މާލީ ޚިދުމަތް ހޯދާ ފަރާތްތައް ހިމާޔަތްކުރުމާ ގުޅޭ ގަވާއިދަކާއި ކަސްޓަމަރުންގެ ވަނަވަރު ކަށަވަރުކުރުމުގެ ގަވާއިދަކަށް އާންމުންގެ ފަރާތުން ޚިޔާލު ހޯދުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހުޅުވާލައިފިއެވެ.
މިގޮތުން ޚިޔާލު ހުށަހެޅުމަށް ހުޅުވާލާފައިވާ ފުރަތަމަ ގަވާއިދަކީ ފައިނޭންޝަލް ކޮންސިއުމަރ ޕްރޮޓެކްޝަން ރެގިއުލޭޝަނެވެ. މި ގަވާއިދު ތައްޔާރުކޮށްފައި ވަނީ މާލީ ޚިދުމަތްތައް ބޭނުންކުރާ ފަރާތްތަކުގެ ޙައްޤުތައް ރައްކާތެރިކޮށްދީ އެ ޙައްޤުތައް ކަށަވަރުކޮށްދިނުމުގެ ބޭނުމުގައެވެ. ދެވަނައަށް ޚިޔާލަށް ހުޅުވާލި ގަވާއިދަކީ ސިމްޕްލިފައިޑް އަދި އިލެކްޓްރޯނިކް ކަސްޓަމަރ ޑިއު ޑެލިޖަންސް ރެގިއުލޭޝަނެވެ. މި ގަވާއިދުގައި ބަޔާންކޮށްފައި ވަނީ މަނީ ލޯންޑަރިންނާއި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ ދަށުން ކަސްޓަމަރުންގެ މަޢުލޫމާތުގެ ޞައްޙަކަން ޔަގީންކުރުމުގައި ޢަމަލުކުރާނެ މިންގަނޑުތަކާއި ޝަރުޠުތަކެވެ.
މާލީ އިދާރާތަކާއި ކަމާ ގުޅޭ އެކި މުއައްސަސާތަކުގެ މަޝްވަރާއާ އެކު އެކުލަވާލާފައިވާ މި ދެ ގަވާއިދަށް ޚިޔާލު ހުށަހެޅޭނެ އެންމެ ފަހު ތާރީޚަކީ 26 އޮގަސްޓް 2026 ވާ ބުދަ ދުވަހުގެ މެންދުރުފަހު 15:00 އެވެ. ޚިޔާލު ފޮނުވާނީ އީމެއިލް މެދުވެރިކޮށް އެމްއެމްއޭގެ ފައިނޭންޝަލް ކޮންސިއުމަރ ޔުނިޓަށެވެ.
Advertisement
This content is created and paid for by advertisers and does not involve Voice Journalists
