ދުނިޔޭގެ ފުޓްބޯޅައިގެ މައި އިދާރާ، ފީފާގެ ފަރާތުން ބާއްވާ ވޯލްޑް ކަޕާއި އެހެނިހެން މުބާރާތްތައް ހިންގުމަށްޓަކައި 20 ބިލިއަން ޑޮލަރުގެ އަގުހުރި ސަބްސިޑިއަރީ ކުންފުންޏެއް އުފައްދައި، އޭގެ 20 އިންސައްތަ ހިއްސާ ބޭރުގެ އިންވެސްޓަރުންނަށް ވިއްކާލުމަށް ނިންމައިފިއެވެ.

ފީފާގެ މި ނިންމުމާއެކު، ޔޫރަޕްގެ ފުޓްބޯޅަ އިދާރާ (ޔުއެފާ) އިން ވަނީ ފީފާ އިން ފުޓްބޯޅައިގެ "ރޫހު" ވިއްކާލަން އުޅޭކަމަށް ތުހުމަތުކޮށް، ވަރަށް ބޮޑަށް ނުރުހުން ފާޅުކޮށްފައެވެ.

އަންގާރަ ދުވަހު ފީފާ އިން ހާމަކުރި މި މަޝްރޫޢުގެ ދަށުން، "ކޮމާޝަލް އެންޑް އިވެންޓް އޮޕަރޭޝަންސް" ބެލެހެއްޓުމަށް "ފީފާ ފޯވާޑް އެންޓަޕްރައިޒް (އެފް.އެފް.އީ)" ގެ ނަމުގައި އާ ކުންފުންޏެއް އުފެއްދުމަށް ވަނީ ނިންމާފައެވެ. އެމެރިކާ، ކެނެޑާ އަދި މެކްސިކޯގައި ދާދިފަހުން ބޭއްވި، ތާރީޚުގައިވެސް އެންމެ ބޮޑު ވޯލްޑް ކަޕް އިންތިޒާމުކުރި ފީފާ އިން ބުނިގޮތުގައި، މި އާ ކުންފުނީގެ ފުރިހަމަ ކޮންޓްރޯލް އޮންނާނީ ފީފާގެ އަތުގައެވެ. ނަމަވެސް، އަމިއްލަ އިންވެސްޓަރުންނަށް ކުޑަ ހިއްސާއެއް ވިއްކައިގެން 4.2 ބިލިއަން ޑޮލަރާ ހަމައަށް ފައިސާ ހޯދުމަށް ވަނީ އަމާޒު ހިފާފައެވެ.

މި އިންވެސްޓަރުންގެ ގްރޫޕް އިސްވެ ހިންގާނީ އެމެރިކާގެ ރައީސް ޑޮނަލްޑް ޓްރަމްޕްގެ ދަނބިދަރިފުޅު ޖެރެޑް ކުޝްނާގެ ކޮއްކޮ، ޖޯޝުއާ ކުޝްނާގެ "ތްރައިވް އިޓާނަލް" އިން ކަމަށް ފީފާ އިން ބުނެއެވެ. މިކަމަށް މަގުފަހިކުރުމަށް ފީފާ އިން ދަނީ ޖޭ.ޕީ މޯގަން ބޭންކާ ގުޅިގެން މަސައްކަތް ކުރަމުންނެވެ.

މި ހުށަހެޅުމާއެކު ފީފާ އާއި ޔުއެފާގެ ދެމެދުގައި އޮތް ނުތަނަވަސްކަން ވަނީ އިތުރަށް ބޮޑުވެފައެވެ. ޔުއެފާ އިން ނެރުނު ބަޔާނެއްގައި ބުނެފައިވަނީ، ފުޓްބޯޅައިގެ ރޫހާއި އޭގެ ހިންގުމަކީ ވިޔަފާރި މުދަލެއް ނޫން ކަމަށާއި، ފުޓްބޯޅައަކީ ފީފާގެ މިލްކެއް ނޫން ކަމަށެވެ. އަދި މިކަމަކީ އެއްވެސް ދެފުށް ފެންނަ ގޮތެއް ނެތި ކުރަން އުޅޭ ކަމެއް ކަމަށް ބުނެ ޔުއެފާ އިން ވަނީ ފާޑުކިޔާފައެވެ. މީގެ އިތުރުން އިނގިރޭސިވިލާތުގެ އާ ބޮޑުވަޒީރު އެންޑީ ބާންހަމް ވެސް ވަނީ ވޯލްޑް ކަޕަކީ ވިއްކާލެވޭނެ އުފެއްދުމެއް ނޫން ކަމަށް ވިދާޅުވެފައެވެ.

ފީފާގެ ރައީސް ޖިއާނީ އިންފަންޓީނޯ ވިދާޅުވީ، މި ބަދަލުގެ ބޭނުމަކީ ދުނިޔޭގެ އެކި ކަންކޮޅުތަކުގައި ފުޓްބޯޅަ ކުރިއެރުވުމަށް ބޭނުންވާ ފައިސާ ހޯދުން ކަމަށެވެ. އަދި މިކަމުގެ ސަބަބުން ފީފާގެ މެންބަރު ގައުމުތަކަށް އިންފްރާސްޓްރަކްޗާ އާއި، ކޯޗިން އަދި އަންހެން ފުޓްބޯޅަ ކުރިއެރުވުމަށް 20 މިލިއަން ޑޮލަރާ ހަމައަށް ފައިސާ ލިބިގެންދާނެ ކަމަށް އޭނާ ފާހަގަކުރެއްވިއެވެ.

"މިއީ މުޅި ދުނިޔޭގައި ފުޓްބޯޅަ ޑިމޮކްރަޓައިޒް ކުރުމަށް ކުރެވޭ ކަމެއް،" އިންފަންޓީނޯ ވިދާޅުވިއެވެ.

ފީފާ އިން ބުނާގޮތުގައި ބޭރުގެ އިންވެސްޓަރުންނަށް އޮންނާނީ ހަމައެކަނި ކުޑަ ހިއްސާއެކެވެ. މުބާރާތްތަކުގެ ގަވާއިދުތަކާއި، ކަލަންޑަރު އަދި ކުޅިވަރާ ގުޅުންހުރި އެންމެހާ ނިންމުންތައް ނިންމުމުގެ ފުރިހަމަ ބާރު އޮންނާނީ ކުރިއެކޭވެސް އެއްގޮތަށް ފީފާގެ އަތުގައެވެ. މި ހުށަހެޅުން ކުރިއަށް އޮތްތަނުގައި ފީފާގެ 211 މެންބަރު ގައުމުގެ މައްޗަށް އެކުލެވޭ ކައުންސިލަށް ހުށަހެޅުމަށް ވަނީ ހަމަޖެހިފައެވެ.