މުސްތަގުބަލުގެ ޖީލުތަކަށް ހަރުދަނާ ޑިމޮކްރަސީތަކާއި ދުޅަހެޔޮ އިޤުތިޞާދުތައް ކަށަވަރުކޮށްދެވޭނީ ނަޒާހަތްތެރިކަމާއި ޖަވާބުދާރީވުމާއި ދެފުށް ފެންނަ ގޮތްތަކާއި އީޖާދީ ވުނަކުރުންމަތީ އެންމެން ގުޅިގެން މަސައްކަތް ކޮށްގެން ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ކުދި ޖަޒީރާ ޤައުމުތަކުގެ އުއްތަމަ އޮޑިޓް މުއައްސަސާތަކުގެ ސިމްޕޯޒިއަމް (ސިޑްސް-އެސް.އޭ.އައި) ނިންމުމާއި އިންޓޮސާއީ ޑިވެލޮޕްމެންޓް އިނީޝިއޭޓިވް (އައި.ޑީ.އައި) ގެ ގްލޯބަލް ސަމިޓް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ޙަޤީޤީ ވިލުންތެރިކަމެއް ބިނާވާނީ ހަރުދަނާ މުއައްސަސާތަކުގެ މައްޗަށް ކަމަށެވެ.

ޒިންމާދާރުކަމާ އެކު މާލީ ކަންކަން ހިންގައި ދެފުށް ފެންނަ އުސޫލުތައް ޤާއިމުކޮށްގެން ވިލުންތެރިކަން ދެމެހެއްޓޭނެ ކަމަށާއި ސަރުކާރަށް ރައްޔިތުން ކުރާ އިތުބާރު ނެތި އެ ވިލުންތެރިކަން ދެމި ނޯންނާނެ ކަމަށް ވެސް އެމަނިކުފާނު ވިދާޅުވިއެވެ. އެ ސަބަބާ ހުރެ މި ދަނޑިވަޅުގައި ދައުލަތްތަކުގެ އުއްތަމަ އޮޑިޓް މުއައްސަސާތަކުގެ ދައުރު ނުހަނު ބޮޑު ކަމުގައި ފާހަގަކުރެއްވިއެވެ.

ރައީސް ވިދާޅުވީ ރައްޔިތުން ދައުލަތުގެ މާލިއްޔަތަށް ދައްކާ ކޮންމެ ޑޮލަރެއް ވެސް ތަރައްޤީގެ ބައިވެރިން ފޯރުކޮށްދޭ ކޮންމެ ޑޮލަރެއް ވެސް ހޭދަކުރެވެން ވާނީ ކަނޑައެޅިފައިވާ މަޤުޞަދަށް ކަމަށެވެ. ޖަވާބުދާރީވުމަކީ ހިންގުމުގެ މަސްއޫލިއްޔަތެއް އެކަނި ނޫން ކަމަށާއި އެއީ ޤައުމީ އިސްތިރާޖީ މުދަލެއް ކަމަށާއި ކުރިއެރުމުގެ އިންޖީނެއް ކަމުގައި ވެސް ސިފަކުރެއްވިއެވެ.

ކުދި ޖަޒީރާ ޤައުމުތަކަށް ދިމާވާ ޚާއްޞަ ގޮންޖެހުންތަކާ ބެހޭ ގޮތުން ވާހަކަފުޅު ދައްކަވަމުން ރައީސް ފާހަގަކުރެއްވީ އެ ޤައުމުތަކަކީ ދަރަނި ބަލަހައްޓަމުން މުސްތަގުބަލަށް ވުނަކުރާ ދުރު ރާސްތާގެ ހަމަޖެހުމަށް ވިސްނައި ކުއްލި ޙާލަތްތަކާ ކުރިމަތިލާ އަދި އިޤުތިޞާދީ ކުރިއެރުން ދަމަހައްޓަމުން ނާޒުކު މުޖުތަމަޢުތައް ރައްކާތެރިކުރަމުންދާ ޤައުމުތަކެއް ކަމަށެވެ.

ބައިނަލްއަޤުވާމީ ނުތަނަވަސްކަމާއި ބޭރުގެ ފިއްތުންތަކާ އެކުގައި ވެސް ރާއްޖެއިން މާލީ އިލްތިޒާމުތައް ފުއްދަމުން ޤައުމުގެ މުސްތަގުބަލަށް ވުނަކުރަމުންދާ ކަން ވެސް އެމަނިކުފާނު ފާހަގަކުރެއްވިއެވެ.

ހިންގުމުގެ ނިޒާމުގެ ކުރިމަގާ ގުޅޭ ގޮތުން ރައީސް ވިދާޅުވީ ޖޯގުރަފީއާއި ދުރު ރާސްތާއާއި ޤާބިލުކަން ނެތުމުގެ ސަބަބުން ޖަޒީރާ ޤައުމުތަކަށް ކުރިމަތިވާ ބައެއް މައްސަލަތައް ޑިޖިޓަލް ޓްރާންސްފޯމޭޝަނަކުން ޙައްލުކުރެވިދާނެ ކަމަށެވެ.

އެ ގޮތުން މޯލްޑިވްސް 2.0 މެދުވެރިކޮށް ޒަމާނީ ރައްޔިތުންނަށް ލުއިފަސޭހަ ޑިޖިޓަލް ދައުލަތެއް ބިނާކުރުމުގެ މަސައްކަތް ސަރުކާރުން ކުރިއަށް ގެންދާ ކަން ފާހަގަކުރައްވައި ފަންނިއްޔާތަކީ ހަމައެކަނި އީޖާދީ އެޖެންޑާއެއް ނޫން ކަމަށާއި ހިންގުމާއި ތަރައްޤީ އަދި ވިލުންތެރިކަމަށް ކުދި ޖަޒީރާ ޤައުމުތަކަށް ބޭނުންކުރެވޭނެ ވަސީލަތެއް ކަމުގައި ވިދާޅުވިއެވެ.

މި ރަސްމިއްޔާތުގައި ރައީސް ވަނީ އޮޑިޓަރ ޖެނެރަލް އޮފީހުގެ 2026 އިން 2029 އަށް ހިންގާ ސްޓްރެޓީޖިކް ޕްލޭން ވެސް އިފުތިތާހުކޮށްދެއްވާފައެވެ. ދެމެހެއްޓެނިވި އުސޫލުތަކަށް ނަން މަޝްހޫރު އަރިއަތޮޅު އުތުރުބުރީ އުކުޅަހުގައި ބޭއްވި މި ސިމްޕޯޒިއަމްގައި ކުދި ޖަޒީރާ ޤައުމުތައް ތަމްސީލުކުރާ އުއްތަމަ އޮޑިޓް މުއައްސަސާތަކުން ބައިވެރިވެ ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުކުރުމަށް ޤައުމުތަކުގެ ޤާބިލިއްޔަތު އިތުރުކުރެވޭނެ ގޮތްތަކާ މެދު ޢިލްމު ހިއްސާކޮށް މަޝްވަރާ ކޮށްފައިވެއެވެ.