ދިވެހި ޒުވާނުންނަކީ ގައުމުގެ އެންމެ ބޮޑު އެއް ބާރު ކަމަށާ، ޒުވާނުން ބާރުވެރިކުރުވުމަށް ސަރުކާރުން މަސައްކަތް ކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ބައިނަލްއަގުވާމީ ޒުވާނުންގެ ދުވަހުގެ މުނާސަބަތުގައި މިއަދު އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، ދިވެހި ޒުވާނުންގެ އުފެއްދުންތެރިކަމާއި، ހިތްވަރާއި، އަދި ސާބިތުކަމަކީ މިއަދު ރާއްޖޭގެ މުޖުތަމައުތަކާއި މުޅި ގައުމު ބައްޓަންކުރުމުގައި މުހިންމު ދައުރެއް އަދާކުރާ ސިފަތަކެއް ކަމަށެވެ.
ރާއްޖޭގެ އާބާދީގެ ގާތްގަނޑަކަށް 45 އިންސައްތައަކީ ޒުވާނުންކަން ފާހަގަކުރައްވަމުން ރައީސް ވިދާޅުވީ، ގައުމުގެ މުސްތަގުބަލު ބިނާވެފައިވަނީ ޒުވާނުންގެ އުންމީދުތަކުގެ މައްޗަށް ކަމަށެވެ. އެގޮތުން ޒުވާނުންނަށް މަތީ ތައުލީމާއި، ހުނަރު ތަރައްގީކުރުމުގެ ފުރުސަތުތަކާއި، އަދި މާނަހުރި ވަޒީފާގެ ފުރުސަތުތައް ފަހިކޮށްދިނުމަށް މި ސަރުކާރުން ދޭ އިސްކަން އެމަނިކުފާނު ތަކުރާރުކުރެއްވިއެވެ.
ޒުވާނުން ވަޒީފާގެ މައިދާނަށް އަހުލުވެރިކުރުވުމަށް ސަރުކާރުން ކުރިއަށްގެންދާ މުހިންމު މަޝްރޫއުތަކަށް އަލިއަޅުވާލައްވަމުން ރައީސް ވިދާޅުވީ، "ނޭޝަނަލް އެޕްރެންޓިސްޝިޕް ޕްރޮގްރާމް" އާއި "ނޭޝަނަލް ސާވިސް ޕްރޮގްރާމް" ފަދަ އިސްނެގުންތަކުގެ ސަބަބުން ތައުލީމީ މަރުހަލާއިން ވަޒީފާގެ މައިދާނަށް ވާސިލުވުމަށް ހުރި މަގުތައް އިތުރަށް ހަރުދަނާވެގެންދާނެ ކަމަށެވެ.
ރައީސް މުއިއްޒު އިތުރަށް ވިދާޅުވީ ޒުވާނުންގެ އަތްމަތީގައި ރާއްޖޭގެ މިއަދާއި މުސްތަގުބަލު އޮތީ އަމާންކަމާއެކު ކަމަށާއި، އެމީހުންގެ މަސައްކަތުން ރާއްޖެއަށް ފާގަތިކަމާއި، ދެމެހެއްޓެނިވި ތަރައްގީ ލިބޭނެކަމުގެ ފުރިހަމަ ޔަގީންކަން އެބައޮތް ކަމަށެވެ.
Advertisement
This content is created and paid for by advertisers and does not involve Voice Journalists
