އައްޑޫ ސިޓީ ފޭދޫ ސްކޫލްގައި ކުރިއަށް ގެންދިޔަ ބޭސިކް ކެޑޭޓް ކޭމްޕެއްގައި ބައިވެރިވި ދަރިވަރުންތަކެއް ކާނާ ވިހަވެ ބައެއް ކުދިން ހާލު ދެރަވުމާ ގުޅިގެން އައްޑޫ އިކުއަޓޯރިއަލް ހޮސްޕިޓަލާއި އެ ސިޓީގެ ސިއްޙީ މަރުކަޒުތަކުގައި ފަރުވާ ދޭން ފަށައިފިއެވެ.
ހޮޑުލެވި ބޭރަށް ހިންގުމުގެ އަލާމާތްތައް ފެނިގެން ފަރުވާ ހޯދަމުންދާ ކުދިންގެ ތެރެއިން ބައެއް ކުދިން ވަނީ ހޮސްޕިޓަލުގައި އެނދުމަތިކޮށްފައެވެ.
އެގޮތުން ފޭދޫ ސިއްހީ މަރުކަޒުގައި 12 ކުދިންނަށް އަދި މަރަދޫ ސިއްހީ މަރުކަޒުގައި 12 ކުދިންނަށް އެޑްމިޓްކޮށްގެން ފަރުވާ ދެމުން އަންނަ އިރު، އައްޑޫ އިކުއިޓޯރިއަލް ހޮސްޕިޓަލަށް ހަތް ކުއްޖަކު ގެންގޮސް ފަރުވާ ދެމުން އަންނަ ކަމަށް މައުލޫމާތު ލިބެއެވެ.
މިކަމާ ގުޅިގެން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން އެކްސްގައި ކުރި ޕޯސްޓެއްގައި ވަނީ މި ހާދިސާއާ މެދު އެ ކޮމިޝަނުން ނުހަނު ކަންބޮޑުވާ ކަމަށް ބުނެ މައްސަލަ މޮނިޓާ ކުރަމުންދާ ކަމަށް ހާމަކޮށްފައެވެ.
އެޗްއާރްސީއެމްގެ ޕޯސްޓުގައި ވަނީ މި ހާދިސާ ހިނގައިދިޔަ ގޮތް ޙައްސާސް މައްސަލައެއްގެ ގޮތުގައި ތަޙުޤީޤުކޮށް މިފަދަ ކަންކަން ތަކުރާރު ނުވާނެ ގޮތަށް ކަންކަން ބައްޓަންކުރުމަށް ކަމާ ބެހޭ އިދާރާތަކަށް ގޮވައިލައިފައެވެ.
ރާއްޖޭގެ ހުރިހާ ސަރުކާރު ސްކޫލެއްގައި މިހާރު ކެޑޭޓް ކޭމްޕްތައް ކުރިއަށް ގެންދަމުންދެއެވެ.
Advertisement
This content is created and paid for by advertisers and does not involve Voice Journalists
