ސިޔާސީ ޕާޓީތަކުގެ ދަފްތަރަށް ރައްޔިތުންނަށް ނޭނގި ނަން ހިމެނުމުގެ ޒަމާންވީ މައްސަލައަށް އީފާސް ނިޒާމު މެދުވެރިކޮށް ދާއިމީ ޙައްލެއް ގެނެސްދީފައިވާ ކަމަށް އިލެކްޝަންސް ކޮމިޝަން (އީސީ) ގެ މެންބަރު ޙަސަން ޒަކަރިއްޔާ ވިދާޅުވެއްޖެއެވެ.

ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން ޒަކްރިއްޔާ ވިދާޅުވީ ސިޔާސީ ޕާޓީތަކާ ގުޅިގެން އީސީން ކުރިއަށް ގެންދިޔަ މަޝްވަރާތަކުގެ ތެރެއިން އެންމެ ފާހަގަކޮށްލެވޭ ބަދަލެއް ގެނައީ ޕާޓީތަކުގެ މެންބަރުންގެ ދަފްތަރު ބެލެހެއްޓުމުގެ ނިޒާމަށް ކަމަށެވެ.

އެ ބަދަލުގެ ތެރެއިން "ސިމެދަ" ގެ ނަމުގައި ޚާއްޞަ ޕޯޓަލެއް ތަޢާރަފުކޮށް ޕާޓީތަކުގެ ދަފްތަރާ ގުޅޭ އެންމެހައި ކަންކަން ކުރިއަށް ގެންދިއުން ފަސޭހަކޮށްދީފައިވާ ކަމަށް އޭނާ ފާހަގަކުރެއްވިއެވެ.

ނަމަވެސް ސިމެދަ ޕޯޓަލް ބޭނުންކުރަން ފެށި ފަހުންވެސް ބައެއް ފަރާތްތަކަށް އެނގުމެއް ނެތި އެ މީހުންގެ ނަން ޕާޓީތަކުގެ ދަފްތަރުގައި ހިމަނާ މައްސަލަ އީސީއަށް ހުށަހެޅެމުން ދިޔަ ކަމަށް ވިދާޅުވިއެވެ.

އަދި މި މައްސަލަ ދިމާވި ސަބަބާ ގުޅޭ ގޮތުން ޙަސަން ވިދާޅުވީ ޕާޓީތަކުން މެންބަރުން ވެއްދުމަށް ހުށަހަޅާ ފޯމުތަކުގެ ޞައްޙަކަން ކަށަވަރުކުރެވެން ނެތް ކަމަށެވެ. ސިޔާސީ ޕާޓީތަކުގެ ހަރަކާތްތައް މުޅި ރާއްޖެއަށް ފެތުރިފައި އޮންނައިރު ހުށަހެޅޭ ކޮންމެ ފޯމެއް ވެރިފައިކުރެވޭނެ އެކަށީގެންވާ އިންތިޒާމެއް ކުރިން ހަމަޖެހިފައި ނެތުމަކީ މައިގަނޑު ސަބަބު ކަމަށް އޭނާ ފާހަގަކުރެއްވިއެވެ.

އެ މައްސަލައަށް ޙައްލެއް ގެނައުމުގެ ގޮތުން ޕާޓީތަކާ ގުޅުމާއި ޕާޓީތަކުން ވަކިވުމުގެ މުޅި ޕްރޮސެސް އީފާސް މެދުވެރިކޮށް ކުރެވޭ ގޮތަށް ބަދަލުކުރީ ކަމަށް އޭނާ ވިދާޅުވިއެވެ.

"ސިޔާސީ ޕާޓީތަކުގެ ގަވާއިދަށް ބަދަލު ގެނެސް އީފާސް ތެރެއަށް ނިޒާމު ބަދަލު ގެނައި ފަހުން ނޭނގި ރަޖިސްޓްރީކުރުމުގެ ޝަކުވާއެއް ނާދޭ. އަދި އަޅުގަނޑުމެން ގަބޫލުކުރަނީ އެއްވެސް ސިޔާސީ ޕާޓީއަކާ ހަމައަށްވެސް ނާންނާނެކަމެއް. އަޅުގަނޑުމެން ދޭ ޔަގީންކަމަކީ އެއްވެސް ދިވެހި ރައްޔިތަކަށް އެ މީހަކަށް ނޭނގި ޕާޓީއަކަށް އެ މީހާ ރަޖިސްޓްރީއެއް ނުކުރެވޭނެކަން. އެއް ޕާޓީން އަނެއް ޕާޓީއަކަށްވެސް ނުކުރެވޭނެކަން،" ޒަކަރިއްޔާ ވިދާޅުވިއެވެ.

މީގެ އިތުރުން، ސިޔާސީ ޕާޓީތަކުން ވަކިވާން އެދޭ މީހުންނަށްވެސް މިހާރު އީފާސްގެ ތެރެއިން ވަކިވެވޭނެކަން އޭނާ ފާހަގަކުރެއްވިއެވެ.