އިންޑިއާއާއި ސިންގަޕޫރުގެ ދެމެދުގައި ބާއްވާ ވަޒީރުންގެ ފެންވަރުގެ ވަށްމޭޒު މަޝްވަރާތަކުގެ 4 ވަނަ ބައްދަލުވުން މާދަމާ ސިންގަޕޫރުގައި ބޭއްވުމަށް ހަމަޖެހިއްޖެއެވެ.

މި ބައްދަލުވުމުގައި ބައިވެރިވެވަޑައިގަންނަވާ އިންޑިއާގެ އިސް ވަފުދުގައި ހިމެނިވަޑައިގަންނަވަނީ ފައިނޭންސް އަދި ކޯޕަރޭޓް އެފެއާޒް މިނިސްޓަރު ނިރްމަލާ ސީތާރާމަން، އެކްސްޓަރނަލް އެފެއާޒް މިނިސްޓަރު ޑރ. އެސް. ޖައިޝަންކަރު، ކޮމާސް އަދި އިންޑަސްޓްރީ މިނިސްޓަރު ޕިޔޫޝް ގޯޔަލްގެ އިތުރުން މިނިސްޓަރ އޮފް ސްޓޭޓް ފޯ ކޮމާސް އެންޑް އިންޑަސްޓްރީ އަދި އިލެކްޓްރޯނިކްސް އެންޑް އައިޓީއެވެ. މި ދަތުރުފުޅުގެ ތެރެއިން އިންޑިއާގެ މިނިސްޓަރުން ސިންގަޕޫރުގެ ވަޒީރުންނާ ބައްދަލުކުރެއްވުމުގެ އިތުރުން، އެ ގައުމުގެ އިސް ލީޑަރުންގެ އަރިހަށް އިޙްތިރާމްގެ ޒިޔާރަތް ކުރެއްވުމަށްވެސް ވަނީ ހަމަޖެހިފައެވެ.

މި ވަށްމޭޒު މަޝްވަރާތަކަކީ ދެ ގައުމުގެ ދެމެދުގައި އާ ދާއިރާތަކުން ގުޅުން ބަދަހިކުރުމަށް އުފައްދާފައިވާ މުހިންމު މަންސައެކެވެ. މި ބައްދަލުވުންތަކުގެ ފުރަތަމަ ބުރު 2022 ގެ ސެޕްޓެމްބަރު މަހު އިންޑިއާގެ ވެރިރަށް ނިއުދިއްލީގައި ބޭއްވި އިރު، ދެވަނަ ބުރު 2024 ގެ އޮގަސްޓް މަހު ސިންގަޕޫރުގައި އަދި ތިންވަނަ ބުރު 2025 ގެ އޮގަސްޓް މަހު ނިއުދިއްލީގައި ވަނީ ބާއްވާފައެވެ. މީގެ ކުރިން ބޭއްވުނު ބައްދަލުވުންތަކުގައި އެޑްވާންސްޑް މެނުފެކްޗަރިންގ، ކަނެކްޓިވިޓީ، ޑިޖިޓަލައިޒޭޝަން، ސިއްހީ ދާއިރާ، ހުނަރު ތަރައްގީކުރުން އަދި ދެމެހެއްޓެނިވި ތަރައްގީއާ ގުޅޭގޮތުން ކުރެވުނު މަޝްވަރާތަކަކީ ދެ ގައުމުގެ ކޮމްޕްރިހެންސިވް ސްޓްރެޓީޖިކް ޕާޓްނަރޝިޕް ރޯޑްމެޕްގެ އަސާސެވެ. މި ރޯޑްމެޕް އިޢުލާންކޮށްފައިވަނީ ސިންގަޕޫރުގެ ބޮޑުވަޒީރު ލޯރެންސް ވޮންގ 2025 ގެ ސެޕްޓެމްބަރު މަހު އިންޑިއާއަށް ކުރެއްވި ދަތުރުފުޅުގައެވެ.

މިފަހަރުގެ 4 ވަނަ ބައްދަލުވުމުގެ ސަބަބުން، މިހާރު ކުރިއަށްދާ މަޝްވަރާތަކާއި މަސައްކަތްތަކުގެ ކުރިއެރުން ވަޒަންކޮށް، ދެ ގައުމުގެ ގުޅުން އިތުރަށް ވަރުގަދަކުރެވޭނެ އާ ދާއިރާތައް ދެނެގަތުމުގެ ފުރުސަތު ލިބިގެންދާނެއެވެ. މީގެއިތުރުން، ދެ ގައުމުގެ ވިޔަފާރިވެރިންގެ މެދުގައި ބާއްވާ ވިޔަފާރިއަށް ޚާއްސަ މަޝްވަރާތަކެއް، މި ބައްދަލުވުމުގެ ހަވާސާގައި އޮންނަ އިންޑިއާ-ސިންގަޕޫރު ބިޒްނަސް ރައުންޑްޓޭބަލް ގެ 4 ވަނަ ބައްދަލުވުމުގައި ކުރިއަށްދާނެއެވެ.