އިދިކޮޅު އެމްޑީޕީގެ ވެރިކަންތަކުގައި ރާއްޖެއިން އިސްރާއީލާއެކު ގުޅުން ބޭއްވި ކަމަށާ އޭރު ރާއްޖޭގައި އޮތީ ޕްރީ އިސްރާއީލް ޕޮލިސީއެއް ކަމަށް ރައީސް ޑރ މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި މިއަދު ޚާއްސަ ޖަލްސާގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، މި ސަރުކާރުން ގެންގުޅޭނީ މޯލްޑިވްސް ފަސްޓް ޕޮލިސީ ކަމަށާ، އެ ޕޮލިސީގެ ދަށުން އެންމެ އިސްކުރައްވާނީ ރާއްޖެ ކަމަށެެވެ. އަދި، ރާއްޖެއިން އިސްރާއީލް ފިޔަވައި އެހެން ހުރިހާ ގައުމަކާއެކު ގުޅުން ބާއްވާނެ ކަމަށްވެސް ވިދާޅުވިއެވެ.
ފަލަސްތީނުގެ ރައްޔިތުންނަށް އެކުރަމުންދާ އަނިޔާ، އެ ޖެނިސައިޑް، ހިނގަމުންދާހާ ހިނދަކު، އަދި ހަމަ ގައިމުވެސް މި ސަރުކާރުގެ ޚާރިޖީ ސިޔާސަތު ތަންފީޒުކުރަމުންދާހާ ހިނދަކު، އެކަން އަޅުގަނޑުމެން ހިފަހައްޓާނީ އެ މިނުގައި. ރައްޔިތުންގެ އިހްސާސާ ވިންދާ އެއްގޮތަށް މި ރީތި ފަސްގަނޑަށް އިސްރާއީލުގެ ޕާސްޕޯޓާއެކު މި ގައުމަށް ނާދެވޭނެކަން އަޅުގަނޑުމެން ނިންމީ ފަޚުރުވެރިކަމާއެކުގައި
ރައީސް މުޢިއްޒު
މިއާއެކު ރައީސް ވިދާޅުވީ، އެމްޑީޕީގެ ވެރިކަން ރާއްޖޭގައި އޮތް އިރު އިސްރާއިލާއެކު ގުޅުން ބާއްވާފައިވާ ކަމަށެވެ.
އެމްޑީޕީގެ ވެރިކަން މިތާ ހިނގިއިރު އޮތީ އޭގެ ދިމާ އިދިކޮޅު. މިއީ ހަގީގަތް ފެންނަން އޮތް. ޕްރޯ އިސްރާއީލް ޕޮލިސީއެއް މިތާ ތަންފީޒު ކުރީ. އަރަބި އިސްލާމް ގައުމުތަކާ ދުރުވެގަތީ. މީކީ ދިވެހިންނާ ދޯޅު ގޮތެއް ނޫން. ދިވެހިންނާ ބީރަައްޓެހި ޚާރިޖީ ސިޔާސަތެއް އެއީ
ރައީސް މުޢިއްޒު
ރައީސް އިތުރަށް ވިދާޅުވީ، ހަނގުރާމައާއި އަނިޔާވެރިކަމަކީ ދިވެހިން ގަބޫލުކުރާ ހަމައެއް ނޫން ކަމަށެވެ. އެގޮތުން މެދުއިރުމަތީގައި ހިންގަމުންދާ ހަނގުރާމައަށްވެސް ދިވެހި ރައްޔިތުންނާއި މުޅި ދުނިޔެވެސް ދެކޮޅު ހަނގުރާމައެއް ކަމަށެވެ. އަދި ރާއްޖެއިން އަބަދުވެސް ގޮވާލާނީ އަދި އިސްކުރާނީވެސް ސުލްހަ ކަމަށް އެމަނިކުފާނު ވިދާަޅުވިއެވެ.
Advertisement
This content is created and paid for by advertisers and does not involve Voice Journalists
