އޮސްޓްރޭލިއާގެ ބޭންޑެއް ކަމަށްވާ 'ބިޔޯން އަގެއިން' އިން މާދަމާ ރޭ މާލޭގައި ބޭއްވުމަށް ހަމަޖެހިފައި އޮތް މިއުޒިކް ޝޯ ކެންސަލް ކުރަންޖެހުމުން، ކުރީގެ ރައީސް މުޙައްމަދު ނަޝީދު ނުރުހުންފާޅުކުރައްވައިފިއެވެ.

އުބާ އިވެންޓްސްއިން އިންތިޒާމުކޮށްގެން ސޯޝަލް ސެންޓަރުގައި ބޭއްވުމަށް ތައްޔާރުވަމުންދިޔަ މި ޝޯ އެތަނުގައި ކުރިއަށް ނުގެންދެވޭނެ ކަމަށް ޔޫތު އެމްޕަވަމަންޓް މިނިސްޓްރީން އިއްޔެގެ ވަގުތެއްގައި ކަމަށާ، މި އެންގުން އައިއިރު، ޝޯ ބޭއްވުމަށްޓަކައި ސޯޝަލް ސެންޓަރުގައި ސްޓޭޖު ބަހައްޓައި، އެންމެ ފަހުގެ ތައްޔާރީތައް ވަމުން ދިޔަ ކަމަށް މަޢުލޫމާތު ލިބެއެވެ.

މިކަމާ ގުޅިގެން ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، 'ބިޔޯން އަގެއިން' އަކީ ދުނިޔޭގެ މަޝްހޫރު ބޭންޑެއް ކަމަށްވާ 'އައްބާ' ގެ އެންމެ މަޝްހޫރު ޓްރިބިއުޓް ބޭންޑު ކަމަށެވެ. އަދި އެފަދަ ޝޯތަކާއި އަދި މިއުޒިކް މަނާކުރެވިގެން ނުވާނެ ކަމަށް އެމަނިކުފާނު ވިދާޅުވިއެވެ.

"އެ ޝޯ މަނާ ކުރެވިގެން، މިޔުޒިކު މަނާކުރެވިގެން ނުވާނެ. ރާއްޖޭގެ ޒުވާނުން އެދޭ ކަންކަން މި ރާއްޖޭގައި ހިންގެން ޖެހޭނެ. މިއީ ވަކި ބައެއްގެ ރާއްޖެއެއް ނޫން، މިއީ ހުރިހާ ދިވެހިންގެ ރާއްޖެ،" ނަޝީދުގެ ޕޯސްޓުގައި ވިދާޅުވިއެވެ.

މި ޝޯއަށް ބޭނުންވާ ސްޕޮންސަރުން ހޯދައި، ފުޅާ ދާއިރާއެއްގައި އިޝްތިހާރުކޮށް، ގިނަ އަދަދެއްގެ ޓިކެޓު ވެސް ވަނީ ވިއްކާފައެވެ. އަދި ޝޯގައި ހުށަހަޅައިދިނުމަށްޓަކައި ބޭންޑުގެ މެންބަރުން ރޭގެ ވަގުތެއްގައި ސިންގަޕޯ އެއާލައިންސްގެ ފްލައިޓުން ރާއްޖެ ވަނީ އައިސްފައެވެ.