އަޔަލެންޑްގެ ފުޓްބޯޅައާ ބެހޭ އިދާރާއިން ފީފާގެ ރައީސް ޖިއާނީ އިންފަންޓީނޯއަށް ކުރިން ދީފައި އޮތް ތާއީދު އަނބުރާ ގެންދިއުމަށް ނިންމައިފިއެވެ.

ބޯޑު ބައްދަލުވުމަކަށް ފަހު ނެރުނު ބަޔާނުގައި އެފްއޭއައި އިން ބުނެފައި ވަނީ ވޯލްޑް ކަޕަށް ފަހު ހިޔާލުތަފާތުވުންތައް އުފެދުމުގެ ކުރިން ފޮނުވި ތާއީދުގެ ސިޓީ ބާތިލުކޮށް ސަބަބުތައް ބަޔާންކޮށް ފީފާއަށް ވަކި ސިޓީއެއް ފޮނުވައިފައިވާ ކަމަށެވެ.

"އަޔަލެންޑުގެ ފުޓްބޯޅަ ކުރިއެރުވުމަށް ފީފާއިން ފޯރުކޮށްދޭ އެހީތެރިކަމަށް މި އެސޯސިއޭޝަނުން ޝުކުރުވެރިވޭ. ނަމަވެސް ފަހަކަށް އައިސް ހިނގާފައިވާ ކަންކަމުގެ ސަބަބުން އިދާރީ ހިންގުމާއި ދެފުށް ފެންނަ ގޮތަށް ކަންކަން ކުރުމާއި އަދި ކަމާބެހޭ ފަރާތްތަކުގެ މަޝްވަރާ ހޯދުމުގައި ބޮޑެތި ކަންބޮޑުވުންތަކެއް ވަނީ އުފެދިފައި. ފާއިތުވި އަހަރުތަކުގައި އެފް.އޭ.އައި އިން އިދާރީ ހިންގުން ހަރުދަނާކުރުމަށް ކުރި މަސައްކަތްތަކަށް ބަލާއިރު އެންމެ ރަނގަޅު އުސޫލުތައް ހިފެހެއްޓުމަކީ މި އެސޯސިއޭޝަނުގެ މަސްއޫލިއްޔަތެއް ކަމުގައި ދެކެން" އެ ބަޔާނުގައިވެއެވެ.

ނޮދަން އަޔަލެންޑުގެ އައިއެފްއޭ އިން ތާއީދު ރަސްމީކޮށް ނެގި ކަމެއް އިޢުލާނެއް ނުކުރެއެވެ. ނަމަވެސް ޔޫއެފާ އާއި ފީފާގެ މެންބަރެއްގެ ހައިސިއްޔަތުން އެ ދެ ފަރާތަށް ވެސް ޒިންމާ އޮންނަ ކަމަށާއި މި މައްސަލައިގައި ޔޫއެފާގެ ސިޔާސަތަށް ތާއީދުކުރާ ކަމަށް އެ އިދާރާގެ ތަރުޖަމާނު ބުނެފައިވެއެވެ.

ވިލާތުގެ ގިނަ ޤައުމުތަކަކުން އިންފަންޓީނޯއާ ދެކޮޅަށް ނިކުމެފައިވާއިރު، މިފަހުން ފީފާއިން ވަނީ އިންފަންޓީނޯގެ ދިފާއުގައި ބަޔާނެއް ނެރެފައެވެ. އެގޮތުން މިކަމަކީ އެ އިދާރާއާ ދެކޮޅަށް ރޭވިގެން ހިންގާ ބަދުނާމުކުރުމުގެ ޙަރަކާތްތަކެއްގެ ގޮތުގައި ވަނީ ސިފަކޮށްފައެވެ.

"ފީފާގެ ރައީސަކީ އެ އިދާރާގެ މެންބަރު ގައުމުތަކުގެ މެދުގައި ބޭއްވުނު ޑިމޮކްރެޓިކް އިންތިޚާބަކުން ހޮވިފައިވާ ބޭފުޅެއް. އޭނާ މަގާމުގެ މަސްއޫލިއްޔަތު އަދާކުރައްވަނީ އެ މެންޑޭޓުގެ ދަށުން" ފީފާގެ ބަޔާނުގައިވެއެވެ. ފީފާއިން އިތުރަށް ތުހުމަތުކޮށްފައިވާ ގޮތުގައި މެންބަރުންގެ ތާއީދު ނެތް ފަރާތްތަކުން ޑިމޮކްރެޓިކް ނިޒާމުގެ ބޭރުން ދޮގު ތުހުމަތުތައް ފެތުރުމުގެ ބޭނުމަކީ ނާޖާއިޒު ފައިދާ ހޯދުމެވެ.