ފުވައްމުލަކުގައި ހަށިވިއްކުމާއި ނާސިގެ ހިންގި މައްސަލައެއްގައި ދައުވާ އުފުލި ތިން މީހުންގެ ތެރެއިން ދެ މީހެއްގެ މައްޗަށް ކުށް ސާބިތުވެ، އެ މީހުން ޖަލަށްލުމަށް ފުވައްމުލަކު މެޖިސްޓްރޭޓް ކޯޓުން ހުކުމްކޮށްފިއެވެ.
މި މައްސަލާގައި ދައުވާ އުފުލާފައިވަނީ ފުވައްމުލަކަށް ނިސްބަތްވާ ފިރިހެނަކާއި ދެ އަންހެނުންގެ މައްޗަށެވެ.
އެމ މިހުންގެ މައްޗަށް ދައުލަތުން ޖުމްލަ ފަސް ދައުވާއެއް އުފުލާފައިވެއެވެ. އޭގެ ތެރޭގައި ނާސިގެއެއް ހެދުމުގެ ދައުވާ، ހަށިވިއްކުމުގެ ދައުވާ، ބްލެކްމެއިލް ކުރުމުގެ ދައުވާ، އޮރިޔާން ކާޑު ހެދުމުގެ ދައުވާ އަދި އެހެން މީހެއްގެ ރުހުމާ ނުލައި އެ މީހެއްގެ ޖިންސީ ގުނަވަނެއް ފެންނަ ގޮތަށް އޮރިޔާން ކާޑު ހެދުމުގެ ދައުވާ ހިމެނެއެވެ.
މި މައްސަލައިގައި ހިމެނޭ ތިން މީހުންގެ ތެރެއިން ކުށް ސާބިތުވެފައިވަނީ އެއް އަންހެނަކާއި ފިރިހެން މީހާގެ މައްޗަށެވެ.
ކޯޓުން ކުރި ހުކުމުގައިވާ ގޮތުން، ހަށިވިއްކުމުގެ ކުށް ސާބިތުވި އަންހެން މީހާ ހަތް އަހަރަށް ޖަލަށްލުމަށް ވަނީ ހުކުމްކޮށްފައެވެ. އަދި ނާސިގެ ހެދުމުގެ ކުށް ސާބިތުވި ފިރިހެން މީހާ ފަސް އަހަރު ދުވަހުގެ މުއްދަތަށް ޖަލަށްލުމަށް ކޯޓުން ވަނީ އަމުރުކޮށްފައެވެ.
މި މައްސަލައިގައި ހިމެނޭ ތިން މީހުންގެ މައްޗަށްވެސް ބްލެކްމެއިލް ކުރުމުގެ ދައުވާއާއި، އޮރިޔާން ކާޑު ހެދުމުގެ ދައުވާގެ އިތުރުން އެހެން މީހެއްގެ ރުހުމާ ނުލައި އޮރިޔާން ކާޑު ހެދުމުގެ ދައުވާ ކުރި ނަމަވެސް، އެއިން އެއްވެސް ދައުވާއެއް އެކެއްގެ މައްޗަށްވެސް ސާބިތުވެފައެއް ނުވެއެވެ.
މުޖުތަމައުގެ އާންމު އަހްލާގީ މިންގަނޑު ހިފެހެއްޓުމުގެ ގޮތުން، މި މައްސަލަތަކުގެ ޝަރީއަތް އާންމުކޮށް ހުޅުވައިނުލައި ސިއްރު މަޖިލިސްތަކެއްގައި ކުރިއަށް ގެންދިޔައިރު، މި މައްސަލަތަކުގެ ޝަރީއަތް ނިމުނު ގޮތުގެ މުޅި ރިޕޯޓުވެސް އާންމުކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
