ތުއްތު ކުއްޖަކު، އާއިލާގެ އިޒުނައެއް ނެތި ދައުލަތުގެ ބެލުމުގެ ދަށަށް ގެންދިޔަ މައްސަލައިގައި ކަމާބެހޭ މުއައްސަސާތަކުން ބަހެއް ނުބުނާތީ، ކުރީގެ ބަންޑާރަނައިބު އަލްއުސްތާޛާ އާއިޝަތު އާޒިމާ ޝަކޫރު ސުވާލު އުފައްދަވައިފިއެވެ.

އާޒިމާގެ މީސްމީޑިއާ ޕޯސްޓެއްގައި ވިދާޅުވެފައިވަނީ، ހޮސްޕިޓަލުގައި މަންމައާއެކު އޮތް ތުއްތު ކުއްޖަކު މައިންބަފައިންގެ އެއްވެސް އިޒުނައެއް ނެތި ދައުލަތަށް ނެގި މައްސަލައެއްގެ ވާހަކަ މީސްމީޑިއާގައި ދެކެވެމުންދާ ކަމަށެވެ. އަދި ޚާއްޞަކޮށް މަންމަގެ ގާތުން ބުއިމަށް ބޭނުންވާ ތުއްތު ކުއްޖަކު މަންމަގެ ކިބައިން ވަކިކުރަންވާނީ ވަރަށް ސީރިއަސް ހާލަތްތަކެއްގައި ކަމަށް އޭނާ ފާހަގަކުރެއްވިއެވެ.

"މައިންބަފައިންގެ ހައްގުތައް ގާނޫނީ ގޮތުން ވަކި ހާލަތްތަކެއްގައި ހިފެހެއްޓިދާނެ. ނަމަވެސް މައިންބަފައިންގެ އިއުތިރާޒެއް ނެތި ހޮސްޕިޓަލަކުން ކުއްޖަކު އެހެން ފަރާތަކާ ނުވަތަ މުއައްސަސާއަކާ ހަވާލުކުރެވޭނެ ވަކި އުސޫލުތަކެއް އޮންނަންވާނެ،" އާޒިމާ ވިދާޅުވިއެވެ.

މީގެ އިތުރުން، މިފަދަ މައްސަލަތައް ބަލައި ތަހުގީގު ކުރުމުގެ ގާނޫނީ މެންޑޭޓް އޮތް މިނިވަން މުއައްސަސާތައް ހުރިއިރު، އެ ތަންތަނުން މިހާތަނަށް އެއްވެސް އެއްޗެއް ބުނެފައި ނުވާތީ އާޒިމާ ވަނީ ކަންބޮޑުވުން ފާޅުކުރައްވާފައެވެ. ވަކިން ޚާއްޞަކޮށް ހިއުމަން ރައިޓްސް ކޮމިޝަން (އެޗްއާރުސީއެމް) އާއި ޗައިލްޑް އޮމްބަޑްސްޕާސަންގެ އޮފީހުން މި މައްސަލައިގައި ތަހުގީގެއް ހިންގަމުންދާކަން ހާމަނުކުރާތީ އޭނާ ވަނީ ސުވާލު އުފައްދަވާފައެވެ.

އާޒިމާ ވިދާޅުވީ މިފަދަ މުއައްސަސާތަކަކީ ޝަކުވާއެއް ހުށަނޭޅި ނަމަވެސް އަމިއްލައަށް އިސްނަގައިގެން މައްސަލަ ބެލުމުގެ ބާރު ލިބިފައިވާ ތަންތަން ކަމަށެވެ.

މި މައްސަލައާ ގުޅިގެން އިޖުތިމާއީ އެހީއާ ބެހޭ ވުޒާރާއިން ނެރުނު ނޫސްބަޔާނެއްގައި ބުނެފައިވަނީ، ދައުލަތުގެ ބެލުމުގެ ދަށަށް ކުއްޖަކު ގެންނަނީ އެ ނޫން އެހެން އެއްވެސް ގޮތެއް ނެތުމުން ކަމަށެވެ. އަދި އެކަން ކުރަނީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައިވާ އިޖުރާއާތުތަކާ އެއްގޮތަށް، ކުއްޖާގެ މަސްލަހަތަށް އެންމެ ބޮޑު އިސްކަމެއް ދީގެން ކަމަށްވެސް އެ ވުޒާރާއިން ބުނެއެވެ.

ވުޒާރާއިން އިތުރަށް ބުނެފައިވަނީ، ކުއްޖެއްގެ ރައްކާތެރިކަން ޔަގީން ނުވާ ހާލަތްތަކުގައިވެސް އެންމެ ފުރަތަމަ މަސައްކަތް ކުރަނީ މައިންބަފައިންގެ ގާތުގައި ބައިންދައިގެން ހައްގުތައް ކަށަވަރުކޮށްދިނުމަށް ކަމަށެވެ. އަދި ދައުލަތުގެ ބެލުމުގެ ދަށަށް ގެންދިއުމަކީ އެންމެ ފަހު ފިޔަވަޅު ކަމަށާއި، މައިންބަފައިންގެ ކިބައިގައި ނުކުޅެދުންތެރިކަމެއް ހުރުމަކީ ކުއްޖާ ވަކިކުރުމުގެ ސައްހަ ސަބަބެއް ނޫން ކަމަށްވެސް ބަޔާނުގައި ފާހަގަކޮށްފައިވެއެވެ.