ބޭރު ފައިސާއާ ބެހޭ ޤާނޫނުގައި ލާޒިމުކުރާ ގޮތަށް އެއްވެސް މިންވަރަކަށް ޑޮލަރު މާރުކޮށްފައި ނުވާ ދެ ރިސޯޓެއްގެ ނަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިޢުލާންކޮށްފިއެވެ.

އެމްއެމްއޭއިން ހާމަކޮށްފައިވާ ގޮތުގައި އެ ދެ ތަނަކީ ރަހާ ރިސޯޓާއި ސައުތު ޕާމް ރިސޯޓް މޯލްޑިވްސް އެވެ. މީގެ އިތުރުން ޤާނޫނާއި ގަވާއިދާ އެއްގޮތަށް ފައިސާ މާރުކުރުމުގެ ކަންކަން ހިންގުމަށް ހުރިހާ ފަރާތްތަކަށް އެމްއެމްއޭއިން ވަނީ އިލްތިމާސްކޮށްފައެވެ. އެ އިދާރާގައި އަދިވެސް ރަޖިސްޓްރީ ނުވެ ތިބި ފަރާތްތަކަށް ފަހު ފުރުޞަތެއް ދޭ ކަމަށް ވެސް ބަޔާންކޮށްފައިވެއެވެ.

މަރުކަޒީ ބޭންކުން ނެރުނު ކޮމްޕްލަޔަންސް ރިޕޯޓުން ދައްކާ ގޮތުގައި ރިސޯޓުތަކުގެ %78 އިން ޑޮލަރު މާރުކުރުމުގެ އިލްތިޒާމު ރަނގަޅަށް އަދާކޮށްފައިވެއެވެ. ނަމަވެސް %20 ރިސޯޓުން އެކަށީގެންވާ މިންވަރަކަށް އެ ކަންކަން ފުރިހަމަކޮށްފައެއް ނުވެއެވެ. އެ %20 ގެ ގިނަ ރިސޯޓުތަކުން ތަފާތު ސަބަބުތައް ދައްކައި ކޮންސެޝަނެއް ހޯދުމަށް އެދިފައިވީ ނަމަވެސް ކަނޑައެޅިފައިވާ އުސޫލުން ޒިންމާތައް އަދާކުރުމަށް އެމްއެމްއޭއިން ވަނީ އެ ފަރާތްތަކަށް ހަނދާންކޮށްދީފައެވެ.

ގެސްޓްހައުސްތަކާއި ސަފާރީތަކާއި ޓޫރިސްޓް ހޮޓާތައް ހިމެނޭ ކެޓަގަރީ ބީ އަށް ބަލާއިރު %48 ތަނަކުން ފައިސާ މާރުކުރުން ރަނގަޅަށް ކުރިއަށް ގެންގޮސްފައިވާއިރު %15 ފަރާތުން އެކަށީގެންވާ ވަރަށް އެ ކަން ކޮށްފައެއް ނުވެއެވެ. އަދި %37 ތަނަކުން އެއްގޮތަކަށް ވެސް ޑޮލަރު މާރުކޮށްފައި ނުވާ ކަން ރިޕޯޓުން ހާމަވެއެވެ. މެދު ފަންތީގެ ވިޔަފާރިތައް ގިނައިން ހިމެނޭ މި ކެޓަގަރީގެ ފަރާތްތައް ހޭލުންތެރިކޮށް ޤާނޫނީ އޮނިގަނޑުގެ ތެރެއިން އިތުރު ފުރުޞަތު ފަހިކޮށްދިނުމުގެ މަސައްކަތް ކުރަމުންދާ ކަމަށް އެމްއެމްއޭއިން ހާމަކޮށްފައިވެއެވެ.

އަހަރަކު 15 މިލިއަން ޑޮލަރަށް ވުރެ ބޮޑު އާމްދަނީ ލިބޭ ވިޔަފާރިތައް ހިމެނޭ ކެޓަގަރީ ސީ އަށް ބެލުމުން %38 ތަނަކުން ޑޮލަރު މާރުކުރުން ފުރިހަމަކޮށްފައިވީ ނަމަވެސް %33 ވިޔަފާރިން އެކަށީގެންވާ ގޮތެއްގައި އެ ކަން ކޮށްފައެއް ނުވެއެވެ. މީގެ އިތުރުން %29 ތަނަކުން ޑޮލަރު މާރުކުރީ އެއްވެސް ވަރަކަށް ނޫނެވެ. މި ކެޓަގަރީގެ ވިޔަފާރިތަކުން ވެސް ކޮންސެޝަން ހޯދުމަށް އެދިފައިވީ ނަމަވެސް ގޮތެއް ކަނޑައެޅެން އޮތީ ޤާނޫނަށް އިޞްލާޙު ގެނެސްގެން ކަމަށް ވާތީ އެ އިޞްލާޙު ހުށަހެޅުމުގެ މަސައްކަތް މިހާރު ވަނީ ފަށައިފައެވެ.