ކެނެޑާގެ ވިކްޓޯރިއާއިން ޓޮރޮންޓޯއަށް ދަތުރުކުރަން ތައްޔާރުވި ޕޯޓަރ އެއަރލައިންސްގެ ފްލައިޓެއް، ކުޑަކުއްޖަކު ސީޓްބެލްޓް އަޅަން ދެކޮޅުހެދުމުގެ ސަބަބުން ކެންސަލްކޮށްފިއެވެ.
މި މަހުގެ 6 ވަނަ ދުވަހު ހިނގި މި ހާދިސާގައި، ފްލައިޓް ނައްޓާލަން ތައްޔާރުވަމުން ދަނިކޮށް އެ ކުއްޖާ ވަނީ ގޮނޑިން ތެދުވެ ސީޓްބެލްޓް އެޅުމަށް އިންކާރުކޮށްފައެވެ. އެއަރލައިނުން ބުނި ގޮތުގައި، ކުއްޖާގެ ބެލެނިވެރިޔާއާއި ފްލައިޓްގެ ކުރޫއިން އެ ކުއްޖާ މައިތިރިކޮށް ސީޓްބެލްޓް އެޅުވުމަށް ކުރި މަސައްކަތް ވަނީ ނާކާމިޔާބުވެފައެވެ.
"މިފަދަ ނުރައްކާތެރި ހާލަތެއްގައި ބޯޓު ނައްޓައެއް ނުލެވޭނެ. އެހެންކަމުން ކުރޫއިން ނިންމީ އަނބުރާ ޓާމިނަލަށް ގޮސް އެ ދެ ފަސިންޖަރުން ބޯޓުން ބޭލުމަށް،" ޕޯޓަރ އެއަރލައިންސްގެ ބަޔާނުގައިވެއެވެ.
މި ހާދިސާއާ ގުޅިގެން ބޯޓު ލަސްވުމުގެ ސަބަބުން، ދެން އޮތް ވަގުތަކީ ރަންވޭ ބަންދުކުރާ ވަގުތަށް ވުމުން މުޅި ފްލައިޓް ކެންސަލްކުރަން ޖެހުނެވެ. މީގެ ސަބަބުން ހުރިހާ ފަސިންޖަރުންނަށް ޖެހުނީ އަނެއް ދުވަހުގެ ފްލައިޓަކުން ދަތުރުކުރުމަށް ބުކިން ބަދަލުކުރާށެވެ.
މި ހާދިސާއާ ގުޅިގެން އާންމުންގެ މެދުގައި ވަނީ ބޮޑު ބަހުސެއް އުފެދިފައެވެ. ބައެއް މީހުން ބުނާ ގޮތުގައި މިއީ ބެލެނިވެރިން ކުދިންނަށް މާ ބޮޑަށް ދޫދިނުމުން ދިމާވާ ކަންކަމެވެ. ނަމަވެސް ބޯޓުގައި ހުރި ފަސިންޖަރެއް ކަމަށްވާ އާރްޔާ ކޮޒޫކް ބުނީ، އެ ކުއްޖާ އުޅުނީ ބަސްނާހައިގެން ނޫން ކަމަށާއި، ކުއްޖާ ހުރީ ވަރަށް ބޮޑަށް ބިރުގެންފައި ކަމަށެވެ.
"އެ ކުއްޖާ ދިޔައީ ގޮނޑި ދަށަށް ވަދެ ފިލަން މަސައްކަތް ކުރަމުން،" އޭނާ ކިޔައިދިނެވެ.
އޭވިއޭޝަން ސޭފްޓީ އެކްސްޕާޓް ލިއާ ޓޫސޯ ވިދާޅުވި ގޮތުގައި، ސީޓްބެލްޓް ނާޅާ ތިބޭ ކުދިންނަކީ ބޯޓަށް ދިމާވާ ލޮޅުންތަކުގެ ވަގުތުގައި ނުވަތަ ނައްޓާލާ ވަގުތާއި ޖައްސާ ވަގުތު އެހެން ފަސިންޖަރުންގެ ގަޔަށް ވިއްސައިގެން ގޮސް ނުރައްކާވެދާނެ ބައެކެވެ. އެހެންކަމުން އެއަރލައިންގެ ނިންމުމަކީ ސަލާމަތީ ގޮތުން ރަނގަޅު ނިންމުމެއް ކަމަށް އޭނާ ފާހަގަކުރެއްވިއެވެ.
މިފަދަ ހާދިސާއެއް 2018 ވަނަ އަހަރު ސައުތުވެސްޓް އެއަރލައިންސްގައި ވެސް ވަނީ ހިނގާފައެވެ. އެ ފަހަރު ކުޑަކުއްޖަކު ބަސްނާހައިގެން އުޅުމުން، ބޯޓު ނައްޓާލުމުގެ ކުރިން ބައްޕައާއި ދަރިފުޅު ބޯޓުން ބާލާފައިވެއެވެ.
Advertisement
This content is created and paid for by advertisers and does not involve Voice Journalists
