ޖަޕާނުގެ ހުޅަނގު ދެކުނު ސަރަހައްދަށް ރިކްޓަރ މިންގަނޑުން 7.1 ގެ ބާރުގަދަ ބިންހެލެއް އަތުވެއްޖެއެވެ. މި ބިންހެލުމާ ގުޅިގެން ނެރުނު ސުނާމީގެ އިންޒާރު، އެ ޤައުމުގެ މީޓިއޮރޮލޮޖިކަލް އެޖެންސީން މިހާރު ވަނީ ކަނޑާލައިފައެވެ.

މި ބިންހެލުން އައިސްފައިވަނީ އެ ޤައުމުގެ ގަޑިން ހަވީރު 4:27 ހާއިރު، ޖަޕާނުގެ ކިއުޝޫ ރަށަށެވެ. ބިންހެލުމުގެ ބާރުމިން ޖަޕާނުގެ އަމިއްލަ "ޝިންޑޯ" ސްކޭލްގެ އެންމެ މަތީ ދަރަޖަ ކަމަށްވާ ހަތެއްގައި ހުރި ކަމަށް އެޖެންސީން ރިޕޯޓްކޮށްފައިވެއެވެ. ބިންހެލުމާ ގުޅިގެން އެންމެ ފުރަތަމަ އެއް މީޓަރުގެ އުސް ސުނާމީއެއް އަރާފާނެ ކަމަށް ލަފާކުރި ނަމަވެސް، ބިންހެލުން އައިތާ ދެ ގަޑިއިރު ނުވަނީސް އެޖެންސީގެ ވެބްސައިޓް މެދުވެރިކޮށް ވަނީ ސުނާމީގެ އިންޒާރު އުވާލާފައެވެ.

ޖަޕާނުގެ ބޮޑުވަޒީރު ސަނާ އެޓަކައިޗީ ވިދާޅުވި ގޮތުގައި، މި ބިންހެލުމުގެ ސަބަބުން ބައެއް މީހުންނަށް އެކިވަރުގެ އަނިޔާލިބި، ބައެއް އިމާރާތްތައް ވެއްޓި، އަދި ބައެއް ސަރަހައްދުތަކުގައި އަލިފާނުގެ ހާދިސާތައް ވަނީ ހިނގާފައެވެ.

މި ހާދިސާއާ ގުޅިގެން ޖަޕާނުގެ ނިއުކްލިއަރ ރެގިއުލޭޝަން އޮތޯރިޓީން ބުނީ، ބިންހެލުން އައި ސަރަހައްދުގައި ހުރި ނިއުކްލިއަރ ޕަވަރ ޕްލާންޓްތަކަށް އެއްވެސް ކަހަލަ ބޮޑު ގެއްލުމެއް ލިބިފައިވާ ކަމުގެ ރިޕޯޓެއް ލިބިފައިނުވާ ކަމަށެވެ. އަދި އެ ސަރަހައްދުގެ ކިއުޝޫ އިލެކްޓްރިކް ޕަވަރ ކުންފުނިން ބުނި ގޮތުގައި، ބިންހެލުން އައި ވަގުތު އޮޕަރޭޓް ކުރަމުންދިޔަ ތިން ރިއެކްޓަރެއްގެ މަސައްކަތް އެއްވެސް މައްސަލައެއް ނެތި އާންމު ހާލަތުގައި ކުރިއަށްދެއެވެ.

ޖަޕާނަކީ ދުނިޔޭގެ ބިންހެލުންތައް އެންމެ ގިނައިން އަންނަ "ރިންގް އޮފް ފަޔަރ" ސަރަހައްދުގައި އޮންނަ ޤައުމަކަށް ވުމާއެކު، އަހަރެއްގެ މައްޗަށް އެތައް ސަތޭކަ ބިންހެލުމެއް އެ ޤައުމަށް އާދެއެވެ. ދުނިޔޭގެ ބިންހެލުންތަކުގެ ގާތްގަނޑަކަށް 18 އިންސައްތަ ހިއްސާކުރަނީ ޖަޕާނެވެ.

މީގެ ކުރިން 2011 ވަނަ އަހަރު އައި 9.0 ގެ ބާރުގަދަ ބިންހެލުމާއި ސުނާމީގައި 18،500 އަށްވުރެ ގިނަ މީހުން މަރުވެ، ފުކުޝީމާ ނިއުކްލިއަރ ޕްލާންޓަށް ބޮޑެތި ގެއްލުންތަކެއް ލިބުނު ހިތާމަވެރި ހާދިސާގެ ހަނދާންތައް އަދިވެސް އެ ޤައުމުގައި އާކުރެއެވެ.

މިއަހަރުގެ ޖޫން 25 ގައިވެސް ޖަޕާނުގެ އުތުރަށް 7.2 ގެ ބިންހެލުމެއް އައި އިރު، އޭޕްރިލް 20 ގައި އައި 7.7 ގެ ބިންހެލުމާ ގުޅިގެން 8.0 އަށްވުރެ ބާރުގަދަ ބިންހެލުމެއް އަތުވެދާނެ ކަމުގެ ޚާއްޞަ އިންޒާރެއްވެސް ކަމާބެހޭ ފަރާތްތަކުން ނެރުނެވެ. ނަމަވެސް އެ އިންޒާރު ވަނީ އެއް ހަފުތާ ފަހުން އުވާލާފައެވެ.