އިނގިރޭސި ޕްރިމިއާ ލީގްގައި ރޭ ކޮންވެންޓްރީ ސިޓީ އާއި އާސެނަލް ބައްދަލުކުރިމެޗް އާސެނަލް ކާމިޔާބުކޮށް ލީގްގެ ފެށުން އެޓީމް ރަނގަޅުކޮށްފިއެވެ.

އާސެނަލްގެ ދަނޑުގައި ކުޅުނު މިމެޗް ކޮންވެންޓްރީގެ މައްޗަށް އެޓީމް ކުރި ހޯދީ 3-0 ގެ ނަތީޖާއިންނެވެ. ގާތްގަނޑަކަށް 25 އަހަރަށްފަހު ޕްރިމިއާ ލީގަށް ޕްރޮމޯޓްވި ކޮންވެންޓްރީ އާ ދެކޮޅަށް ކުޅުނު މިމެޗްގައި އާސެނަލްގެ މުހިންމު ތަރިންގެ ފަރާތުން ވަނީ ގޯލްތައް ފެނިގެންގޮސްފައެވެ.

މެޗްގައި އާސެނަލަށް ގޯލް ހުޅުވާލަދިނީ، ހާވާޓެޒް އެވެ. މި މެޗުގައި ވެސް އެންމެ ފާހަގަކޮށްލެވުނީ އަލަށް ޓީމާ ގުޅުނު ކްރިސްޓޯސް ޓްޒޯލިސްގެ ހުނަރުވެރި ކުޅުމެވެ. ޕްރިމިއާ ލީގުގައި އޭނާ ކުޅުނު ފުރަތަމަ މެޗުގައި، އާސެނަލްއިން ޖެހި ފުރަތަމަ ދެ ގޯލުގައި ވެސް އޭނާގެ ދައުރު ބޮޑެވެ. އެގޮތުން ފުރަތަމަ ލަނޑުގައި ރިކާޑޯ ކަލަފިއޯރީއަށް ބޯޅަ ހޯދައިދިނީ އޭނާއެވެ. އެ ބޯޅައިން ކައި ހާވާޓްޒް ލަނޑު ޖެހިއިރު، ދެވަނަ ލަނޑަކީ ޓްޒޯލިސް ނަގައިދިން ހުރަހެއް ކޮވެންޓްރީގެ ކީޕަރު ކާލް ރަޝްވޯތު އަތުގައި ޖެހިފައި ނިކުތް ވަގުތު ބުކާޔޯ ސާކާ ޖެހި ލަނޑެކެވެ.

މެޗުގެ ފުރަތަމަ ހާފުގައި އާސެނަލްގެ ކުޅުންތެރިން ކައިރިއަށް ވެސް އެ ޓީމަށް ކައިރިނުވެވުނުއިރު، އެންމެ ޓެކްލެއް ވެސް ކުރެވިފައެއް ނުވެއެވެ. މެޗްގައި ފެނިގެންދިޔަ އާސެނަލްގެ ދެވަނަ ލަނޑު ސާކާ ކާމިޔާބުކޮށްދިން އިރު، ތިންވަނަ ލަނޑު ޖަހައިދިނީ މާޓިން އޮޑެގާޑެވެ.

މެޗްގައި އާސެނަލްގެ މެދުތެރެއިން ބެން ވައިޓް، ސާކާ އަދި އޮޑެގާޑްގެ ކުޅުން ވަރަށްބޮޑަށް ފާހަގަވެގެން ދިޔައެވެ. އަދި ހަމަ އެހެންމެ ވައަތް ފަރާތުން ޓްޒޯލިސް، މެދުތެރެއިން ޑެކްލަން ރައިސް އަދި މައިލްސް ލޫވިސް-ސްކެލީގެ އާއި ހާވާޓްޒް ގުޅިގެން ވަނީ ކޮންވެންޓްރީ ޑިފެންސްލައިނަށް ނުރައްކާކޮށްފައެވެ.

ޕްރިމިއާ ލީގްގައި ދެން އެންމެ އަވަހަށް އަސެނަލް ނިކުންނާނީ އެސްޓަންވިލާ އާ ދެކޮޅަށެވެ.