ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް ހެލްތު ސައިންސަސް އާއި ފެކަލްޓީ އޮފް އާޓްސްގެ ޑީނުން ރަސްމީކޮށް މަޤާމަށް އައްޔަންކުރުމުގެ ރަސްމިއްޔާތު މިއަދު ބާއްވައިފިއެވެ.

މި ރަސްމިއްޔާތުގައި ފެކަލްޓީ އޮފް ހެލްތު ސައިންސަސްގެ ޑީންގެ މަޤާމަށް އައްޔަންކުރެއްވީ ޑރ. އާއިޝަތު ސަނޫރާއެވެ. އަދި ފެކަލްޓީ އޮފް އާޓްސްގެ ޑީންގެ މަޤާމަށް އައްޔަންކުރެއްވީ ޑރ. އާމިނަތު ރިޔާޒެވެ. މިއީ މަތީ ތަޢުލީމު ކުރިއެރުވުމަށާއި، އެކަޑަމިކް ދާއިރާއިން ފާހަގަކޮށްލެވޭ ކާމިޔާބީތައް ހޯދުމަށް ޔުނިވަރސިޓީން ކުރަމުންދާ މަސައްކަތްތަކަށް ލިބުނު މުހިންމު ކުރިއެރުމެއް ކަމަށް އެމްއެންޔޫއިން ބުނެއެވެ.

މަޤާމާ ހަވާލުވެވަޑައިގަތުމަށްފަހު ދެއްކެވި ވާހަކަފުޅުގައި، ޑރ. އާއިޝަތު ސަނޫރާ ވަނީ ކުރިއަށް އޮތް ހަތަރު އަހަރަށް އެކަމަނާ ގެންގުޅުއްވާ ތަޞައްވުރު ހިއްސާކުރައްވާފައެވެ. އެކަމަނާ ވިދާޅުވީ، ޤައުމީ ފެންވަރުގައި އިސްކަންދޭ ދާއިރާތަކުން އައު ޕްރޮގްރާމްތައް ތަޢާރަފްކޮށް، ޕޯސްޓްގްރެޖުއޭޓް ތަޢުލީމީ ނިޒާމު ވަރުގަދަކުރުމަކީ އަމާޒެއް ކަމަށެވެ. މީގެ އިތުރުން، މެޑިކަލް ދާއިރާގެ އެންމެ ފަހުގެ ޓެކްނޮލޮޖީތަކަށް ދަރިވަރުން އަހުލުވެރިކުރުވުމަށް މަސައްކަތް ކުރައްވާނެ ކަމަށްވެސް ވިދާޅުވިއެވެ.

ފެކަލްޓީ އޮފް އާޓްސްގެ އައު ޑީން ޑރ. އާމިނަތު ރިޔާޒުގެ ވާހަކަފުޅުގައި ބޮޑަށް އަލިއަޅުއްވާލެއްވީ، އެކަޑަމިކް އުނގެނުމުގެ ފައިދާ މުޅި މުޖުތަމަޢަށް ފޯރުކޮށްދިނުމަށެވެ. ޑރ. ރިޔާޒު ވިދާޅުވީ، ދަރިވަރުންނަކީ ހަމައެކަނި ފެންވަރު ރަނގަޅު ތަޢުލީމެއް ހާސިލްކުރާ ބަޔަކަށްވުމުގެ ބަދަލުގައި، މުޖުތަމަޢަށް އަމަލީ ގޮތުން ޚިދުމަތްކުރާ، އަދި އިލްމީ ދިރާސާތަކާއި ލިޔުންތައް އުފައްދާ ބަޔަކަށް ހެދުމަށް މަސައްކަތް ކުރައްވާނެ ކަމަށެވެ.

އެމްއެންޔޫއިން ބުނީ، މި ދެ އައްޔަންކުރުމަކީ ޔުނިވަރސިޓީގެ ހިންގުން ހަރުދަނާކޮށް، ދަރިވަރުންނަކީ ބައިނަލްއަޤުވާމީ ފެންވަރުގައި ފައިހަމަކުރެވޭނެ ފަދަ ޤާބިލު ބަޔަކަށް ހެދުމަށް ކުރާ މަސައްކަތުގެ ބައެއް ކަމަށެވެ.