ޑިވިޑެންޑް ޓެކުހުގެ ގަވާއިދުތަކާ އެއްގޮތަށް ފައިދާ ދޫކުރުމަށްޓަކައި ހިއްސާދާރުން ޓެކްސް ދައްކަންޖެހޭ ޤައުމުގެ މަޢުލޫމާތު ސައްޙަތޯ ކަށަވަރުކޮށް އެ މަޢުލޫމާތު އަޕްޑޭޓްކުރުމަށް ދިރާގުން އިލްތިމާސްކޮށްފިއެވެ.
އާމްދަނީން ޓެކްސް ނެގުމުގެ ޤާނޫނު (ޤާނޫނު ނަންބަރު 25/2019) ގެ 55 ވަނަ މާއްދާގެ (ހ) ގެ ހަތަރު ވަނަ ނަންބަރު ބުނާ ގޮތުން ރާއްޖޭގެ ޓެކްސް ރެޒިޑެންޓެއް ނޫން ފަރާތަކަށް ދޫކުރާ ފައިދާއިން 10 އިންސައްތައިގެ ނޮން-ރެޒިޑެންޓް ވިތުހޯލްޑިންގ ޓެކްސް ކެނޑުން ލާޒިމުވެއެވެ.
ހަމައެހެންމެ ފައިދާ ދޫކުރާ ވަގުތު ހިއްސާދާރަކީ ރާއްޖޭގެ ޓެކްސް ރެޒިޑެންޓެއްކަން ކުންފުންޏަށް ކަށަވަރު ނުވާ ހާލަތުގައި ހަމަ އެ ޤާނޫނުގެ 55 ވަނަ މާއްދާގެ (ނ) ގެ ފުރަތަމަ ނަންބަރުގެ ދަށުން ޓެކްސް އުނިކުރުން ކުންފުންޏަށް ލާޒިމުވާ ކަމަށް ދިރާގުން ބުނެފައިވެއެވެ.
މި މަޢުލޫމާތު އަޕްޑޭޓްކުރަން ބޭނުންވާ ހިއްސާދާރުންނަށް ދެ ގޮތެއް ދިރާގުން ފާހަގަކޮށްފައިވެއެވެ. ފުރަތަމަ ގޮތަކީ މޯލްޑިވްސް ސެކިއުރިޓީޒް ޑިޕޮސިޓަރީ (އެމްއެސްޑީ) ގެ އިންފިނިޓީ ޕޯޓަލް މެދުވެރިކޮށް މަޢުލޫމާތު ބަދަލުކުރުމެވެ. ދެވަނަ ގޮތަކީ ޝެއަރހޯލްޑަރ އިންފޮމޭޝަން ފޯމު ފުރައި އެ ކުންފުނީގެ އިންވެސްޓާ ރިލޭޝަންސް އީމެއިލަށް ފޮނުވުމެވެ.
ޑިވިޑެންޑުން ޓެކްސް ކެނޑުމުގައި ޤާނޫނީ ގޮތުން ލާޒިމުވާ ކަންކަން ފުރިހަމަކުރުމަށްޓަކައި ހިއްސާދާރުންގެ ރެސިޑެންސީ މަޢުލޫމާތު ސައްޙަކަން ޔަގީންކުރުމަކީ ކުންފުންޏަށް ކޮންމެހެން ބޭނުންތެރި ކަމެއް ކަމަށް ދިރާގުން ފާހަގަކޮށްފައިވެއެވެ.
Advertisement
This content is created and paid for by advertisers and does not involve Voice Journalists
