ތައިލެންޑްގެ ވެރިރަށް ބެންކޮކްގައި ރާބޮއި ނާޗަރަންގީ ކުޅޭ ކުލަބު ރެސްޓޯރެންޓެއްގައި ބޮޑު އަލިފާނުގެ ހާދިސާއެއް ހިނގައި، މަދުވެގެން 30 މީހުން މަރުވެއްޖެއެވެ.
މި ހާދިސާ ހިނގާފައިވަނީ ބެންކޮކްގެ ޗަތުޗަކް ޑިސްޓްރިކްޓްގެ ލަޑްޕްރާއޯ ސަރަހައްދުގައި ހުންނަ "ރޮންގް ބިއަރ ނާ ލަޑްޕްރާއޯ" ނަމަކަށް ކިޔާ ރެސްޓޯރެންޓެއްގައެވެ. ތައިލެންޑްގެ ދައުލަތުގެ މީޑިއާ، ތައި ޕީބީއެސް އިން ރިޕޯޓްކޮށްފައިވާ ގޮތުގައި މި އަލިފާނުގެ ހާދިސާ ހިނގާފައިވަނީ ރޭ ދަންވަރުގެ ވަގުތެއްގައެވެ. އެވަގުތު ރެސްޓޯރެންޓް އޮތީ ފުރިފައި ކަމަށްވެސް ބުނެފައިވެއެވެ.
ތައިލެންޑްގެ ބޮޑުވަޒީރު އަނޫޓިން ޗާންވީރަކުލް ހާދިސާ ހިނގި ސަރަހައްދަށް ވަޑައިގެން މީޑިއާތަކަށް މައުލޫމާތު ދެއްވަމުން ވިދާޅުވީ، މިހާތަނަށް 30 މީހެއްގެ ހަށިގަނޑު އެތަނުން ނެރެފައިވާ ކަމަށެވެ. އަދި ބައެއް މީހުން ހޮސްޕިޓަލަށް ގެންގޮސްފައިވާ ކަމަށާއި، އެމީހުންގެ ހާލަތު ބަލަމުންދާ ކަމަށްވެސް އޭނާ ވިދާޅުވިއެވެ.
ބޮޑުވަޒީރު ވިދާޅުވި ގޮތުގައި، އެތަނުގައި ތިބި މިޔުޒިކް ކުޅޭ މީހުންނާ ހަވާލާދީ އެނގިފައިވާ ގޮތުގައި އަލިފާން ރޯވުމުގެ ކުރިން ސްޓޭޖް ކައިރީގައި ހުރި ސާކިއުޓް ބްރޭކަރަކުން ދުން އަރައި، ކަރަންޓް ކެނޑުމަށްފަހު ގޮވުމެއްގެ އަޑު އިވިފައިވެއެވެ.
"ގިނަ މީހުން މަރުވެފައިވަނީ ބިރުން ދުވެގޮސް، ބޭރަށް ނުނިކުމެވޭ ގޮތަށް ހުރި ފާޚާނާތަކަށް ވަދެ ތިއްބާ. އެއީ މުޅި ތަނުގައި އަލިފާނާއި ދުން ފެތުރިގަތްލެއް އަވަސްކަމުން ހާސްވެގެން ކުރެވުނު ކަމެއް ކަމަށް ބެލެވެނީ،" ބޮޑުވަޒީރު އަނޫޓިން ވިދާޅުވިއެވެ.
މި ހާދިސާއާ ގުޅިގެން އިތުރު ތަހުގީގުތައް މިހާރު ދަނީ ކުރިއަށެވެ.
Advertisement
This content is created and paid for by advertisers and does not involve Voice Journalists
