ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އިން 2026 ވަނަ އަހަރުގެ ދެވަނަ ސެމިސްޓަރގައި ފެކަލްޓީ އޮފް އެގްރިކަލްޗަރ އެންޑް ފުޑް ސައިންސަސްގެ ދަށުން އިތުރު ތިން ޕްރޮގްރާމެއްގައި ބައިވެރިވުމުގެ ފުރުސަތު މިއަދު ހުޅުވާލައިފިއެވެ.

އެމްއެންޔޫއިން ބުނީ، އަންނަ 2026 ވަނަ އަހަރުގެ އޮގަސްޓް މަހު ފެށުމަށް ހަމަޖެހިފައިވާ މި ކޯސްތަކަކީ މާލެ ކެމްޕަހުގައި ފުލްޓައިމްކޮށް ކުރިއަށް ގެންދިއުމަށް ހަމަޖެހިފައިވާ ކޯސްތަކެއް ކަމަށެވެ. އަލަށް ހުޅުވާލި މި ތިން ޕްރޮގްރާމަކީ:

ޑިޕްލޮމާ އިން އެގްރިކަލްޗަރަލް ސައިންސް

އެޑްވާންސްޑް ޑިޕްލޮމާ އިން ފުޑް ސައިންސް (ފުޑް ސޭފްޓީ އެންޑް ކޮލިޓީ އެޝުއަރެންސް)

ބެޗްލަރ އޮފް ސައިންސް އިން ފުޑް ސައިންސް (ފުޑް ސޭފްޓީ އެންޑް ކޮލިޓީ އެޝުއަރެންސް)

މި ކޯސްތަކަކީ ރާއްޖޭގެ ކާނާގެ ރައްކާތެރިކަން ކަށަވަރުކުރުމަށާއި، ދެމެހެއްޓެނިވި ތަރައްގީއާއި މި ދާއިރާއިން އާ އީޖާދުތައް ކުރިއެރުވުމަށް ބޭނުންވާ ގާބިލު މީހުން ބިނާކުރުމަށް އެމްއެންޔޫއިން ކުރަމުންދާ މަސައްކަތުގެ ބައެކެވެ. މިއީ މަތީ ތައުލީމުގެ ފުރުސަތުތައް ފުޅާކޮށް، ގައުމަށް ބޭނުންތެރި ދާއިރާތަކުން މީހުން ތަމްރީނުކުރުމަށް އެ ޔުނިވަރސިޓީން ދޭ އިސްކަން ހާމަކޮށްދޭ ކަމެކެވެ.

ކޯސްތަކަށް ކުރިމަތިލުމުގެ އެންމެ ފަހު ސުންގަޑިއަކީ 30 ޖުލައި 2026 ވާ ބުރާސްފަތި ދުވަހުގެ 14:00 އެވެ. ކޯސްތަކަށް އެދި ހުށަހަޅަންޖެހޭނީ އެމްއެންޔޫގެ ސްޓޫޑަންޓް ޕޯޓަލް މެދުވެރިކޮށް އޮންލައިންކޮށެވެ.

ކޯސްތަކާ ގުޅޭ އިތުރު މައުލޫމާތާއި، ޝަރުތުތައް އަދި ދަރިވަރުން ހޮވުމުގައި އަމަލުކުރާނެ އުސޫލުތައް އެމްއެންޔޫގެ ވެބްސައިޓް courses.mnu.edu.mv އިން ލިބެން ހުންނާނެއެވެ. މީގެ އިތުރުން، އިތުރު މައުލޫމާތު ސާފުކުރުމަށް އެ ޔުނިވަރސިޓީގެ ދަރިވަރުންގެ ހިދުމަތްތަކާ ބެހޭ ބަޔަށް 1445 އަށް ގުޅުއްވުމުން ނުވަތަ [email protected] އަށް އީމެއިލް ކުރެއްވުމުން މައުލޫމާތު ލިބިވަޑައިގަންނަވާނެ ކަމަށް އެމްއެންޔޫއިން ބުނެއެވެ.