ހޯމްލޭންޑު ސެކިއުރިޓީ ވުޒާރާގެ ސްޓޭޓް މިނިސްޓަރު ޑރ. ޢަބްދުالله ފައިރޫޝް އެ މަޤާމުން އިސްތިއުފާ ދެއްވަން ނިންމަވައި މިއަދު އެ ކަން އިޢުލާނުކުރައްވައިފިއެވެ.
ކުރީގެ އެސިސްޓެންޓު ކޮމިޝަނަރު އޮފް ޕޮލިސް ފައިރޫޝް އެކްސްގައި ޝާއިޢުކުރެއްވި ޕޯސްޓުގައި ފާހަގަކުރެއްވީ ސަރުކާރުގެ ވަޒީފާ އަދާކުރެއްވުމުގެ ބާބު ނިންމައިލެއްވުމަށް މިއީ އެންމެ އެކަށީގެންވާ ވަގުތު ކަމަށެވެ.
"ހިދުމަތް ކުރުމުގެ ފުރުސަތު ލިބުމުން ޝުކުރުވެރިވަން. އަދި މި ދަތުރުގައި ލިބުނު އެކުވެރިން އަދި އިދާރާތަކަށް ޝުކުރުވެރިވަން" ފައިރޫޝް ވިދާޅުވިއެވެ.
މި ސަރުކާރު ވެރިކަމާ ހަވާލުވުމާ އެކު ފައިރޫޝް އެންމެ ފުރަތަމަ ޢައްޔަނުކުރެއްވީ ހަޔާ އެޑިއުކޭޝަން ވުޒާރާގެ ސްޓޭޓް މިނިސްޓަރު ކަމަށެވެ. އެއަށް ފަހު 2024 ވަނަ އަހަރުގެ އޮކްޓޫބަރުގައި އޭނާ ހޯމްލޭންޑު ސެކިއުރިޓީ ވުޒާރާއަށް ބަދަލުކުރެއްވިއެވެ.
ފައިރޫޝް ފުލުހުންގެ ޚިދުމަތުން ރިޓަޔާ ކުރެއްވީ 2021 ވަނަ އަހަރުއެވެ. އޭގެ ފަހުން ސިޔާސީ މައިދާނަށް ނުކުމެވަޑައިގެން އެންމެ ފަހުގެ ރިޔާސީ އިންތިޚާބުގައި އެމްއެންޕީގެ ރައީސް މުޙައްމަދު ނާޒިމާ އެކު ސިޔާސީ ހަރަކާތްތަކުގައި ބައިވެރިވެވަޑައިގެންފައިވެއެވެ.
Advertisement
This content is created and paid for by advertisers and does not involve Voice Journalists
