ސްޓޭޓް ބޭންކް އޮފް އިންޑިއާ (އެސްބީއައި) އިން އަތަމާ އިންވެސްޓްމަންޓް ޕްރައިވެޓް ލިމިޓެޑަށް ދޫކޮށްފައިވާ ލޯނަކަށް ރަހުނުކޮށްފައިވާ ނ. މާވެލާވަރު، 111.6 މިލިއަން އެމެރިކާ ޑޮލަރަށް ނީލަމުގައި ވިއްކާލުމަށް އިޢުލާންކޮށްފިއެވެ.

މި ރަށް ވިއްކާލުމުގެ ހުއްދަ އެސްބީއައި މާލެ ބްރާންޗަށް ލިބިފައިވަނީ، ލޯނު ނުދައްކައިގެން ސިވިލް ކޯޓަށް ހުށަހެޅުނު ޤަޟިއްޔާއަކާ ގުޅިގެން 21 ޖޫން 2026 ގައި އެ ކޯޓުން ކުރި ޙުކުމުގެ ދަށުންނެވެ. މި ނީލަން ކުރިއަށް ގެންދިއުމަށް ހަމަޖެހިފައިވަނީ 23 ޖުލައި 2026 އިން ފެށިގެން 09 އޯގަސްޓު 2026 އާ ދެމެދު އެ ބޭންކުގެ މާލެ ބްރާންޗުގައެވެ.

މި ނީލަމުގެ ދަށުން ވިއްކާލުމަށް ހަމަޖެހިފައިވަނީ ނ. މާވެލާވަރުގެ ހެޑްލީސް ރައިޓްސްއާއި، އެރަށުގައި ހުރި އެންމެހައި ޢިމާރާތްތަކާއި، ބިނާތަކާއި، ޚިދުމަތްދޭ ވަޞީލަތްތަކެވެ. މީގެ އިތުރުން މެޝިނަރީތަކާއި، ފަރުނީޗަރާއި، މަސައްކަތު ސާމާނުގެ އިތުރުން ކައްކާ ކާބޯތަކެތި ކެއުމަށް ބޭނުންކުރާ ތަށި، ތެލި، ސަމްސާ ފަދަ އެންމެހައި ތަކެތި ހިމެނޭ ގޮތަށް "އޭޒް އިޒްވެއަރ އިޒް" (as is where is) އުސޫލުންނެވެ. މި ތަކެތީގެ ރިޒާވް ޕްރައިސް ނުވަތަ ނީލަން ފެށޭ އަގަކީ 111,600,000.00 (ސަތޭކަ އެގާރަ މިލިއަން ހަލައްކަ) އެމެރިކާ ޑޮލަރެވެ.

ނީލަމުގައި ބައިވެރިވާން އެދޭ ފަރާތްތަކުން 500,000.00 (ފަސްލައްކަ) އެމެރިކާ ޑޮލަރުގެ ޑިޕޮސިޓެއް ބޭންކަށް ދައްކަންޖެހެއެވެ. ނީލަން ކާމިޔާބުވާ ފަރާތުން ދެއްކި ޑިޕޮސިޓް ފައިސާ، ރަށް ގަތުމަށް ހުށަހެޅި އަގުގެ ތެރޭގައި ހިމެނިގެންދާނެއެވެ. ނަމަވެސް ނީލަން ކާމިޔާބުކޮށް، ކަނޑައެޅިފައިވާ މުއްދަތުގައި ފައިސާ ނުދައްކައިފިނަމަ އެ ޑިޕޮސިޓް ފައިސާ ބޭންކަށް ނެގޭނެއެވެ.

ނީލަން ހުށަހަޅާ ސިޓީއުރަތައް ކަނޑާނީ 09 އޯގަސްޓު 2026 ގެ ހަވީރު 5:00 ގައި ބޭންކުގެ ފަސް އޮފިސަރުންގެ ކޮމިޓީއެއްގެ ކުރިމަތީގައެވެ. ދެ ފަރާތަކުން އެއްވަރަކަށް އަގު ހުށަހަޅައިފިނަމަ، އިތުރު 50,000 ޑޮލަރު މަތިކުރުމުގެ ފުރުސަތު އެ ފަރާތްތަކަށް އެ ވަގުތު އެރުވޭނެއެވެ.

ނީލަން ކާމިޔާބުކުރާ ފަރާތުން 15 ދުވަހުގެ ތެރޭގައި 10 މިލިއަން ޑޮލަރު ދައްކަންޖެހޭނެއެވެ. އަދި ބާކީވާ ފައިސާ 60 ދުވަހުގެ ތެރޭގައި ދައްކާ ޚަލާޞްކުރަންޖެހެއެވެ. 15 ދުވަހުގެ ތެރޭގައި ފުރަތަމަ ފައިސާ ނުދައްކައިފިނަމަ، ނީލަން ދެން އެންމެ މަތީ އަގު ހުށަހެޅި ފަރާތަށް ބަދަލުވާނެއެވެ.

ބޭންކުން ހާމަކޮށްފައިވާ ގޮތުގައި، މި ނީލަމުން ލިބޭ ފައިސާގެ ތެރެއިން ދައުލަތަށް ދައްކަންޖެހޭ ޓެކުހާއި އެހެނިހެން ޚަރަދުތައް ކެނޑުމަށްފަހު، ބާކީވާ ފައިސާއެއް އޮތްނަމަ އެ ފައިސާ ލޯނު ނެގި ފަރާތަށް ރައްދުކުރެވޭނެއެވެ.