްގެ މައްޗަށް އުފައްދާ މިންވަރު" މުރުތަޟާ ވިދާޅުވިއެވެ.

ފަތުރުވެރިކަމުގެ ދާއިރާއިން އުފައްދާ ކުންޏަކީ ވެސް ބޮޑު ކަންބޮޑުވުމެއް ކަމަށް އެ ބައްދަލުވުމުގައި ފާހަގަކޮށްފައިވެއެވެ. މުރުތަޟާ ވިދާޅުވި ގޮތުގައި ރާއްޖެއަށް ޒިޔާރަތްކުރާ ކޮންމެ ފަތުރުވެރިޔަކު ރެޔަކު 3.5 ކިލޯގެ ކުނި އުފައްދައެވެ. އެއީ އާންމު ރައްޔިތަކު އުފައްދާ ކުނީގެ މިންވަރަށް ވުރެ ގާތްގަނޑަކަށް ތިން ގުނަ އިތުރު މިންވަރެކެވެ.

ރަށްރަށުގައި ކުނި މެނޭޖުކުރާނެ އެކަށީގެންވާ ޖާގަ ނެތުމާއި މި މަސައްކަތަށް ކުރަންޖެހޭ ޚަރަދު ބޮޑުވުމަކީ ކުނީގެ މައްސަލައަށް ދާއިމީ ހައްލެއް ހޯދުމަށް ކުރިމަތިވެފައިވާ އެންމެ ބޮޑު ގޮންޖެހުންތައް ކަމަށް ވެމްކޯއިން ބުނެފައިވެއެވެ.