މެންޗެސްޓާ ސިޓީގެ ފޯވާޑް އޮމަރް މަރްމޫޝް އާއި ވިންގާ ސަވީނިއޯ، ޓޮޓެންހަމް ހޮޓްސްޕާއަށް ބަދަލުވުމާ ގުޅޭގޮތުން ދެ ކްލަބުގެ މެދުގައި ރަސްމީ މަޝްވަރާތައް ފަށާފައިވާ ކަމަށް އިނގިރޭސި މީޑިއާތަކުން ބުނެފިއެވެ.

އުމުރުން 22 އަހަރުގެ ބްރެޒިލް ވިންގާ ސަވީނިއޯ ހޯދުމަށް މިދިޔަ އަހަރު ސްޕާސްއިން މަސައްކަތް ކުރި ނަމަވެސް، އެ ފަހަރު އޭނާ ނިންމީ ސިޓީގައި މަޑުކުރުމަށެވެ. ފްރާންސްގެ ޓްރޮއީސްއިން 2024 ވަނަ އަހަރު 30 މިލިއަން ޕައުންޑަށް ސިޓީއާ ގުޅުނު ސަވީނިއޯއަށް، ނިމިދިޔަ ސީޒަނުގެ ޕްރިމިއާ ލީގުގައި ފުރަތަމަ އެގާރައިން ޖާގަ ލިބުނީ އެންމެ ހަތް މެޗުގައެވެ. އެހެންކަމުން ކުޅުމުގެ ފުރުޞަތު ހޯދުމަށްޓަކައި އޭނާ މިހާރު ބޭނުންވަނީ ކްލަބު ބަދަލުކުރާށެވެ.

އައިންޓްރެކްޓް ފްރޭންކްފާޓުން މިދިޔަ އަހަރު 59 މިލިއަން ޕައުންޑަށް ސިޓީއަށް ސޮއިކުރި އުމުރުން 27 އަހަރުގެ މިޞްރު ފޯވާޑް މަރްމޫޝްއަށް ވެސް، ކޯޗު ޕެޕް ގާޑިއޯލާގެ އިރުޝާދުގެ ދަށުން 2025-26 ސީޒަނުގައި ގަވާއިދުން ކުޅުމުގެ ފުރުޞަތެއް ނުލިބުނެވެ. އަދި ހުރިހާ މުބާރާތެއްގައި އޭނާ ކުޅުނު 36 މެޗުން ކާމިޔާބު ކުރެވުނީ އެންމެ އަށް ލަނޑެވެ. މި ދެ ކުޅުންތެރިން ވިއްކާލާނެ އަގެއް ސިޓީން ރަސްމީކޮށް ހާމަކޮށްފައި ނުވި ނަމަވެސް، މި ޓްރާންސްފާއިން ބޮޑު މާލީ މަންފާއެއް ހޯދުމަށް އެ ކްލަބުން އަމާޒު ހިފާފައިވާ ކަމަށް ބެލެވެކަމަށް މީޑިއާތަކުން ވަނީ ރިޕޯޓްކޮށްފައެވެ.

ސްޕާސްގެ ހެޑް ކޯޗު ރޮބާޓޯ ޑެ ޒެރްބީ ވަނީ މި ޓްރާންސްފާ މާކެޓުގައި އެ ޓީމުގެ މެދުތެރެ ވަރުގަދަކުރުމަށް ބޮޑު ހޭދައެއް ކޮށްފައެވެ. އެގޮތުން ވެސްޓް ހެމްގެ މެޓެއުސް ފެރްނާންޑެސް އަދި ނިއުކާސަލްގެ ސެންޑްރޯ ޓޮނާލީ ހޯދުމަށް ޖުމްލަ 185 މިލިއަން ޕައުންޑް ވަނީ ޚަރަދުކޮށްފައެވެ. 

މިފަހަރު ސީޒަނުގެ ޕްރިމިއާ ލީގުގެ ފުރަތަމަ މެޗުގައި ހޮނިހިރު ދުވަހު ސްޕާސް ނުކުންނާނީ ރަށުން ބޭރުގައި ބްރެންޓްފޯޑާ ދެކޮޅަށެވެ. އަދި ސިޓީގެ ފުރަތަމަ މެޗުގައި އާދީއްތަ ދުވަހު އަމިއްލަ ދަނޑުގައި ބައްދަލުކުރާނީ ބޯންމައުތާއެވެ.