ގިނަ ދުވަސްތަކަކަށްފަހު މާލޭގެ މަގުތައް ޒަމާނީ ފެންވަރަށް ތަރައްޤީކުރުމަށް ހިންގާ ފުރަތަމަ ބިޔަ މަޝްރޫޢުގެ އަމަލީ މަސައްކަތް، ލަސްވެގެން އަންނަ އަހަރުގެ ކުރީކޮޅު ފެށޭނޭކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިޢުލާނު ކުރައްވައިފިއެވެ.

ރައީސުލްޖުމްހޫރިއްޔާ މިކަން ހާމަކުރެއްވީ،  "ދަ ޕަލްސް" ޕޮޑްކާސްޓް ސިލްސިލާގެ 4 ވަނަ އެޕިސޯޑުގައި ވާހަކަފުޅު ދައްކަވަމުންނެވެ. މި ޕޮޑްކާސްޓުގައި އެމަނިކުފާނު ވަނީ މަގުތަކުގެ ހާލަތާ ގުޅިގެން އާންމުން ހުރި ކަންބޮޑުވުންތަކަށް އަލިއަޅުއްވާލައްވައި، "ވަން އޮންލައިން" އިން ދެންނެވި ސުވާލުތަކަށް ޖަވާބު ދެއްވާފައެވެ.

ރައީސް ވިދާޅުވި ގޮތުގައި، މާލޭގެ މަގުތައް އެއްކޮށް ތަރައްޤީކުރުމުގެ މިފަދަ ބޮޑު މަޝްރޫޢެއް އެންމެ ފަހުން ހިންގާފައިވަނީ ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމްގެ ދައުރުގައެވެ. އޭގެ ފަހުން މަގުތައް ބަލަހައްޓަންޖެހޭ ފެންވަރުގައި ބެލެހެއްޓިފައި ނުވާކަން އެމަނިކުފާނު ފާހަގަކުރެއްވިއެވެ.

ޗައިނާ ސަރުކާރުގެ ހިލޭ އެހީގެ ދަށުން ކުރިއަށްގެންދާ މި މަޝްރޫޢުގެ ދަށުން، މާލޭގެ މަގުތަކުގައި ފެން ހިންދުމަށް ޚާއްޞަ ސްޓޯމްވޯޓަރ ޑްރައިނޭޖް ނިޒާމާއި، ޢިމާރާތްކުރުމަށް ބޭނުންކުރާ ޑީވޯޓަރިންގ ނިޒާމުގެ އިތުރުން، އަލިފާން ނިއްވުމަށް ބޭނުންކުރާ ފަޔަރ ހައިޑްރަންޓް ނިޒާމުވެސް ޤާއިމުކުރެވޭނެއެވެ.

މާލޭގެ އެތެރޭގެ މަގުތަކުގެ މަޝްރޫޢުގެ އިތުރުން، ބޮޑުތަކުރުފާނު މަގު ތަރައްޤީކުރުމުގެ މަސައްކަތަށްވެސް ރައީސް އަލިއަޅުއްވާލެއްވިއެވެ. އެގޮތުން، މި މަސައްކަތުގެ ދެވަނަ ފިޔަވަހީގެ ދަށުން ޢިއްޒުއްދީން ފާލަމުން ފެށިގެން ބާސެލޯ ނަސަންދުރާއާ ހަމައަށް ކުރާ މަސައްކަތް ނިމި، އަންނަ ހަފުތާގައި އެ މަގު ހުޅުވާލާނެކަން ރައީސް ހާމަކުރެއްވިއެވެ. މި ސަރަހައްދުގައި 500 ސައިކަލު ޕާކުކުރެވޭނެ ޖާގަވެސް ވަނީ ހަމަޖައްސާފައެވެ.

މި ފިޔަވަހި ނިމުމާއެކު، ދެން ފަށާނީ އެމް.ޕީ.އެލް އިން ފެށިގެން ރަސްފަންނާ ހަމައަށް އޮތް ސަރަހައްދުގެ މަސައްކަތެވެ. މިއީ މިހާރު އެންމެ ބޮޑަށް ގާ މުގުރި ހަލާކުވެފައިވާ ސަރަހައްދު ކަމަށް ރައީސް ވިދާޅުވިއެވެ.

މަގު ފުޅާކުރުމަށްޓަކައި ފަޅުން ބައެއް ހިއްކި ނަމަވެސް، އެކަމުގެ ސަބަބުން ބަނދަރު ބޭނުންކުރާ ފަރާތްތަކަށް ދަތިނުވާނެކަމުގެ ޔަޤީންކަން ރައީސް ދެއްވިއެވެ. ތިން ފަރާތުން ކީވޯލް ހުންނާނެހެން މަގު ތަރައްޤީކުރުމުން، އުޅަނދުފަހަރު ކައިރިކުރަން ލިބޭ ޖާގަ މިހާރަށްވުރެ އިތުރުވެގެންދާނެއެވެ.

މާލޭގެ ތޮއްޖެހުމުގެ މައްސަލައަށް ދާއިމީ ޙައްލެއް ލިބޭނީ ޚިދުމަތްތަކާއި ބޯހިޔާވަހިކަން ލާމަރުކަޒުކޮށްގެން ކަމަށް ރައީސް ވިދާޅުވިއެވެ. ނަމަވެސް، ރާއްޖޭގެ އާބާދީގެ 40 އިންސައްތަ މާލޭގައި ދިރިއުޅޭތީ، މިވަގުތަށް ބޭނުންވާ ޒަރޫރީ ޙައްލުތައް ފޯރުކޮށްދިނުމަކީ ސަރުކާރުގެ އަމާޒެއްކަން އެމަނިކުފާނު ފާހަގަކުރެއްވިއެވެ.