ދިވެހިރާއްޖޭގެ މިނިވަން ދުވަހުގެ މުނާސަބަތުގައި ދިވެހި ރައްޔިތުންނަށް ތަހުނިޔާ ވިދާޅުވެ މިނިވަންކަން ދެމެހެއްޓުމަށް މަސައްކަތް ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިލްތިމާސްކުރައްވައިފިއެވެ.

ދިވެހިރާއްޖޭގެ މިނިވަންދުވަހާއިގުޅިގެން އެކްސްގައި ކުރެއްވި ޕޯސްޓުގައި ރައީސް ވަނީ މިނިވަންކަމުގެ ކާމިޔާބީ ހާސިލުކުރުމަށްޓަކައި ޤުރުބާންވި ބަޠަލުންނަށް ހެޔޮ ދުޢާ ރައްދުކުރައްވައިފައެވެ.

އަދި ކާބަފައިން ފުރާނައިން އަގު ދީގެން ހޯދައިދިން މިނިވަންކަން ރައްކާތެރިކޮށް ދެމެހެއްޓުމަކީ މިއަދުގެ ޖީލުގެ ކޮނޑުގައި އެޅިފައިވާ އެންމެ ބުރަ ޒިންމާ ކަމުގައި ރައީސް ވިދާޅުވިއެވެ.

އެ ޒިންމާ ފުރިހަމައަށް އަދާކުރެވޭނީ ވަކި ސިފަތަކެއް ދެމެހެއްޓިގެން ކަމަށް ރައީސް ފާހަގަކުރެއްވިއެވެ. އެގޮތުން ޤައުމީ ލޯބި އިސްކުރުމާއި ޒުވާނުންގެ ޤާބިލުކަން ކުރިއެރުވުމާއި ދިވެހި އަމިއްލަވަންތަކަމާ މެދު ފަޚުރުވެރިވުމާއި މުޖުތަމަޢުގައި ބަދަހި ގުޅުންތަކެއް ޤާއިމުކުރުން ރައީސް ވަނީ ފާހަގަކުރައްވައިފައެވެ.

ރައީސް ވަނީ މި ސިފަތައް އަށަގެންނެވުމަށާއި މިނިވަންކަމާ އެކު ޤައުމު ކުރިއަށް ގެންދިޔުމަށް ދިވެހި ރައްޔިތުންނަށް އިލްތިމާސްކުރައްވައިފައެވެ.

"ކާމިޔާބު ހިނިތުންވާނީ ހިންމަތްތެރިންގެ ފަހަތުން!" ރައީސް ވިދާޅުވެފައިވެއެވެ.