ދިވެހި ސިފައިންގެ ކޯސްޓްގާޑުގެ މެރިޓައިމް ރެސްކިޔު ކޯޑިނޭޝަން ސެންޓަރު (އެމްއާރުސީސީ)ގެ އައު އިމާރާތް ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑޮކްޓަރ މުޙައްމަދު މުޢިއްޒު ހުޅުއްވައިދެއްވައިފިއެވެ.

މިއަދު ހެނދުނު ވިލިމާލޭގައި ބޭއްވި ޚާއްޞަ ރަސްމިއްޔާތުގައި ރައީސުލްޖުމްހޫރިއްޔާ ވަނީ އިމާރާތް ހުޅުވައިދެއްވައި، އެމްއާރުސީސީގެ އޮޕްސްރޫމް ބައްލަވާލައްވައި ސެންޓަރުގެ އޮޕަރޭޝަނަލް ޤާބިލުކަމާއި ވަސީލަތްތައް ބައްލަވާލައްވާފައެވެ. މީގެ އިތުރުން ރައީސުލްޖުމްހޫރިއްޔާ ވަނީ އެ އިމާރާތުގެ ގޯތިތެރޭގައި ގަހެއް ވެސް އިންދަވައިދެއްވާފައެވެ.

ޖަޕާނު ސަރުކާރުގެ އެހީގައި 2022 ވަނަ އަހަރު ބިންގާ އެޅި މި އިމާރާތް ބިނާކޮށްފައި ވަނީ އދ. ގެ ޔޫއެންއޯޑީސީން ވިލަރެސްކޮށްގެންނެވެ. ޚިދުމަތް ދިނުމަށް ބޭނުންވާ އާލާތްތަކާއި ވަސީލަތްތައް ޤާއިމުކުރުމުގައި އޮސްޓްރޭލިޔާ ސަރުކާރުގެ އެހީތެރިކަން ވެސް ލިބިފައިވެއެވެ. ޒަމާނީ އޮޕަރޭޝަންސް ރޫމްތަކާއި ތަމްރީނީ ވަސީލަތްތަކުގެ އިތުރުން އޮޑިޓޯރިއަމެއް ވެސް މި އިމާރާތުގައި ހިމެނެއެވެ.

ރަސްމިއްޔާތުގައި ވާހަކަފުޅު ދައްކަވަމުން ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ ވަނީ ކަނޑުދަތުރުފަތުރު ކުރާ ފަރާތްތަކުގެ ސަލާމަތް ކަށަވަރުކުރުމަށް ކޯސްޓްގާޑުގެ ޤާބިލުކަން އިތުރުކުރެއްވުމަށް ރައީސުލްޖުމްހޫރިއްޔާ ދެއްވާ ޚާއްޞަ އިސްކަމަށް ޝުކުރު އަދާކުރައްވާފައެވެ. ޖަޕާނުން ރާއްޖެއަށް ކަނޑައަޅުއްވާފައިވާ ސަފީރު އިޝިގާމީ ރޫމީކޯ އާއި އދ. ގެ ރެޒިޑެންޓް ކޯޑިނޭޓަރު ހައޮ ޒެންގ ވެސް މި ރަސްމިއްޔާތުގައި ވާހަކަފުޅު ދައްކަވާފައިވެއެވެ.

ރާއްޖޭގައި ކަނޑުމަތީގެ ސަލާމަތީ ނިޒާމެއް ފެށިގެން އައީ 1998 ވަނަ އަހަރު ގްލޯބަލް މެރިޓައިމް ޑިސްޓްރެސް އެންޑް ސޭފްޓީ ސިސްޓަމް (ޖީއެމްޑީއެސްއެސް)ގެ ނިޒާމު ދިފާޢީ ވުޒާރާއާ ޙަވާލުކުރެވުމާ ހިސާބުންނެވެ. އެ މަސައްކަތް ފުޅާކުރުމުގެ ގޮތުން 2003 ވަނަ އަހަރު ވިލިމާލޭގައި ވަކި އިމާރާތެއް ބިނާކޮށް 2006 ވަނަ އަހަރުގެ ޖެނުއަރީ އެކެއްގައި "ޖީއެމްޑީއެސްއެސް އޮޕަރޭޝަން ސެންޓަރ"ގެ ނަމުގައި ހުޅުވައި ފަހުން 2012 ވަނަ އަހަރުގެ ޖުލައި 27 ގައި "މެރިޓައިމް ރެސްކިޔު ކޯޑިނޭޝަން ސެންޓަރ"ގެ ނަމަށް ބަދަލުކޮށްފައިވެއެވެ.

މިއަދު ހުޅުވި އައު އިމާރާތާ އެކު ރާއްޖޭގެ ކަނޑުގެ ސަރަޙައްދުގައި ހިނގާ ޙާދިސާތަކުގައި ހާލުގައި ޖެހޭ ފަރާތްތަކަށް އެހީވެދިނުމާއި ކުއްލި ޙާލަތްތަކުގައި ހިންގާ އޮޕަރޭޝަންތައް ހަރުދަނާކުރުމަށް ބޮޑު ކުރިއެރުމެއް ލިބިގެންދާނެ ކަމަށް އެމްއެންޑީއެފުން ބުނެފައިވެއެވެ.