އިރާނަށް ދޭން ރާވާފައިވާ ވަރުގަދަ އަސްކަރީ ހަމަލާތަކެއް ކުއްލި ގޮތަކަށް މަޑުޖައްސާލާފައިވާކަން އެމެރިކާގެ ރައީސް ޑޮނަލްޑް ޓްރަމްޕް، އިޢުލާން ކޮށްފިއެވެ.
ޓްރަމްޕް މިކަން ހާމަކުރީ އޭނާގެ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައި ކުރި ޕޯސްޓެއްގައެވެ.
ޓްރަމްޕް ބުނީ އިރާނާއެކު "އަވަސް" އެއްބަސްވުމަކަށް އާދެވޭނެ ކަމުގެ އުންމީދުގައި ހަމަލާތައް ކެންސަލް ކުރަން ނިންމީ، އިރާނާއި މެދުއިރުމަތީގެ ބައެއް އެހެން ގައުމުތަކުން އެކަމަށް އެދުމުން ކަމަށެވެ. މި އެއްބަސްވުމުގެ ދަށުން ހޯރްމޫޒް ކަނޑުއޮޅި ވަގުތުން ހުޅުވާލުމާއި، އިރާނުގެ ނިއުކްލިއަރ ބިރުވެރިކަން ނިމުމަކަށް ގެންނަން ޖެހޭނެ ކަމަށް ޓްރަމްޕް ބުންޏެވެ.
މި ނިންމުމަކީ އިޒްރޭލާއެކު މަޝްވަރާ ކުރުމަށްފަހު ނިންމި ނިންމުމެއް ކަމަށް ޓްރަމްޕް ބުނެއެވެ. އޭނާ އިތުރަށް ބުނީ އެމެރިކާ އޮތީ ދެވަނަ ބޮޑު ހަނގުރާމައަށްފަހު ނުފެންނަ ފަދަ ވަރުގަދަ ބާރަކާއެކު އިރާނާ ދެކޮޅަށް ހަމަލާދޭން ތައްޔާރަށް ކަމަށެވެ. ނަމަވެސް މިހާރު އެއްބަސްވުމެއްގެ އަސާސްތަކަށް ވާސިލްވެވިފައިވާ ކަމަށް އޭނާ އިޝާރާތް ކޮށްފައިވެއެވެ.
މި ހަމަލާތައް މަޑުޖައްސާލާފައި މިވަނީ، އެމެރިކާއިން އިރާނުގެ ހަކަތަ އުފައްދާ މަރުކަޒުތަކަށް ވަރުގަދަ ހަމަލާތަކެއް ދޭން އުޅޭ ކަމުގެ ރިޕޯޓްތައް ފެތުރިފައި ވަނިކޮށެވެ. މީގެ ކުރިން ބޭއްވި ކެބިނެޓް ބައްދަލުވުމެއްގައި ޓްރަމްޕް ވަނީ އިރާނަށް ވަރަށް ވަރުގަދަ ހަމަލާދޭނެ ކަމުގެ އިންޒާރު ދީފައެވެ.
މި ނިންމުމުގެ ކުރިން، ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާން ޓްރަމްޕާ ފޯނުން ގުޅުއްވައި، ހަމަލާތަކުގެ ސަބަބުން ސަރަހައްދަށް ކުރިމަތިވެދާނެ ނުރައްކަލާ މެދު ކަންބޮޑުވުން ފާޅުކުރެއްވި ކަމަށް ރިޕޯޓްތައް ބުނެއެވެ. އިރާނުން ބުނެފައިވަނީ އެމެރިކާއާ ގުޅިގެން މަސައްކަތްކުރާ ކޮންމެ ގައުމެއް "ހަނގުރާމައިގެ އަލިފާނުގެ ތެރެއަށް" ވެއްޓޭނެ ކަމަށެވެ.
އެމެރިކާ ސަރުކާރުން ވަނީ މެދުއިރުމަތީގައި ތިބި އެމެރިކާގެ ރައްޔިތުން ސަމާލުވުމަށާއި، މަސްލަހަތު ގޯސްވެއްޖެ ހާލަތެއްގައި ފުރަން ތައްޔާރުވެ ތިބުމަށް އިލްތިމާސްކޮށްފައެވެ.
މިދިޔަ ފެބްރުއަރީ 28 އިން ފެށިގެން އެމެރިކާއާއި އިޒްރޭލުން ދަނީ އިރާނަށް ހަމަލާތައް ދެމުންނެވެ. މި ހަމަނުޖެހުންތަކުގެ ސަބަބުން ދުނިޔޭގެ ބާޒާރުގައި ތެލުގެ އަގަށް ވެސް ވަނީ ބޮޑެތި ބަދަލުތަކެއް އައިސްފައެވެ.
ޓްރަމްޕްގެ މި އިޢުލާނާ ގުޅިގެން އިރާނުން އަދި ރަސްމީކޮށް އެއްޗެއް ބުނެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
