ދިވެހިރާއްޖޭގެ ވެރިކަމުގެ ނިޒާމަށާއި ގާނޫނުއަސާސީއަށް ބަދަލުތައް ގެނައުމަށް ކުރީގެ ރައީސް މުޙައްމަދު ނަޝީދު އާއި އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް އިސްވެ ފެއްޓެވި "ބޮޑުބަދަލު"އާ ގުޅޭ މައުލޫމާތު ދިނުމަށާއި، އެއަށް ރައްޔިތުންގެ ހިޔާލު ހޯދުމަށް ހާއްސަ ވެބްސައިޓެއް މިއަދު އިފްތިތާހުކޮށްފިއެވެ.
މި ވެބްސައިޓް އިފްތިތާހު ކޮށްދެއްވީ އެމްޑީޕީގެ ޗެއާޕާސަން މުހައްމަދު ނަޝީދެވެ. މިއީ ރާއްޖެ ހިންގުމުގެ ނިޒާމަށް ގެންނަންޖެހޭ ބަދަލުތަކާ ގުޅޭގޮތުން އެމްޑީޕީން ކުރިއަށްގެންދާ "ބޮޑުބަދަލު" ކެމްޕޭނުގެ ތެރެއިން ކުރިއަށްދާ މަސައްކަތެކެވެ.
މިކަމާ ގުޅިގެން އެމްޑީޕީގެ ކުރީގެ ޗެއަރޕާސަން ފައްޔާޒު އިސްމާއީލް އެކްސްގައި ކުރެއްވި ޕޯސްޓެއްގައި ވިދާޅުވީ، ފެހި ގާނޫނުއަސާސީގެ ދަށުން ފާއިތުވި 18 އަހަރު ކުރެވުނު ތަޖުރިބާތަކަށް ބަލާއިރު، ރާއްޖެ ހިންގުމުގެ ވައްޓަފާޅިއަށް ބޮޑު ބަދަލެއް އަންނަންޖެހޭ ކަމަށެވެ.
ޚާއްޞަކޮށް ރައީސުލްޖުމްހޫރިއްޔާގެ ހައްދެއް ނެތް ބާރުތަކާއި، ރައްޔިތުންގެ ވޯޓުން ހޮވާ ރައްޔިތުންގެ މަޖިލިސް ސަރުކާރުގެ "ގޮނޑިކޮއްކޮ" މަޖިލީހަކަށް ބަދަލުވުމުގެ މައްސަލައަށް ހައްލެއް ބޭނުންވާކަން ފައްޔާޒު ފާހަގަކުރެއްވިއެވެ.
މީގެ އިތުރުން، ސިޔާސީ ނުފޫޒާއި ގަޑުބަޑުކުރުމުގެ ތެރޭގައި ތާށިވެފައިވާ ޝަރުއީ ނިޒާމަށްވެސް އަވަސް ފަރުވާތަކެއް ބޭނުންވާކަމަށް އޭނާ ވިދާޅުވިއެވެ.
ފައްޔާޒު އިތުރަށް ވިދާޅުވީ، އެމްޑީޕީން ހުށަހަޅާ "ބޮޑު ބަދަލަކީ" ދައުލަތުގެ ބާރުތައް ހަގީގީ ގޮތެއްގައި ވަކިވެފައިވާ، އަދި ރައްޔިތުންގެ ފުރިހަމަ ބައިވެރިވުމާއި ބާރުވެރިކަން ލިބިގެންދާނެ ބަދަލުތަކެއް ކަމަށެވެ. އަދި މި ހުށަހެޅުންތައް ފުރިހަމަވާނީ ގާނޫނުއަސާސީއާއި ބޮޑު ބަދަލުގައި ހުރި ކަންކަމާމެދު ރައްޔިތުންގެ ހިޔާލާއި ފާޑުކިޔުން ލިބިގެން ކަމަށްވެސް އޭނާ ވިދާޅުވިއެވެ.
އެމްޑީޕީން ވަނީ އަލަށް ލޯންޗުކުރި ވެބްސައިޓް މެދުވެރިކޮށް ވީހާވެސް ގިނަ ރައްޔިތުން އެ ބޭފުޅުންގެ ހިޔާލާއި މަޝްވަރާ ހިއްސާކުރުމަށް އެދިފައެވެ.
Advertisement
This content is created and paid for by advertisers and does not involve Voice Journalists
