ރާއްޖެއަށް މިއަދު ކުރަމުންދާ ބޯ ވިއްސާރައިގައި ވައިގަދަވެ ދުރު ފެންނަ މިންވަރު ދަށްވުމުން ވެލާނާ އިންޓަނޭޝަނަލް އެއާޕޯޓަށް ޖައްސަން އައި ބައިނަލްއަޤުވާމީ އެތައް ފްލައިޓެއް ލަސްވެ އެއް ފްލައިޓެއް ކޮލަމްބޯއަށް ޑައިވާޓުކޮށްފިއެވެ.

ފްލައިޓް ޓްރެކިން ޕްލެޓްފޯމް ފްލައިޓްރާޑާގެ މަޢުލޫމާތުތަކުން ދައްކާ ގޮތުގައި ފާއިތުވި ދެ ގަޑިއިރެއްހާ އިރު ތެރޭ ރާއްޖޭގެ ވައިގެ ސަރަޙައްދުގައި ގިނަ ބޯޓުތައް ޖައްސާނެ ފުރުޞަތެއް ނުލިބި ވައިގެ ތެރޭގައި ބުރުޖަހަމުން ދިޔައެވެ.

އެ ބޯޓުތަކުގެ ތެރޭގައި އެއިރޯފްލޮޓާއި ގަތަރު އެއާވޭސް އާއި ސްރީލަންކަން އެއާލައިންސް އާއި އިންޑިގޯ އަދި ފިޓްސްއެއާގެ ބޯޓުތައް ހިމެނެއެވެ. މީގެ އިތުރުން ސްރީލަންކާއިން ރާއްޖެ އައި ފްލައި ޑުބާއީގެ ފްލައިޓެއް ވަނީ އަނބުރާ ކޮލަމްބޯއަށް ފޮނުވައިލައިފައެވެ.

ވެލާނާ އެއާޕޯޓުގެ ފްލައިޓް ޝެޑިއުލް ވެބްސައިޓުގައިވާ ގޮތުން ބައިނަލްއަޤުވާމީ އެރައިވަލްގެ ހަތަރު ފްލައިޓެއް ލަސްވެފައިވެއެވެ. 

މޫސުމާ ބެހޭ ޤައުމީ އިދާރާ މެޓް އޮފީހުން ވަނީ ވިލާގަނޑުގައި ގަޑިއަކު 50 މޭލަށް ވައިގަދަވެދާނެ ކަމަށް ލަފާކޮށް 11:30 އާ ހަމައަށް ޔެލޯ އެލާޓެއް ނެރެފައެވެ.

އެ އިދާރާއިން އިއްޔެ ނެރުނު ބަޔާނުގައި ފާހަގަކޮށްފައިވާ ގޮތުގައި ހުޅަނގު މޫސުމާ ގުޅިގެން ރާއްޖޭގެ އުތުރާއި އިރުދެކުނުގައި އުފެދިފައި އޮތް ލޯޕްރެޝާ ޓަރަފްގެ ސަބަބުން ރާއްޖޭގެ ހުޅަނގުގައި ބޯ ވިއްސާރަ ވިލާ ގިނަ ޢަދަދަކަށް އުފެދެމުންދެއެވެ.

މި ވިއްސާރައިގެ ތެރެއިން މޫސުން އެންމެ ގޯސްވާނެ ދުވަހަކީ މިއަދު ކަމަށް އެ ބަޔާނުގައި ބުނެފައިވެއެވެ.

މެޓް އޮފީހުގެ ލަފާކުރުންތައް ދައްކާ ގޮތުން މާދަމާ އާއި އޭގެ އަނެއް ދުވަހު ވެސް މުޅި ރާއްޖެއަށް މޫސުން ގޯސްވާނެއެވެ.