50 ކޮތަޅަށްވުރެ ގިނަ ޕްލާސްޓިކް ކޮތަޅު ހިމެނޭ ކޮތަޅު ބޮނޑިން ދެ ރުފިޔާގެ ފީ ނެގުން އިސްތިސްނާކޮށް ކުނި މެނޭޖުކުރުމުގެ ޤާނޫނަށް ގެނައި އިޞްލާޙު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ތަޞްދީޤުކުރައްވައިފިއެވެ.

މި ބަދަލާ އެކު ވިޔަފާރި ހަރަކާތްތަކުގައި ޕޮއިންޓް އޮފް ސޭލްގައި ކަސްޓަމަރަށް ވިއްކާ ނުވަތަ ފޯރުކޮށްދޭ ޕްލާސްޓިކް ކޮތަޅަކުން ނަގާ ދެ ރުފިޔާ 50 ކޮތަޅަށްވުރެ ގިނަ ކޮތަޅު ހިމެނޭ ބޮނޑިތަކަށް ދެން ނުނެގޭނެއެވެ. އެ އިޞްލާޙާ ގުޅިގެން ކުރިން ނެގެމުން އައި ޑަބަލް ޓެކްސް ހުއްޓިގެންދާނެއެވެ.

މި ބިލު ރައްޔިތުންގެ މަޖިލީހުން ފާސްކޮށްފައިވަނީ 17 އޮގަސްޓު 2026 ވީ ހޯމަ ދުވަހު ބޭއްވި 20 ވަނަ މަޖިލީހުގެ ދެވަނަ ދައުރުގެ 25 ވަނަ ޖަލްސާގައެވެ.

ކޮތަޅު ބޮނޑީގެ އިސްތިސްނާގެ އިތުރުން ވެސް މި އިޞްލާޙުގައި ގިނަ ބަދަލުތަކެއް ހިމެނެއެވެ. އެ ގޮތުން ކުނި މެނޭޖުކުރާ ނިޒާމުތަކާއި މަރުކަޒުތައް ޤާއިމުކުރުމުގެ މިންގަނޑުތައް ކަނޑައެޅުމުގައި ކަމާ ބެހޭ ވުޒާރާއާއި ޔުޓިލިޓީ ރެގިއުލޭޓަރީ އޮތޯރިޓީއާއި އެންވަޔަރަންމަންޓަލް ރެގިއުލޭޓަރީ އޮތޯރިޓީގެ މަސްއޫލިއްޔަތުތަކަށް ބަދަލު ގެނެސްފައިވެއެވެ. ކަނޑައެޅިފައިވާ މިންގަނޑުތަކާ ޚިލާފަށް ކުނި މެނޭޖުކޮށް ތިމާވެއްޓަށް ނުވަތަ ޢާންމު ޞިއްޙަތަށް ގެއްލުން ލިބިއްޖެ ނަމަ ޖޫރިމަނާކުރުމާ ގުޅޭ ގަވާއިދު ހެދުމުގެ ބާރު އެންވަޔަރަންމަންޓަލް ރެގިއުލޭޓަރީ އޮތޯރިޓީއަށް ލިބިދީފައިވެއެވެ.

ހަމައެހެންމެ އިޤްތިޞާދީ ނުވަތަ އިންޑަސްޓްރިއަލް ބޭނުމަށް ދޫކޮށްފައިވާ ރަށްރަށާއި ސަރަޙައްދުތަކުގައި އުފެދޭ ކުނި މީހުން ދިރިއުޅޭ ރަށެއްގެ ކުނި މެނޭޖުކުރާ މަރުކަޒަކަށް ގެންދެވޭ ގޮތަށް ހަމަޖައްސައި އެ ސަރަޙައްދުތަކުގައި ދެމެހެއްޓެނިވި ކުނި ނިޒާމެއް ހިނގާކަން ކަށަވަރުކުރުން ޔުޓިލިޓީ ރެގިއުލޭޓަރީ އޮތޯރިޓީގެ ޒިންމާއެއް ގޮތުގައި ކަނޑައަޅާފައިވެއެވެ. މީގެ އިތުރުން ރާއްޖެއަށް އެއްވެސް ބާވަތެއްގެ ކުންޏެއް އެތެރެކުރުން ކުށެއް ކަމުގައި ކަނޑައެޅުމާ އެކު ހުއްދައެއް ނެތި ނުރައްކާތެރި ކުނި ރާއްޖޭގައި ވިއްކުމާއި ބޭނުންކުރުމާއި ޑިސްޓްރިބިއުޓް ކުރުން ވެސް މަނާކޮށްފައިވެއެވެ.

މި ޤާނޫނު ގެޒެޓުގައި ޝާއިޢުކުރާ ދުވަހުން ފެށިގެން ޢަމަލުކުރަން ފެށޭ އިރު ޤާނޫނުގެ ދަށުން ގެންނަންޖެހޭ ގަވާއިދުގެ އިޞްލާޙުތަކާއި އަލަށް ހަދަންޖެހޭ ގަވާއިދުތައް 30 ދުވަހުގެ ތެރޭގައި އެކުލަވައިލައި ގެޒެޓުކުރަން ޖެހެއެވެ.