މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖީއެޗް) ގެ ދަށުން ހިންގާ ދަރުމަވަންތަ ހޮސްޕިޓަލާއި އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ޚިދުމަތް ދެއްވުމަށް މި އަހަރުގެ މިހާތަނަށް ތަމްރީނު ފުރިހަމަކުރެއްވި ދިވެހި 16 ޑޮކްޓަރުން ގުޅިވަޑައިގެންފައިވާ ކަމަށް އެ ހޮސްޕިޓަލްތަކުގެ ސީއީއޯ އިބްރާހީމް ޢަބްދުއްރައްޒާޤު ޙަލީމް ވިދާޅުވެއްޖެއެވެ.
ހަލީމް ރޭ އެކްސްގައި ކުރެއްވި ޕޯސްޓެއްގައި ވިދާޅުވީ އަލަށް ގުޅިވަޑައިގެންނެވި ޑޮކްޓަރުންގެ ތެރޭގައި ރާއްޖެއަށް މުޅިން އަލަށް ތަޢާރަފުވާ ދާއިރާތަކުން ތަމްރީނު ހާސިލުކުރައްވާފައިވާ ސްޕެޝަލިސްޓުންނާއި ސަބް-ސްޕެޝަލިސްޓުން ހިމެނިވަޑައިގަންނަވާ ކަމަށެވެ.
އެގޮތުން ނިއުރޯ އިންޓަވެންޝަނަލް ރޭޑިއޮލޮޖީ ޕީޑިއަޓްރިކް ޑެންޓިސްޓްރީ ނިއޯނަޓޮލޮޖީ އަދި ކްލިނިކަލް ހެމަޓޮލޮޖީ ފަދަ ދާއިރާތައް ފާހަގަކޮށްލެވެއެވެ.
މީގެ އިތުރުން ކަށީގެ ބަލިތަކާއި އެތެރެހައްޓާއި ނިއުރޮލޮޖީއާއި ރޭޑިއޮލޮޖީއާއި ކަންފަތާއި ނޭފަތާއި ކަރު (އީއެންޓީ) އާއި ގެސްޓްރޯއެންޓްރޮލޮޖީއާއި ޕްލާސްޓިކް ސާޖަރީއާއި ވެސްކިޔުލަރ ސާޖަރީ އަދި ޕަލްމޮނޮލޮޖީ ފަދަ ތަފާތު ދާއިރާތަކުން ޚާއްޞަ ޑޮކްޓަރުން ވަނީ ޚިދުމަތާ ގުޅިވަޑައިގެންފައެވެ.
ސީއީއޯ ވިދާޅުވި ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާ އެއްގޮތަށް ކާޑިއޯތޮރެސިކް އެންޑް ވެސްކިޔުލަރ ސާޖަރީއާއި އިންޓަރވެންޝަނަލް ރޭޑިއޮލޮޖީގެ ޚިދުމަތް ތަޢާރަފުކުރުމާއި ހިތުގެ ފަރުވާއާއި ނާރުގެ ފަރުވާ އިތުރަށް ފުޅާކުރުމަށް ޒަމާނީ ޚިދުމަތްތައް މި އަހަރު ތެރޭގައި ފެށިގެންދާނެއެވެ.
މި ފިޔަވަޅުތަކަކީ ޞިއްޙީ ފަރުވާއަށް ރާއްޖެއިން ބޭރަށް ބަރޯސާވާ މިންވަރު ކުޑަކުރުމަށް އެޅިގެންދާ މުހިންމު ފިޔަވަޅުތަކެއް ކަމަށް އޭނާ ފާހަގަކުރެއްވިއެވެ.
ޞިއްޙީ ދާއިރާ ހަރުދަނާކުރައްވައި ކުރިން ރާއްޖެއިން ނުލިބޭ ގިނަ ޚިދުމަތްތައް ފޯރުކޮށްދެއްވުމަށް ރައީސް ޑރ. މުޢިއްޒު ގެންގުޅުއްވާ ދުރުވިސްނުންފުޅަށް ޝުކުރު އަދާކުރައްވަމުން ސީއީއޯ ވަނީ އެމްސީޖީއެޗްގެ ހުރިހާ މުވައްޒަފުންނަށް ވެސް ޝުކުރު ދަންނަވައިފައެވެ.
Advertisement
This content is created and paid for by advertisers and does not involve Voice Journalists
