ޅ. ނައިފަރު ފަތިސް ޖަމްޢިއްޔާއިން އިސްނަގައިގެން ބާއްވަމުން އަންނަ ކާމިޔާބު "ވިޔަނަ ކޭމްޕް" ގެ 2026 ވަނަ އަހަރުގެ އެޑިޝަން މާދަމާ ނ. މާފަރުގައި ފެށުމަށްޓަކައި އެ ރަށުގެ މުވައްސަސާތަކާއި ޖަމްޢިއްޔާތަކުން ފުރިހަމައަށް ތައްޔާރުވެއްޖެއެވެ.

ސޮސައިޓީ ފޯ މާފަރު ޑިވެލޮޕްމަންޓާއި ގުޅިގެން ކުރިއަށްގެންދާ މި ކޭމްޕް އޮންނާނީ އޯގަސްޓް 6 އިން 8 އަށެވެ. ކޭމްޕުގެ ތައްޔާރީތަކަށް ފަތިސް ޖަމިއްޔާގެ ޓީމު އެ ރަށަށް ދާން ފަށާފައިވާއިރު މާފަރުން ވަނީ ޓީމުގެ މެންބަރުންނަށް ވަރަށް ހޫނު މަރުހަބާއެއް ކިޔާފައެވެ.

ފަތިސް ޖަމްޢިއްޔާއިން މަޢުލޫމާތު ދޭ ގޮތުގައި، މި ކޭމްޕަށް މާފަރުގެ އެކި ޖަމްޢިއްޔާތަކާއި، ސަރުކާރުގެ މުވައްސަސާތަކުގެ އިތުރުން ރަށުގެ އާންމު ރައްޔިތުން އަންނަނީ ވަރަށް ފޯރިއާއެކު ތައްޔާރުވަމުންނެވެ.

މި ޕްރޮގްރާމްގެ އެންމެ މުހިންމު އެއް އަމާޒަކީ ދީނީ ޢިލްމުވެރިންނާއި ތަޖުރިބާކާރު ފެސިލިޓޭޓަރުންގެ އެހީތެރިކަމާއެކު، މުޖުތަމަޢުއަށް ފައިދާހުރި ދީނީ އަދި ދުނިޔަވީ ލީޑަރޝިޕް ސިފަތައް ހުރި ޝަޚުޞިއްޔަތުތަކެއް އުފެއްދުމެވެ. އަދި މިއީ ކުށުގެވެށިން ސަލާމަތްވެ އިސްލާޙުވާން ބޭނުންވާ ފަރާތްތަކަށްވެސް ހުޅުވާލެވިފައިވާ ފުރުޞަތެކެވެ.

މި އަހަރުގެ ކޭމްޕްގައި ޖުމްލަ 18 ބައިވެރިންނާއި 8 ފެސިލިޓޭޓަރުން ބައިވެރިވާނެއެވެ. ކޭމްޕްގެ ތެރޭގައި އަމިއްލަ ނަފުސު އިސްލާހުކުރުމާއި، ލީޑަރޝިޕް ހުނަރުތަކާއި، އިމޯޝަނަލް އިންޓެލިޖެންސް އަދި މުޖުތަމަޢު އިސްލާޙުކުރުމުގައި ފަރުދީ ޒިންމާއާ ގުޅޭގޮތުން ބައިވެރިންނަށް މަޢުލޫމާތު ދެވޭނެއެވެ.

މީގެ އިތުރުން، މާފަރުގެ ރައްޔިތުންނަށް އަމާޒުކޮށްގެން ދީނީ ދަރުސްތަކާއި، ދަރިވަރުންނަށް ޚާއްޞަ ސްޓަޑީ ކޭމްޕްތަކާއި، ޓީމް ބިލްޑިންގ ހަރަކާތްތަކުގެ އިތުރުން ކުޅިވަރުގެ ތަފާތު ހަރަކާތްތައް ކުރިއަށް ގެންދިއުމަށް ވަނީ ރޭވިފައެވެ.

"ވިޔަނަ ކޭމްޕް" އަކީ 2022 ވަނަ އަހަރުން ފެށިގެން މެދުކެނޑުމެއްނެތި ބާއްވަމުން އަންނަ ޕްރޮގްރާމެކެވެ. މީގެ ކުރިން މި ކޭމްޕް ވަނީ ރ. މީދޫ، ރ. ހުޅުދުއްފާރު، ށ. ފޯކައިދޫ އަދި ރ. ކިނޮޅޮހުގައި ކާމިޔާބުކަމާއެކު ކުރިއަށް ގެންގޮސްފައެވެ. މިއީ މި ޕްރޮގްރާމް ހިންގާ 5 ވަނަ އަހަރެވެ.